កម្ពុជាផ្តល់អង្ករ៦ពាន់តោនទៅគុយបា ខណៈប្រទេសនេះប្រឈមនឹងវិបត្តិស្បៀង
កម្ពុជាបានប្រកាសផ្តល់អំណោយអង្ករចំនួន ៦ពាន់តោនទៅដល់គុយបា ខណៈប្រទេសលើកោះមួយនេះកំពុងប្រឈមនឹងវិបត្តិស្បៀងដោយសារតែកូវីដ១៩ និងការដាក់ទណ្ឌកម្មពីសហរដ្ឋអាមេរិក។ ការប្រកាសផ្តល់ជំនួយនេះ គឺនៅក្នុងដំណើរទស្សនកិច្ចរបស់លោកនាយករដ្ឋមន្ត្រី ហ៊ុន សែន ទៅកាន់ប្រទេសគុយបាលើកទី២ ដែលត្រូវបានលោក ហ៊ុន សែន គូសបញ្ជាក់ថា ទំនាក់ទំនងកម្ពុជា និងគុយបារយៈពេលជាង៦០ឆ្នាំមកនេះ មានស្ថេរភាព ពិសេសនយោបាយ។
ចុះផ្សាយនៅថ្ងៃ៖
ស្តាប់ - ០៣:០៣
នៅថ្ងៃទី២៥ ខែកញ្ញា ឆ្នាំ២០២២ តាមរយៈទំព័រហ្វេសប៊ុករបស់លោកនាយករដ្ឋមន្ត្រី ហ៊ុន សែន ដែលកំពុងមានវត្តមាននៅប្រទេសគុយបា បានប្រកាសផ្តល់អំណោយអង្ករចំនួន ៦ពាន់តោនទៅដល់រដ្ឋាភិបាលគុយបា។ អង្ករចំនួន៦ពាន់តោននោះ គឺ៣ពាន់តោនជាជំនួយរបស់រដ្ឋាភិបាលកម្ពុជា ហើយ៣ពាន់តោនទៀតជាជំនួយរបស់វិស័យឯកជន។ តាមការគ្រោងទុក អង្ករ៦ពាន់តោន នឹងត្រូវដឹកចេញពីកម្ពុជានៅខែតុលា និងត្រូវដឹកដល់ប្រទេសគុយបានៅក្នុងខែធ្នូ។
ទន្ទឹមគ្នានេះដែរ ប្រមុខដឹកនាំកម្ពុជានិងប្រមុខដឹកនាំគុយបា ក៏បានលើកឡើងពីលទ្ធភាពពីការរៀបចំឱ្យមានទស្សនកិច្ចរបស់ក្រុមអ្នកបច្ចេកទេសផ្នែកកសិកម្ម ដើម្បីសិក្សាស្រាវជ្រាវផ្នែកកសិកម្មនៅក្នុងប្រទេសកម្ពុជា ជាពិសេសលើដំណាំស្រូវ ដែលកម្ពុជាជាអ្នករ៉ាប់រងរាល់ការចំណាយលើការសិក្សាស្រាវជ្រាវនេះ។ ជាការសិក្សាស្រាវជ្រាវលើវិស័យកសិកម្ម ដែលលោក ហ៊ុន សែន ចាត់ទុកថា ជាចំណែកមួយសម្រាប់ធានាដល់សន្តិសុខស្បៀងរវាងកម្ពុជា និងប្រទេសគុយបា។
ការប្រកាសបែបនេះធ្វើឡើង អំឡុងដំណើរទស្សនកិច្ចផ្លូវការលើកទី២ នៅប្រទេសគុយបា ដែលលើកទី១ធ្វើឡើងកាលពីឆ្នាំ១៩៩៥។ ដំណើរទស្សនកិច្ចលើកទី២នេះធ្វើឡើង ចាប់ពីថ្ងៃទី២៣-២៥ ខែកញ្ញា ដោយលោកនាយករដ្ឋមន្ត្រី ហ៊ុន សែន បានជួបជាមួយលោក អេស្តេបាន ឡាហ្សូ ហឺណាន់ដេស ប្រធានសភាអំណាចប្រជាជនគុយបា និងលោក មីហ្គេល ឌីយ៉ាស-កាណែល បឺមូដេស ប្រធានាធិបតីគុយបា ដែលបានពិភាក្សាអំពីមធ្យោបាយ ដើម្បីបន្តពង្រឹងចំណងមិត្តភាពរវាងកម្ពុជានិងគុយបា និងពង្រីកកិច្ចសហប្រតិបត្តិការក្នុងវិស័យផ្សេងៗ។
ចំពោះលោក ហ៊ុន សែន រយៈពេល៦២ឆ្នាំ ទំនាក់ទំនងកម្ពុជានិងគុយបា មានលក្ខណៈស្ថេរភាព ជាពិសេសនយោបាយ ត្បិតតែមានការផ្លាស់ប្ដូរច្រើនមែន។ រដ្ឋសភាគុយបា បានអះអាងរក្សាទំនាក់ទំនងជាមួយកម្ពុជា ក្នុងក្របខ័ណ្ឌចលនាមិនចូលបក្សសម្ព័ន្ធ។ ច្បាប់ដែលបានដាក់ចេញដោយសភាគុយបា គឺមាន៣០ច្បាប់ រួមទាំងច្បាប់ដទៃទៀតមានចំនួន៦០ឯណោះ ដែលអះអាងថាជាការដើរតួនាទីសំខាន់ក្នុងការគាំទ្ររដ្ឋាភិបាលគុយបា។
គួរជម្រាបថា ប្រទេសគុយបា ជាប្រទេសដ៏ក្រីក្រមួយ ធ្លាប់ជួបបញ្ហាប្រឈមដូចជាការដាក់ទណ្ឌកម្មផ្នែកសេដ្ឋកិច្ចពីសហរដ្ឋអាមេរិក ដែលគុយបាចាត់ទុកការដាក់ទណ្ឌកម្មនោះថាបានផ្ដល់ការលំបាកចំពោះការអភិវឌ្ឍន៍ប្រទេសជាតិ និងជាការរំលោភជាប្រព័ន្ធចំពោះសិទ្ធិមនុស្ស ដែលប្រឆាំងនឹងប្រជាពលរដ្ឋគុយបាផងដែរ។
នៅគុយបា ជារឿយៗពលរដ្ឋតែងចុះផ្លូវធ្វើបាតុកម្មប្រឆាំងនឹងរដ្ឋអំណាច។ ស្រែកត្អូញត្អែពីការលំបាកក្រោមការដឹកនាំរបស់រដ្ឋអំណាចបច្ចុប្បន្ន។ បាតុករខ្លះស្រែកត្អូញពីភាពក្រខ្សត់ អត់ឃ្លាន និងថែមស្រែកចោទប្រកាន់រដ្ឋាភិបាលថា ផ្តាច់ការ ហើយនិងទាមទារអ្នកដឹកនាំចុះចេញពីអំណាចជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ