បណ្តឹងរបស់លោក ហ៊ុន សែន ប្រឆាំងលោក សម រង្ស៊ី៖ សាលក្រមតុលាការបារាំងបង្ហាញថាគ្មានអ្នកឈ្នះគ្មានអ្នកចាញ់
តុលាការប្រទេសបារាំងបានចេញសាលក្រមកាលពីម្សិលមិញលើសំណុំរឿងដែល លោក ហ៊ុន សែន ប្តឹង លោក សម រង្សី ពីបទ«បរិហាកេរ្ត៍» ករណីស្លាប់លោក ហុក ឡង់ឌី។ នៅទីបំផុតតុលាការក្រុងប៉ារីសមិនបានសម្រេចឲ្យភាគីណាជាអ្នកឈ្នះ និងភាគីណាជាអ្នកចាញ់ក្តីនោះឡើយ។ ប៉ុន្តែខ្លឹមសាររួមនៃសាលក្រម១៣ទំព័រនេះបង្ហាញថា តុលាការបារាំងមិនបានចោទប្រកាន់លោក សម រង្ស៊ី ពីបទ«បរិហាកេរ្ត៍»ទេ ដោយចាត់ទុកថា នេះជាសេរីភាពបញ្ចេញមតិ។ ប៉ុន្តែតុលាការដដែលនេះ បានគូសបញ្ជាក់ថា លោក សម រង្ស៊ី ក៏គ្មានភស្តុតាងបង្ហាញថា លោក ហ៊ុន សែន ជាអ្នកនៅក្រោយការស្លាប់របស់លោក ហុក ឡង់ឌី នោះដែរ។
ចុះផ្សាយនៅថ្ងៃ៖
ស្តាប់ - ០២:៤៣
ទោះជាខ្លឹមសារនៃសាលក្រមរបស់តុលាការបារាំងមិនសម្រេចឲ្យភាគីណាឈ្នះ និងភាគីណាចាញ់ក៏ដោយ តែសម្រាប់ លោក ហ៊ុន សែន ជាដើមបណ្តឹងបានគូសបញ្ជាក់ថា អ្វីដែលលោកចង់បានគឺដូចនឹងការសម្រេចរបស់តុលាការបារាំង។ តុលាការដែលសម្រេចថា លោក សម រង្ស៊ី ក៏គ្មានភស្តុតាងបង្ហាញថា លោក ហ៊ុន សែន ជាអ្នកនៅក្រោយការស្លាប់របស់លោក ហុក ឡង់ឌី នោះទេ។
ថ្លែងនៅចំពោះមុខនិស្សិតរាប់ពាន់នាក់នៅថ្ងៃទី១១តុលា លោកនាយករដ្ឋមន្ត្រី ហ៊ុន សែន ចាត់ទុកការសម្រេចនេះថាបានផ្តល់យុត្តិធម៌សម្រាប់រូបលោក ដែលប្រៀបធៀបថាលោកតាមវាយលោក សម រង្ស៊ី ដល់ផ្ទះ។ បើទោះជាតុលាការបារាំងមិនពិន័យប្រាក់ លោក សម រង្ស៊ី ចំនួន១អឺរ៉ូក៏ដោយ ក៏លោក ហ៊ុន សែន បញ្ជាក់ថាលោកមិនប្តឹងទៅឧទ្ធរណ៍ឡើយ ហើយប្រកាសថា បើលោក សម រង្ស៊ី នៅចង់បន្តលោកនឹងកំដរដល់ចប់។
យោងតាមខ្លឹមសារនៃសាលក្រម តុលាការក្រុងប៉ារីស ថ្ងៃទី១០តុលា មិនបានសម្រេចឲ្យភាគីណាជាអ្នកឈ្នះ និងភាគីណាជាអ្នកចាញ់ក្តីនោះឡើយរវាងអ្នកនយោបាយជើងចាស់ទាំងពីរនេះ។ ប៉ុន្តែខ្លឹមសាររួមនៃការសាលក្រមនេះបង្ហាញថា តុលាការបារាំងមិនបានចោទប្រកាន់ លោក សម រង្ស៊ី ពីបទ«បរិហាកេរ្ត៍»ទេ ដោយចាត់ទុកថា នេះជាសេរីភាពបញ្ចេញមតិ។ នេះបើយោងតាមមេធាវី លោក សម រង្ស៊ី ដែលបង្ហាញក្តីរំភើបក្រៃលែង។
តាមរយៈការប្រកាសនេះ មេធាវីរបស់ លោក សម រង្ស៊ី ថាកូនក្តីខ្លួនគ្មានទោសកំហុសអ្វីទេ ហើយតុលាការបារាំង ទទួលស្គាល់ជាឱឡារឹក ថាការតស៊ូរបស់ អ្នកនយោបាយប្រឆាំងរូបនេះ ជាការតស៊ូត្រឹមត្រូវ ហើយតុលាការក៏បានការពារសិទ្ធិសម្តែងមតិរបស់គាត់។
បើតាម លោក សម រង្ស៊ី សេចក្តីសម្រេចរបស់តុលាការបារាំង មិនមែនគ្រាន់តែជាជ័យជំនះផ្ទាល់ខ្លួនមួយទេ តែជាការនាំមកផងដែរ នូវសេចក្តីសង្ឃឹម ដល់អ្នកការពារសេរីភាព និងយុត្តិធម៌ នៅប្រទេសកម្ពុជា និងប្រទេសដទៃទៀត។
សូមបញ្ជាក់ថា លោក ហ៊ុន សែន និងកូនប្រសារ គឺលោក ឌី វិជ្ជា បានប្តឹង លោក សម រង្ស៊ី ពីបទ«បរិហាកេរ្ត៍»ដោយទាមទារជម្ងឺចិត្ត១អឺរ៉ូ ករណីដែលលោក សម រង្ស៊ី និយាយថា លោក ហ៊ុន សែន ជាអ្នកនៅពីក្រោយការបំផ្ទុះឧត្ថម្ភាគចក្រសម្លាប់ លោក ហុក ឡង់ឌី កាលពីឆ្នាំ២០០៨។
សរុបមកវិញ តុលាការនៅក្រុងប៉ារីស បានសម្រេចលើកលែងការចោទប្រកាន់ លោក សម រង្ស៊ី ក្នុងសំណុំរឿងបទបរិហារកេរ្តិ៍ លោកនាយករដ្ឋមន្ត្រី ហ៊ុន សែន។ តែក៏គ្មានដែរភស្តុតាងបង្ហាញថា លោក ហ៊ុន សែន ជាអ្នកនៅពីក្រោយការស្លាប់របស់ដន្លងខ្លួនឯង ដូចការចោទប្រកាន់របស់មេបក្សប្រឆាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ