១ឆ្នាំព្រឹត្តិការណ៍២០កុម្ភៈ ៖ កម្ពុជាកត់ត្រាអ្នកស្លាប់ដោយសារកូវីដ១៩ ជាង៣ពាន់នាក់ ខណៈវីរុសនេះនៅបន្តអុកឡុក
ថ្ងៃទី២០កុម្ភៈ២០២១-ថ្ងៃទី២០កុម្ភៈ២០២២ ជាខួបមួយឆ្នាំដែលកម្ពុជាបានប្រកាសពីការឆ្លងជំងឺកូវីដ១៩ចូលទៅក្នុងសហគមន៍ទ្រង់ទ្រាយធំ។ ពេលមួយឆ្នាំមកនេះ កម្ពុជាកត់ត្រាអ្នកឆ្លងមេរោគផ្លូវដង្ហើមមួយនេះ ជាង១០ម៉ឺននាក់ ខណៈអ្នកស្លាប់មានជាង៣ពាន់នាក់។ យ៉ាងណាមិញ មួយឆ្នាំមកនេះ វីរុសកូវីដ១៩ក៏នៅបន្តអុកឡុកសហគមន៍ និងបំប្លែងខ្លួនជាច្រើនប្រភេទ ដែលញ៉ាំងឲ្យរដ្ឋាភិបាលមានក្តីបារម្ភពីបញ្ហាសុខភាពសាធារណៈ។
ចុះផ្សាយនៅថ្ងៃ៖
ស្តាប់ - ០២:០៤
ព្រឹត្តិការណ៍សហគមន៍២០កុម្ភៈ ជាសោកនាដកម្មមួយរបស់កម្ពុជា ដែលចាប់ផ្តើមប្រកាសពីអ្នកស្លាប់ដោយសារតែការឆ្លងជំងឺកូវីដ១៩។ អ្នកស្លាប់ដំបូងនៅថ្ងៃទី១១មីនា ជាអ្នកបើកបររថយន្តឲ្យជនជាតិចិន នៅឯខេត្តព្រះសីហនុ។ នេះបើតាមសេចក្តីប្រកាសព័ត៌មានរបស់ក្រសួងសុខាភិបាល។ ពីពេលនោះមក កម្ពុជាក៏ចាប់ផ្តើមកត់ត្រាអ្នកឆ្លងពីព្រឹត្តិការណ៍មួយនេះ ហើយអ្នកស្លាប់ក៏ចាប់ផ្តើមមានជាហូរហែ។
ពេលមួយឆ្នាំមកនេះ កម្ពុជាបានរកឃើញអ្នកឆ្លងជំងឺវាយលុកសួតនេះ មានរាប់ម៉ឺននាក់ ស្របពេលដែលអ្នកស្លាប់វិញមានចំនួន ៣០១៧នាក់។ នេះបើតាមតួលេខចុងក្រោយរបស់ក្រសួងសុខាភិបាលនៅថ្ងៃអាទិត្យនេះ។
ផ្តើមចេញពីព្រឹត្តិការណ៍នៃសោកនាដកម្មនេះ រដ្ឋាភិបាលកម្ពុជាក៏សម្រេចផ្អាកការជួបជុំធំៗ រហូតឈានដល់ការបិទខ្ទប់រាជធានីភ្នំពេញនិងក្រុងតាខ្មៅមួយរយៈ ដើម្បីទប់ស្កាត់ការឆ្លងបន្ត។ ជាមួយគ្នា រដ្ឋក៏សម្រេចចាប់ផ្តើមយុទ្ធនាការចាក់វ៉ាក់សាំងកូវីដ១៩ដល់ប្រជាពលរដ្ឋនៅទូទាំងប្រទេស។
ទោះយ៉ាងណា ព្រឹត្តិការណ៍សហគមន៍២០កុម្ភៈក៏ត្រូវបានលោកនាយករដ្ឋមន្ត្រីប្រកាសបិទបញ្ចប់ កាលពីថ្ងៃ២០ធ្នូ។ តាមរយៈសារជាសំឡេងជាង១៧នាទី លោក ហ៊ុន សែន បានប្រកាសបិទបញ្ចប់ព្រឹត្តិការណ៍២០កុម្ភៈ ដែលមានអ្នកឆ្លងចំនួន ១២ ៤០២៣នាក់ និងអ្នកស្លាប់ចំនួន៣០០៥នាក់។
ទោះជាបិទបញ្ចប់ព្រឹត្តិការណ៍សហគមន៍២០កុម្ភៈ តែមួយឆ្នាំមកនេះ វីរុសកូវីដ១៩នៅតែបន្តអុកឡុកកម្ពុជាឥតស្រាកស្រាន្ត។ រហូតមកដល់បច្ចុប្បន្ន កម្ពុជានៅតែកត់ត្រាអ្នកឆ្លងជំងឺកូវីដ១៩នៅក្នុងសហគមន៍ដដែល។ ជាពិសេសគឺការរកឃើញវិជ្ជមានកូវីដ១៩ប្រភេទបំប្លែងថ្មី អូមីក្រុង ដែលជាក្តីបារម្ភរបស់ក្រសួងសុខាភិបាល។
នៅចំពោះមុខស្ថានការណ៍យ៉ាងនេះ លោកស្រី ឱ វណ្ណឌីន អ្នកនាំពាក្យក្រសួងសុខាភិបាលបន្តទទូចឲ្យប្រជាពលរដ្ឋចូលរួមអនុវត្តវិធានការសុខាភិបាល និងការចាក់វ៉ាក់សាំងដូសជំរុញ។ អ្នកនាំពាក្យក្រសួងសុខាភិបាលរូបនេះ ព្រមានថា តួលេខអ្នកឆ្លងប្រចាំថ្ងៃអាចឈានរហូតដល់រាប់ពាន់នាក់ ប្រសិនបើពលរដ្ឋមានការធ្វេសប្រហែស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ