ស្ថាប័នធំៗមួយចំនួននៅកម្ពុជា បេ្តជ្ញាកាត់បន្ថយការប្រើប្រាស់ថាមពលដើម្បីទប់ទល់បញ្ហាប្រែប្រួលអាកាសធាតុ
ក្រុមហ៊ុននិងស្ថាប័នចំនួន១៥ក្នុងនោះមាន ស្ថានទូតបារាំង សភាពាណិជ្ជកម្មអឺរ៉ុបនៅកម្ពុជា ក្រុមហ៊ុនថាមពលតូតាល់ជាដើម បានប្តេជ្ញាប្រយុទ្ធប្រឆាំងនឹងការប្រែប្រួលអាកាសធាតុក្នុងប្រទេសកម្ពុជា តាមរយៈការចូលរួមកម្មវិធីប្រកួតប្រជែងសន្សំសំចៃថាមពលរយៈពេល១ឆ្នាំ។ កម្មវិធីប្រកួតប្រជែងសន្សំសំចៃថាមពលនៅកម្ពុជានេះ បង្កើតឡើងដើម្បីរួមចំណែកដល់ការសន្សំថាមពលឱ្យបានជាអតិបរមា តាមរយៈការផ្លាស់ប្តូរទម្លាប់ និងធ្វើឱ្យមានភាពប្រសើរឡើងទៅលើការប្រើប្រាស់ឧបករណ៍នៅក្នុងអគារនានាជាដើម។
ចុះផ្សាយនៅថ្ងៃ៖
ស្តាប់ - ០២:២៣
គឺនៅថ្ងៃទី០២ ខែធ្នូកន្លងទៅ ស្ថាប័នឯកជន និងសាធារណៈមកពីគ្រប់វិស័យចំនួន ១៥ ដូចជា ធនាគារ ភោជនីយដ្ឋាន អាជីវកម្មលក់រាយ អាកាសយានដ្ឋានកម្ពុជា ក្រុមហ៊ុនសេវាកម្មទូរស័ព្ទ ស្ថានទូតបារាំង និងសភាពាណិជ្ជកម្មអឺរ៉ុបនៅកម្ពុជា បានសម្រេចចូលរួមប្រកួតប្រជែងក្នុងរយៈពេលមួយឆ្នាំ ជាមួយកម្មវិធីប្រកួតប្រជែងសន្សំសំចៃថាមពល ដើម្បីធ្វើការកាត់បន្ថយការបំភាយឧស្ម័នផ្ទះកញ្ចក់នៅកម្ពុជា។
ក្នុងចំណោមបណ្តាស្ថាប័ននិងក្រុមហ៊ុនទាំង១៥ អគារសរុបចំនួន២៣អគារ កំពុងធ្វើការប្រកួតប្រជែងសម្រាប់ការសន្សំថាមពលរយៈពេល១ឆ្នាំចាប់ពីថ្ងៃទី០១ កញ្ញា ឆ្នាំ២០២១ ដល់ថ្ងៃទី០១ ខែកញ្ញា ឆ្នាំ២០២២។
បន្ថែមពីនេះ ការប្រកួតប្រជែងសន្សំសំចៃថាមពលខាងដើម ក៏នឹងចូលរួមយ៉ាងសំខាន់ដល់ការសន្សំថាមពលឱ្យបានជាអតិបរមា ដោយបូករួមទាំងការលើកទឹកចិត្តឱ្យបុគ្គលិកសម្របខ្លួនទៅនឹងទម្លាប់ថ្មីនេះ ក៏ដូចជា បង្កើនការយល់ដឹងទៅលើការប្រើប្រាស់ថាមពលផងដែរ។ ខណៈវាក៏អាចកាត់បន្ថយការចំណាយលើវិក្កយបត្រអគ្គីសនីក្នុងអាគាររបស់ស្ថាប័ន និងក្រុមហ៊ុនទាំងអស់នោះមួយកម្រិតថែមទៀត។
ជុំវិញកម្មវិធីខាងដើមនេះ លោកទិន ពន្លក រដ្ឋលេខាធិការនិងជានាយកនៃកម្មវិធីសម្ព័ន្ធភាពប្រែប្រួលអាកាសធាតុកម្ពុជាបានអះអាងថា ការសន្សំសំចៃថាមពលនៅកម្ពុជា គឺជាអាទិភាពខ្ពស់បំផុតសម្រាប់ផ្តល់អត្ថប្រយោជន៍ដល់សេដ្ឋកិច្ចកម្ពុជា និងការកាត់បន្ថយការបំភាយឧស្ម័នផ្ទះកញ្ចក់។ លោកបន្តថា ការកាត់បន្ថយការប្រើប្រាស់ថាមពល គឺជាការកាត់បន្ថយគ្រោះរបស់ប្រជាជន។
ដោយឡែក លោកស្រី Alissar Chaker តំណាងប្រចាំប្រទេសកម្មវិធីអភិវឌ្ឍន៍សហប្រជាជាតិប្រចាំនៅកម្ពុជាក៏បានឱ្យដឹងដែរថា ការផ្លាស់ប្តូរទម្លាប់ និងផ្នត់គំនិត គឺជារឿងសំខាន់ដើម្បីសម្រេចឱ្យបានច្រើននូវអ្វីដែលមនុស្សគ្រប់គ្នាចង់បាន និងការវិវត្តន៍ឆ្ពោះទៅរកការអភិវឌ្ឍន៍កាបូកម្រិតទាប។
ជាការកត់សម្គាល់ វិស័យអគារ និងសំណង់នៅក្នុងប្រទេសកម្ពុជា បានប្រើប្រាស់ថាមពលជាងពាក់កណ្តាលនៃការប្រើប្រាស់ថាមពលសរុបដែលធ្វើឱ្យវាក្លាយជាវិស័យមួយមានតម្រូវការប្រើប្រាស់ថាមពលច្រើនជាងគេ ហើយនាំមុខលើវិស័យឧស្សាហកម្ម និងការដឹកជញ្ចូន។ ក្នុងនោះ បរិមាណនៃការប្រើប្រាស់ថាមពលនៅក្នុងអគារត្រូវបានប៉ាន់ស្មាន់ថានឹងកើនឡើងទ្វេដងនៅឆ្នាំ២០៤០។
សូមជម្រាបថា កម្មវិធីប្រកួតប្រជែងប្រសិទ្ធភាពថាមពលកម្ពុជា ត្រូវបានបង្កើតឡើងដោយក្រុមហ៊ុនSchneider Electric និងកម្មវិធីសម្ព័ន្ធភាពប្រែប្រួលអាកាសធាតុកម្ពុជា ដែលស្ថិតក្រោមមូលនិធិរបស់សភាពអឺរ៉ុប ប្រទេសស៊ុយអែត និងUNDP ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ