កញ្ញាឈឹម ស៊ីថរ៖ ការតវ៉ារបស់បុគ្គលិកណាហ្គាមិនមានការរារាំង តែនៅបន្តរងនូវអំពើហិង្សា
ប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៏ បានបញ្ជាក់ថា ការចេញតវ៉ារបស់បុគ្គលិកនៃក្រុមហ៊ុនណាហ្គាវើលដ៍ប៉ុន្មានថ្ងៃមកនេះ អាជ្ញាធរពុំមានការរារាំងឡើយ តែសន្តិសុខក្រុមហ៊ុន និងអាជ្ញាធរនៅតែបន្តការប្រើហិង្សាលើអ្នកតវ៉ាដដែល។ នេះជាការកត់សំគាល់របស់ កញ្ញា ឈឹម ស៊ីថរ។
ចុះផ្សាយនៅថ្ងៃ៖
ស្តាប់ - ០២:១១
ក្រុមអតីតបុគ្គលិកនៃក្រុមហ៊ុនណាហ្គាវើលដ៍ នៅតែបន្តចេញតវ៉ាទាមទារលក្ខខណ្ឌការងារពីក្រុមហ៊ុនណាហ្គាវើលដ៍ដដែល ដើម្បីឱ្យមានដំណោះស្រាយបន្ទាប់ពីបញ្ឈប់ពួកគេក្រោមហេតុផលវិបត្តិជំងឺកូវីដ១៩។ ជាការកត់សម្គាល់កន្លងមកគេសង្កេតឃើញថា នៅពេលកម្មករចេញតវ៉ាទាមទារលក្ខខណ្ឌការងារពីក្រុមហ៊ុនណាហ្គាវើលដ៍ម្ដងៗ តែងត្រូវបានអាជ្ញាធររារាំងនិងរុញច្រានគ្នាទៅវិញទៅមករហូតមានអំពើហិង្សាកើតឡើងលើគ្នា។ ក៏ប៉ុន្តែចាប់តាំងពីមានដំណើរទស្សនកិច្ចរយៈពេល១១ថ្ងៃមកកម្ពុជា របស់អ្នករាយការណ៍ពិសេសអង្គការសហប្រជាជាតិទទួលបន្ទុកស្ថានភាពសិទ្ធិមនុស្សនៅកម្ពុជា រាល់ការតវ៉ារបស់កម្មករណាហ្គាវើលដ៍លែងមានការរារាំងពីសំណាក់អាជ្ញាធរទៀតទេ។
ទោះបីជាគ្មានការរារាំងពីសំណាក់អាជ្ញាធរទៅលើអ្នកតវ៉ាប៉ុន្មានថ្ងៃកន្លងមកនេះក៏ពិតមែន តែកញ្ញា ឈឹម ស៊ីថរ ប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៏ បានបញ្ជាក់ប្រាប់វិទ្យុបារាំង RFI ថាកម្មករនៅតែទទួលរងនូវអំពើហិង្សាដដែល។ កញ្ញាបានចោទក្រុមអាជ្ញាធរនិងសន្តិសុខក្រុមហ៊ុនណាហ្គាវើលដ៍ដែលស្លៀកពាក់ស៊ីវិលបានបន្លំខ្លួនចូលក្នុងក្រុមអ្នកតវ៉ា ហើយបានទះកំភ្លៀងកម្មករដែលជាស្រ្តីដែលបាននិងកំពុងតវ៉ានៅទីនោះតែម្ដង។
ឆ្លើយតបនូវការលើកឡើងខាងលើនេះ អ្នកនាំពាក្យរដ្ឋបាលរាជធានីភ្នំពេញ លោក ម៉េត មាសភក្ដី បានបដិសេធថា គ្មានការប្រើប្រាស់ហិង្សាលើកកម្មករណាហ្គាវើលដ៍ដែលចេញតវ៉ានោះទេ ហើយបើមានករណីប្រើហិង្សាណាមែន លោកបានជំរុញឱ្យអ្នកតវ៉ាប្ដឹងទៅអាជ្ញាធរមានសមត្ថកិច្ចដើម្បីអនុវត្តច្បាប់ទៅលើជនដែលបានប្រព្រឹត្ត ឱ្យតែមានភស្តុតាងច្បាស់លាស់ ជាជាងគ្រាន់តែលើកឡើង និងចោទប្រកាន់ ។
សូមបញ្ជាក់ថា កន្លងមកនៅពេលបុគ្គលិកក្រុមហ៊ុនណាហ្គាវើលដ៍ចេញតវ៉ាទាមទារលក្ខខណ្ឌការងារពីក្រុមហ៊ុនណាហ្គាវើលដ៍ម្ដងៗ តែងត្រូវបានអាជ្ញាធររារាំង និងបានចាត់ទុកការតវ៉ានោះជាការតវ៉ាខុសច្បាប់ទៀត។ ក៏ប៉ន្តែសម្រាប់ភាគីកម្មករដែលចេញតវ៉ាវិញ ថាការតវ៉ារបស់ពួកគេគឺស្របទៅតាមច្បាប់ដែលមានចែងក្នុងរដ្ឋធម្មនុញផ្ទុយពីការលើករបស់អាជ្ញាធរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ