ភ្ជុំបិណ្ឌ៖ ពលរដ្ឋជាង៥ពាន់នាក់ធ្វើដំណើរតាមរថយន្តក្រុងសាធារណៈឥតគិតថ្លៃ នៅព្រឹកទី១ថ្ងៃដំណើរការ
នៅព្រឹកព្រហាមស្រាងៗថ្ងៃទី២៣កញ្ញានេះ រថយន្តក្រុងសាធារណៈចំនួន ១៧៥គ្រឿង បានដាក់បញ្ឈរនៅតាមដងផ្លូវត្រៀមដឹកជញ្ជូនប្រជាពលរដ្ឋក្នុងពិធីបុណ្យភ្ជុំនេះ ដោយមិនយកកម្រៃ។ នៅព្រឹកថ្ងៃទី១នៃដំណើរការសេវា មានពលរដ្ឋជិត ៥៦០០នាក់ធ្វើដំណើរចេញពីភ្នំពេញទៅតាមបណ្តាខេត្ត ខណៈលោកនាយករដ្ឋមន្ត្រី ហ៊ុន សែន នៅព្រឹកនេះដែរ បានអំពាវនាវឱ្យរថយន្តឈ្នួលរក្សាកុំតម្លើងតម្លៃដឹកជញ្ជូន ក្នុងឱកាសពិធីបុណ្យភ្ជុំបិណ្ឌនេះ។
ចុះផ្សាយនៅថ្ងៃ៖
ស្តាប់ - ០៣:០៨
មិនខុសពីសព្វមួយដង ប្រជាពលរដ្ឋរស់នៅទីក្រុងភ្នំពេញ អ្នកឃ្លាតឆ្ងាយស្រុកកំណើតមកប្រកបការងារផ្សេងៗក្នុងទីក្រុង ត្រូវចាកចេញពីទីក្រុងវិលទៅស្រុកកំណើតរៀងៗខ្លួន ដើម្បីចូលរួមពិធីបុណ្យភ្ជុំបិណ្ឌ។ ជាឱកាសធ្វើបុណ្យ ជួបជុំគ្នាក្នុងសង្គមគ្រួសារ និងដំណើរកម្សាន្តសប្បាយរីករាយ។
សម្រាប់ឱកាសបុណ្យភ្ជុំបិណ្ឌនេះ រថក្រុងចំនួន១៧៥គ្រឿង កំពុងត្រៀមបម្រើសេវាដឹកជញ្ជូនសារធារណៈ ដោយឥតគិតថ្លៃ រយៈពេល៥ថ្ងៃ ចាប់ពីថ្ងៃទី២៣ ខែកញ្ញា ឆ្នាំ២០២២ ដោយរថយន្ត ១២០គ្រឿងសម្រាប់ដឹកពលរដ្ឋពីភ្នំពេញទៅតាមបណ្តាខេត្ត (កណ្តាល ព្រៃវែង ស្វាយរៀង តាកែវ កំពត កែប កំពង់ស្ពឺ ព្រះសីហនុ កំពង់ឆ្នាំង ពោធិ៍សាត់ បាត់ដំបង បន្ទាយមានជ័យ កំពង់ធំ សៀមរាប កំពង់ចាម ត្បូងឃ្មុំ ក្រចេះ និងស្ទឹងត្រែង)។ ចំណែកជាង ៥០គ្រឿងទៀតសម្រាប់ដឹកជញ្ជូនពលរដ្ឋក្នុងក្រុងភ្នំពេញ។
លោក ឃួង ស្រេង អភិបាលក្រុងភ្នំពេញ បានប្រាប់វិទ្យុបារាំងអន្តរជាតិនៅព្រឹកថ្ងៃទី២៣កញ្ញានេះថា មានពលរដ្ឋ ក្មេងចាស់ ប្រុសស្រីចំនួន ៥៩២៣នាក់ បានមកប្រើប្រាស់សេវាដឹកជញ្ជូនពលរដ្ឋតាមរថយន្តក្រុងឥតគិតថ្លៃ គិតត្រឹមព្រឹកថ្ងៃទី១នៃដំណើរការ ក្នុងឱកាសពិសេសនេះ។
ទន្ទឹមគ្នានេះដែរ លោកអភិបាលក្រុងបានអះអាងពីការណែនាំដល់ថៅកុងឡានក្រុងសាធារណៈទាំងអស់ឱ្យមានសុជីវធម៌ មិនត្រូវទារប្រាក់ពីប្រជាពលរដ្ឋ ត្រូវគោរពប្រតិបត្តិច្បាប់ និងត្រូវមានការទទួលខុសត្រូវខ្ពស់ចំពោះសុខសុវត្ថិភាពរបស់ប្រជាពលរដ្ឋនៅលើរថយន្តក្រុងសាធារណៈនេះ។
លោក ឃួង ស្រេង អភិបាលក្រុងភ្នំពេញអំពាវនាវដល់ពលរដ្ឋ ដែលជិះរថយន្តក្រុងសាធារណៈខាងលើ ធ្វើការរាយការណ៍មករដ្ឋបាលរាជធានីភ្នំពេញ ប្រសិនបើពួកគេត្រូវបានគេទារប្រាក់សេវា ឬជួបបញ្ហាទាស់ចិត្តណាមួយ។
លោកនាយករដ្ឋមន្ត្រី ហ៊ុន សែន នៅព្រឹកថ្ងៃទី២៣ ខែកញ្ញានេះដែរ ក៏បានអំពាវនាវឱ្យប្រជាពលរដ្ឋធ្វើដំណើរតាមរថយន្តក្រុងសាធារណៈ ដោយឥតគិតថ្លៃ ដើម្បីជាការសម្រួលបន្ទុកចំណាយការធ្វើដំណើរក្នុងឱកាសភ្ជុំបិណ្ឌនេះ។
ជាការកត់សម្គាល់ នៅរាល់ពេលមានបុណ្យទានសំខាន់ៗនៅស្រុកខ្មែរ រថយន្តឈ្នួលតាក់ស៊ីឆ្លៀតឱកាសដំឡើងថ្លៃសេវាខុសទំនង ដោយលើកហេតុផលពីតម្លៃប្រេងស៊ាំងជាដើម ដែលបណ្តាលឱ្យមានការរិះគន់យ៉ាងខ្លាំងពីពលរដ្ឋ។ ឆ្លៀតក្នុងឱកាសនេះ លោកនាយករដ្ឋមន្ត្រី ហ៊ុន សែន បានបន្តអំពាវនាវឱ្យរថយន្តឈ្នួលរក្សាកុំតម្លើងតម្លៃដឹកជញ្ជូន ដោយរក្សាតម្លៃដដែល ក្នុងឱកាសពិធីបុណ្យភ្ជុំបិណ្ឌនេះ។
ចំណែក លោក ឃួង ស្រេង អភិបាលក្រុងបានលើកឡើងថា សាលាក្រុងតែងតែបានធ្វើការណែនាំកុំឱ្យដំឡើងតម្លៃសេវារថយន្តឈ្នួលជាច្រើនលើក ប៉ុន្តែមិនមែនជាការហាមឃាត់ដាក់កម្រិតឡើយ ព្រោះកម្ពុជាជាប្រទេសទីផ្សារសេរី។
គួរជម្រាបថា ក្រៅពីសេវាដឹកជញ្ជូនទាំងផ្លូវថ្នល់ រដ្ឋាភិបាលកម្ពុជាក៏បានសម្រេចដាក់សេវាដឹកជញ្ជូនតាមផ្លូវរថភ្លើង ដោយឥតគិតថ្លៃ រយៈពេល៤ថ្ងៃ ពីថ្ងៃទី២៣ដល់ថ្ងៃទី២៦កញ្ញា ចំនួន២ខ្សែរផងដែរ (គោលដៅខ្សែទី១ គឺភ្នំពេញទៅកាន់ខេត្តកំពង់ឆ្នាំង ពោធិ៍សាត់ និងបាត់ដំបង។ រីឯគោលដៅខ្សែទី២ គឺភ្នំពេញទៅកាន់ខេត្តតាកែវ កំពត និងព្រះសីហនុ)៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ