កូដករណាហ្គាវើលដ៍៦រូបត្រូវបានតុលាការចេញដីកាកោះហៅ
យ៉ាងហោចណាស់មានកូដករណាហ្គាវើលដ៍៦រូប ត្រូវបានសាលាដំបូងរាជធានីភ្នំពេញដីកាកោះហៅក្នុងបទចោទ«រំលោភលើលំនៅឋាន»គិតមកដល់ថ្ងៃទី១៨តុលា។ នេះបើតាមការបញ្ជាក់របស់ កញ្ញា ឈឹម ស៊ីថរ ប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរ នៃក្រុមហ៊ុនណាហ្គាវើលដ៍។ កញ្ញាចាត់ទុកការកោះហៅជាបន្តបន្ទាប់នេះ ជាការវិវត្តន៍ថ្មីមួយទៀតថ្មី ដោយប្រើប្រាស់ប្រព័ន្ធតុលាការបំបិតមាត់សិទ្ធិសេរីភាពអ្នកទាមទារសិទ្ធិ។
ចុះផ្សាយនៅថ្ងៃ៖
ស្តាប់ - ០២:៣៥
ក្នុងចំណោមអ្នកទាំង៦នាក់នេះ ២នាក់ទើបទទួលដីកាកោះហៅនៅថ្ងៃទី១៨ខែតុលានេះ ហើយ៤នាក់ទៀតទទួលបានដីកាកោះហៅមុនថ្ងៃទី១៨តុលា។ អ្នកទាំង៤នាក់ដែលទទួលបានដីកាកោះមុនថ្ងៃទី១៨តុលារួមមានឈ្មោះ សៀក បញ្ញា. ជួប សោភ័ណ្ឌ .សុខ ថាវុធ. នេត ចរិយា។ អ្នកទាំង៤រូប នៅថ្ងៃទី១៧តុលាម្សិលមិញ ក៏បានធ្វើដំណើរ ទៅដាក់លិខិតស្នើសុំពន្យារពេលចូលឆ្លើយបំភ្លឺ នៅសាលាដំបូងរាជធានីភ្នំពេញ ព្រោះត្រូវពឹងពាក់មេធាវីដើម្បីការពារសិទ្ធិនៅតុលាការ។
កញ្ញា សុខ ថាវុធ បានប្រាប់វិទ្យុបារាំងអន្តរជាតិនៅថ្ងៃទី១៨តុលានេះថា កញ្ញានិងអ្នកឯទៀតកំពុងស្វះស្វែងរកមេធាវីការពារក្ដី និងកំពុងរៀបចំឯកសារពាក់ព័ន្ធមួយចំនួន។ កញ្ញា សុខ ថាវុធ បន្ថែមថា ភ្ញាក់ផ្អើនៅពេលដែលតុលាការចេញដីកាកោះហៅក្នុងបទចោទ រំលោភលើលំនៅឋាន ដែលគ្រាន់តែធ្វើសកម្មភាពតវ៉ាតាមច្បាប់ស្ដីកូដកម្ម។
ជាមួយគ្នានេះ កញ្ញា ជួប សោភ័ណ្ឌ បានចាត់ទុកដីកាកោះនេះ ប្រែក្លាយអ្នកត្រូវទៅជាខុស អ្នកខុសបែរជាត្រូវទៅវិញ។ កញ្ញា រងចាំមើលតើមន្ត្រីតុលាការជួយអ្នកមានដែលជាថៅកែ ឬជួយអ្នកក្រដែលជាកម្មករកំពុងតវ៉ា។ ទោះប្រឈមបណ្ដឹងក៏ កញ្ញា ជួប សោភ័ណ្ឌ មិនរាថយក្នុងការចេញមុខតវ៉ាដែរ។
បញ្ហាផ្លូវច្បាប់រវាងថៅកែក្រុមហ៊ុននិងកម្មករណាហ្គាវើលដ៍មិនមែនជារឿងថ្មីទេ កាលពីខែមករាដើមឆ្នាំ ថ្នាក់ដឹកនាំ និងសកម្មជនសហជីពចំនួន ១១នាក់ ដែលជាតំណាងរបស់ក្រុមកូដករណាហ្គាវើលដ៍ ត្រូវបានតុលាការចោទប្រកាន់ និងឃុំខ្លួនជាបណ្តោះអាសន្ន ក្រោមការចោទពីបទ «ញុះញង់ឱ្យប្រព្រឹត្តបទឧក្រិដ្ឋជាអាទិ៍» និងបទ «រារាំងការអនុវត្តវិធានការទប់ស្កាត់ការរាលដាលជំងឺកូវីដ-១៩»។ តែអ្នកទាំង១១ត្រូវបានតុលាការសម្រេចឱ្យដោះលែងនៅក្រៅឃុំវិញ ដើម្បីចូលរួមការចរចារកដំណោះស្រាយស្រាយវិវាទការងាររួម។ ការអូសបន្លាយនៃបញ្ហានេះ នៅត្រង់ថា កម្មករដែលចេញតវ៉ា ចង់ឲ្យភាគីក្រុមហ៊ុនទទួលយកបុគ្គលិកទាំងអស់ចូលធ្វើការឡើងវិញ និងត្រូវមានសហជីពនៅក្នុងការងារ តែថៅកែមិនព្រមដាច់ខាត។
គិតត្រឹមខែកក្កដា បុគ្គលិកក្រុមហ៊ុនណាហ្គាវើលដ៍សរុបចំនួន២០៥នាក់ ក្នុងចំណោមបុគ្គលិកសរុប៣៧៣នាក់ បានយល់ព្រមទទួលយកការទូទាត់នូវប្រាក់បំណាច់បញ្ចប់កិច្ចសន្យាការងារជាមួយភាគីក្រុមហ៊ុន។ ក្រសួងការងារអះអាង នឹងស្វែងរកឱកាសការងារថ្មីឱ្យអតីតបុគ្គលិកទាំងអស់ដែលបានទទួលយកប្រាក់សំណង ប៉ុន្តែពីខាងសហជីពវិញយល់ថា ការទទួលយកសំណងរបស់បុគ្គលិកមិនឆ្លុះបញ្ចាំងអំពីឆន្ទះពិតរបស់ពួកគេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ