ក្រសួងមហាផ្ទៃស្នើប៉ូលិសអន្តរជាតិអាំងទែរប៉ូលចាប់លោក សម រង្ស៊ី បញ្ជូនមកកម្ពុជា
ក្រសួងមហាផ្ទៃអះអាងនៅថ្ងៃទី៥វិច្ឆិកានេះថា កម្ពុជាបានស្នើទៅប៉ូលិសអន្តរជាតិអាំងទែរប៉ូល ដើម្បីតាមចាប់ខ្លួនលោក សម រង្ស៊ី អតីតប្រធានគណបក្សសង្គ្រោះជាតិ ពីប្រទេសបារាំងត្រលប់មកកម្ពុជា តាមរយៈអធិបញ្ជាពីក្រសួងយុត្តិធម៌កាលពីពេលថ្មីៗនេះ។ តាមការបញ្ជាក់របស់អ្នកនាំពាក្យក្រសួងមហាផ្ទៃ ចំណាត់ការនេះ គឺដោយសារតែលោក សម រង្ស៊ី ត្រូវបានកាត់ទោសជាច្រើន ដែលចុងក្រោយគឺបទប្រមាថព្រះមហាក្សត្រខ្មែរ។
ចុះផ្សាយនៅថ្ងៃ៖
ស្តាប់ - ០២:២៤
នគរបាលជាតិកម្ពុជា បានដាក់សំណើទាក់ទងទៅប៉ូលិសអន្តរជាតិអាំងទែរប៉ូល តាមចាប់ខ្លួនលោក សម រង្ស៊ី ពីប្រទេសបារាំង ក្រោយក្រសួងយុត្តិធម៌ កាលពីថ្ងៃទី២៥ខែតុលា បានចេញដីកាតុលាការឱ្យអនុវត្តច្បាប់តាមចាប់ខ្លួនលោក សម រង្ស៊ី អតីតមេដឹកនាំគណបក្សសង្គ្រោះជាតិ ដែលកំពុងរស់នៅក្រៅប្រទេស ក្នុងសំណុំរឿងប្រមាថអង្គព្រះមហាក្សត្រថ្មីៗនេះ។
លោក ខៀវ សុភ័គ អ្នកនាំពាក្យក្រសួងមហាផ្ទៃនៅថ្ងៃទី៥វិច្ឆិកា បានគូសបញ្ជាក់ប្រាប់វិទ្យុបារាំងថា កិច្ចសហប្រតិបត្តិការតាមចាប់ខ្លួនលោក សម រង្ស៊ី ពីក្រៅប្រទេសនេះ ហាក់មានភាពស្មុគ្រស្មាញនិងពិបាកស្មានដឹងពីលទ្ធផលណាស់ ដោយសារតែលោក សម រង្ស៊ី មានសញ្ជាតិបារាំង។ តែយ៉ាងណា សមត្ថកិច្ចកម្ពុជានៅតែចង់ចាប់ខ្លួនលោក សម រង្ស៊ី ដោយផ្ទាល់ដៃ ប្រសិនបើលោក សម រង្ស៊ី ហ៊ានជាន់ទឹកដីកម្ពុជា ទោះស្ថិតនៅក្នុងតម្លៃណាក៏ដោយ។
លោក សម រង្ស៊ី ធ្លាប់បានលើកឡើងថា លោកត្រូវបានគេរារាំងបិទផ្លូវចូលស្រុកវិញនៅតាមជើងហោះហើរជាច្រើន ទើបលោកមិនអាចធ្វើមាតុភូមិនិវត្តន៍មកកម្ពុជាវិញបាន។ ត្រង់ចំណុចនេះ អ្នកនាំពាក្យក្រសួងមហាផ្ទៃយល់ថា ជាការបំភ្លៃការពិតដើម្បីទាមទារចំណាប់អារម្មណ៍ពីសាធារណៈមតិតែប៉ុណ្ណោះ។
តាមរយៈកិច្ចសម្ភាសន៍ជាមួយវិទ្យុអាស៊ីសេរីនៅថ្ងៃទី៤វិច្ឆិកា លោក សម រង្ស៊ី យល់ថាប៉ូលិសអន្តរជាតិអាំងទែរប៉ូលនឹងមិនអាចអនុវត្តតាមចាប់លោកបញ្ជូនលោកទៅប្រទេសកម្ពុជាវិញតាមសំណើនោះឡើយ ព្រោះវាជារឿងនយោបាយសុទ្ធសាធ។ ហើយលោក សម រង្ស៊ី បានបង្វែរទៅសំណុំរឿងចាប់ខ្លួនមេកងអង្គរក្សលោកនាយករដ្ឋមន្ត្រី ហ៊ុន សែន គឺលោក ហ៊ីង ប៊ុនហៀង និងលោក ហ៊ុយ ពិសិដ្ឋ នោះទៅវិញទេ ដែលត្រូវធ្វើឡើង។
សូមរំព្ញកថា មេកងអង្គរក្សរបស់លោក ហ៊ុន សែនទាំង២នាក់នេះ ត្រូវបានបារាំងចេញដីកាចាប់ខ្លួនចាប់ពីថ្ងៃទី៣០ ខែធ្នូ ឆ្នាំ២០២១មកម្ល៉េះ ពីបទ «ប៉ុនប៉ងសម្លាប់មនុស្ស» ពាក់ព័ន្ធនឹងហេតុការណ៍គប់គ្រាប់បែកលើហ្វូងបាតុករ កាលពីឆ្នាំ១៩៩៧។
គួរជម្រាបដែរថា លោក សម រង្ស៊ី អតីតប្រធានគណបក្សសង្គ្រោះជាតិ កំពុងត្រូវហ៊ុមព័ទ្ធទៅដោយរឿងក្តីក្តាំជាច្រើន ដែលត្រូវបានតុលាការកម្ពុជាដាក់ទោសឱ្យជាប់ពន្ធនាគារស្ទើរតែរាប់ភ្លេចទៅហើយ ដែលសំណុំរឿងក្រោយគេនេះ គឺជាការប្រមាថអង្គព្រះមហាក្សត្រកម្ពុជាក្នុងវេទិកាសាធារណៈនៅប្រទេសបារាំង ដែលញ៉ាំងឱ្យលោក ហ៊ុន សែន ប្រកាស«កម្ចាត់ចោល» លោក សម រង្ស៊ី ខណៈលោក ហ៊ុន សែន ចោទថាជា «ពូជក្បត់ជាតិ៣ជំនាន់»៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ