សហជីពជំរុញឲ្យអាជ្ញាធរសុំទោសជាសាធារណៈចំពោះករណីវិវាទការងារនៅណាហ្គាវើលដ៍
បន្ទាប់ពីតឹងសរសៃកដាក់គ្នា នៅទីបំផុត អាជ្ញារាជធានីភ្នំពេញបានព្រមបើកផ្លូវឲ្យសកម្មជនសហជីពដែលភាគច្រើនជាស្ត្រីដើរទៅដាក់ញត្តិនៅទីស្តីគណៈរដ្ឋមន្ត្រីនៅថ្ងៃអាទិត្យនេះ។ ជាការដាក់ញត្តិជំរុញឲ្យមានដំណោះស្រាយវិវាទការងារនៅក្រុមហ៊ុនណាហ្គាវើលដ៍ដែលអូសបន្លាយជិតមួយឆ្នាំមកនេះ។ ប៉ុន្តែមុននឹងទទួលបានជោគជ័យក្នុងការដាក់ញត្តិនេះ ក្រុមអ្នកតវ៉ាបានប៉ះទង្គិចគ្នាផងដែរជាមួយក្រុមសមត្ថកិច្ច ខណៈសហជីពជំរុញឲ្យអាជ្ញាធរសុំទោសជាសាធារណៈចំពោះករណីវិវាទការងារដ៏រាំរ៉ៃមួយនេះ។
ចុះផ្សាយនៅថ្ងៃ៖
ស្តាប់ - ០២:៣៣
ការតវ៉ាបានឈានដល់តឹងសរសៃកដាក់គ្នាពីសំណាក់ក្រុមសកម្មជនសហជីពដែលភាគច្រើនជាស្ត្រី ខណៈដែលមន្ត្រីក្រសួងការងារមានការយឺតយ៉ាវចេញមកទទួលញត្តិរបស់ពួកគេ។ ដោយសារតែថ្ងៃអាទិត្យ មន្ត្រីក្រសួងការងារបានចេញមុខមកទទួលញត្តិនៅពេលដែលពួកគេដើរផុតពីមុខក្រសួងការងារទៅហើយ ក្នុងបំណងសំដៅទៅផ្ទះលោកនាយករដ្ឋមន្ត្រី ហ៊ុន សែន។ ប៉ុន្តែការធ្វើដំណើរដោយថ្មើជើងនេះត្រូវបានបន្ទុចបង្អា្កក់ ដោយក្រុមសន្តិសុខ ខណ្ឌទួលគោក នៅចំណុចស្ពានអាកាសតិចណូ ដែលមិនឆ្ងាយប៉ុន្មានពីក្រសួងការងារ។
អភិបាលខណ្ឌទួលគោក លោក ជា ពិសី ដែលទើបឡើងកាន់តំណែងថ្មីបានចេញមុខសម្របសម្រួលជាមួយនឹងមន្ត្រីម្នាក់របស់ក្រសួងការងារ ដែលថាមកទទួលញត្តិពីក្រុមសកម្មជនសហជីព។ ប៉ុន្តែក្រុមអ្នកតវ៉ាបានទាមទារឲ្យមន្ត្រីរដ្ឋចេញមុខសុំទោសជាសាធារណៈ ចំពោះការយឺតយ៉ាវនៃដំណោះស្រាយវិវាទការងារនៅក្រុមហ៊ុនណាហ្គាវើលដ៍ប្រមាណជិត១ឆ្នាំមកនេះ។
ប៉ុន្មាននាទីក្រោយមក អភិបាលរងរាជធានីភ្នំពេញ លោក មាន ច័ន្ទយ៉ាដា បានចេញមុខសម្របសម្រួលនៅនាទីចុងក្រោយបន្ទាប់ពីក្រុមកំលាំងសមត្ថកិច្ច បានរុញច្រានគ្នា ដោយហិង្សា ជាមួយក្រុមស្ត្រីជាអ្នកតវ៉ា។ក្រោយជជែកគ្នាមួយសន្ទុះ លោក មាន ច័ន្ទយ៉ាដា បានយល់ព្រមឲ្យសកម្មជនទាំងនោះដើរទៅដាក់ញត្តិនៅទីស្តីគណៈរដ្ឋមន្ត្រី ហើយនៅទីនោះលោកអភិបាលរងរូបនេះ ក៏បានចេញមុខទទួលញត្តិ ខណៈថ្ងៃអាទិត្យ ទីស្តីការគណៈរដ្ឋមន្ត្រីបិទទ្វាររបង។
គួរឲ្យដឹងថា ថ្នាក់ដឹកនាំសហជីព និងកម្មករដែលធ្វើការក្នុងវិស័យការងារ នៅកម្ពុជារាប់រយនាក់ ពិសេសក្រុមបុគ្គលិកដែលបានបញ្ឈប់ក្រុមហ៊ុនកាស៊ីណាហ្គាវើលដ៍ ពួកគេបានប្រមូលផ្ដុំគ្នានៅមុខក្រសួងការងារ តាំងពីមុនម៉ោង៩ព្រឹក ថ្ងៃអាទិត្យ ក្នុងគោលបំណងស្នើដោះស្រាយបញ្ចប់វិវាទការងារ។ ពួកគេ ទទួចឲ្យទទួលយកថ្នាក់ដឹកនាំ និងសមាជិកសហជីពប្រមាណ១៥០នាក់ចូលធ្វើការវិញជាមួយប្រាក់សំណងឱ្យបានត្រឹមត្រូវតាមច្បាប់ស្ដីពីការងារ ព្រមទាំងទម្លាក់បទចោទមកលើថ្នាក់ដឹកនាំសហជីពទាំង១៥រូប។ ជាមួយគ្នានេះពួកគេក៏បានស្នើសុំដោះស្រាយសំណុំរឿងបញ្ឈប់ថ្នាក់ដឹកនាំ និងសកម្មជនសហជីពសរុបចំនួន ៣១ករណីផ្សេងទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ