រដ្ឋសភាកម្ពុជា៖សេចក្តីសម្រេចសភាអ៊ឺរ៉ុបឱ្យត្រៀមដកEBAពីកម្ពុជា គឺលំអៀងនិងខ្វះការគោរព
រដ្ឋសភាកម្ពុជា នៅថ្ងៃចន្ទម្សិលមិញនេះ បានចេញសេចក្តីថ្លែងការណ៍ច្រានចោលសេចក្តីសម្រេចរបស់សភាអ៊ឺរ៉ុបដែលស្នើឱ្យត្រៀមដកប្រព័ន្ធអនុគ្រោះពន្ធ EBA ចោលទាំងស្រុងពីកម្ពុជា ដោយការប្រើប្រាស់លិទ្ធិប្រជាធិបតេយ្យខុសទំនង ជាលេស។ បើតាមរដ្ឋសភាកម្ពុជា សេចក្តីសម្រេចរបស់សភាអ៊ឺរ៉ុបនោះ គឺជាការបំផ្លៃ ការលំអៀង និងការខ្វះការគោរពដល់រដ្ឋអធិបតេយ្យកម្ពុជា។
ចុះផ្សាយនៅថ្ងៃ៖
ស្តាប់ - ០២:៣៨
នៅក្នុងសេចក្តីថ្លែងការណ៍នៅថ្ងៃទី៩ឧសភា រដ្ឋសភាកម្ពុជាចង្អុលអោយឃើញថា កម្ពុជាជារដ្ឋឯករាជ្យ ដែលត្រូវទទួលអធិបតេយ្យភាពនិងមានសិទ្ធិសម្រេច ដោយមិនអាចទទួលការរំលោភបំពានពីនរណាបានឡើយ។ និងថា សេចក្តីសម្រេចរបស់សភាអ៊ឺរ៉ុប ស្តីពី «ការបង្ក្រាបជាបន្តបន្ទាប់ទៅលើក្រុមអ្នកនយោបាយប្រឆាំងនៅកម្ពុជា» គឺជាការបំផ្លៃ ការលំអៀង និងការខ្វះការគោរពដល់រដ្ឋអធិបតេយ្យរបស់កម្ពុជា។
ប្រតិកម្មររបស់រដ្ឋសភាកម្ពុជានេះធ្វើឡើង បន្ទាប់ពីសភាអ៊ឺរ៉ុបបានចេញញត្តិចង្អុលទុកមុនថា ការបោះឆ្នោតទាំងថ្នាក់ក្រោមជាតិនិងថ្នាក់ជាតិរបស់កម្ពុជានាពេលដ៏ឆាប់ខាងមុខនេះ ត្រូវតែយុត្តិធម៌និងតម្លាភាព មិនដូច្នោះទេ កម្ពុជានឹងប្រឈមបាត់បង់ប្រព័ន្ធអនុគ្រោះពន្ធ EBA សេសសល់ទាំង ៨០%ទៀត ជាមិនខាន។ គួររំព្ញកថា ក្រោមរូបភាពនៃការរំលោភសិទ្ធិមនុស្សធ្ងន់ធ្ងរជាប្រព័ន្ធនិងការធ្លាក់ចុះលទ្ធិប្រជាធិបតេយ្យ សហភាពអឺរ៉ុបបានសម្រេចកាត់ផ្តាច់ EBA ពីកម្ពុជា ចំនួន២០% កាលពីឆ្នាំ២០២០ ម្តងរួចហើយ។
ញត្តិថ្មីរបស់សភាអ៊ឺរ៉ុបលើកនេះបានរំឭកឡើងវិញដែរ ពីការរំលាយគណបក្សសង្គ្រោះជាតិកាលពីឆ្នាំ២០១៧ និងការចាប់ខ្លួនលោក កឹម សុខា។ ការចាប់ខ្លួនសកម្មជននយោបាយ និងសកម្មសិទ្ធិមនុស្ស គឺជាអ្វីដែលសភាអឺរ៉ុបចាត់ទុកថា ជាផ្នែកដ៍សំខាន់ដែលប៉ះពាល់ដល់ដំណើរការបោះឆ្នោតនៅកម្ពុជា។
ចំពោះរដ្ឋសភាកម្ពុជា ការកំណត់និយមន័យរបស់សភាអ៊ឺរ៉ុប ដែលថាលទ្ធិប្រជាធិបតេយ្យនិងសិទ្ធិមនុស្ស ត្រូវតែមានការចូលរួមពីបក្សឆ្វេងនិយម ឬត្រូវតែមានការអនុញ្ញាតិឱ្យគណបក្សនយោបាយដែលបានរំលាយដោយតុលាររស់ឡើងវិញ គឺជារឿងមិនសមហេតុផលសោះ ចំពោះច្បាប់ជាតិនិងគោលការណ៍ប្រជាធិបតេយ្យរបស់កម្ពុជា។
យ៉ាងណាមិញ រដ្ឋសភាកម្ពុជាបានអះអាងថា ដំណើរការបោះឆ្នោតនៅកម្ពុជា ទាំងថ្នាក់ក្រោមជាតិនិងថ្នាក់ជាតិនាពេលខាងមុខនេះ នឹងប្រព្រឹត្តិទៅដោយសេរី ត្រឹមត្រូវយុត្តិធម៌ និងតម្លាភាពទៅតាមគោលការណ៍បោះឆ្នោតបែបប្រជាធិបតេយ្យនិងគោលនយោបាយពហុបក្ស។
សូមជម្រាបថា នៅក្នុងបទអន្តរាគមន៍ស្តីពីកម្ពុជា នៅសភាអឺរ៉ុប កាលពីសប្តាហ៍មុននោះ លោក Thierry MARIANI សមាជិកសភាអឺរ៉ុបរបស់បារាំង បានអំពាវនាវឱ្យសហភាពអឺរ៉ុប លើកទឹកចិត្តកម្ពុជា ក្នុងកិច្ចអភិវឌ្ឍន៍ប្រទេស ជាជាងអនុវត្តគោលនយោបាយស្តង់ដារពីរ ប្រឆាំងនឹងកម្ពុជា។ និងដោយបន្តថា ការគោរពសិទ្ធិមនុស្សនៅកម្ពុជា មិនមែនល្អឥតខ្ចោះ ប៉ុន្តែកំណែទម្រង់គឺកំពុងបន្តនៅលើផ្លូវត្រូវ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ