អាជ្ញាធរក្រុងហាមបុគ្គលិកណាហ្គាវើលដ៍ចេញតវ៉ាអំឡុងបុណ្យអុំទូក និងពេលប្រជុំអាស៊ាន
រដ្ឋបាលរាជធានីភ្នំពេញ នៅថ្ងៃទី៥វិច្ឆិកា បានចេញបំរាមមួយដោយហាមមិនឲ្យបុគ្គលិកក្រុមណាហ្គាវើលដ៍ ចេញតវ៉ាទៀតឡើយ នៅអំឡុងពេលបុណ្យអុំទូក និងអំឡុងពេលកិច្ចប្រជុំកំពូលអាស៊ាន នៅសប្តាហ៍ក្រោយនេះ។ ជាមួយគ្នានេះ អាជ្ញាធរក្រុងភ្នំពេញ បានព្រមានថា បើក្នុងករណីមានការចេញតវ៉ា នោះនឹងមានវិធានការតាមផ្លូវច្បាប់។ប៉ុន្តែជំហរបស់ក្រុមអ្នកតវ៉ា គឺ អត់ ផ្អាក ទេ ដោយសំអាងថា គ្មាន ច្បាប់ ហាមពួកគេមិនឲ្យប្រើ សិទ្ធិខ្លួនឯង នៅពេលមានកម្មវិធីបុណ្យជាតិ ឬពេលមានកិច្ចប្រជុំណាមួយនោះឡើយ។
ចុះផ្សាយនៅថ្ងៃ៖
ស្តាប់ - ០១:៥២
ដោយបន្តលើកឡើងថា ការតវ៉ារបស់អតីតបុគ្គលិកក្រុមហ៊ុនណាហ្គាវើលដ៍ បានធ្វើឲ្យប៉ះពាល់សណ្តាប់ធ្នាប់សង្គមនោះ ចាប់ពីថ្ងៃទី៦ដល់ថ្ងៃទី១៣វិច្ឆិកា ដែលមានពិធីបុណ្យអុំទូក និងកិច្ចប្រជុំកំពូលអាស៊ាននៅភ្នំពេញ គឺសាលាក្រុងមិនអនុញ្ញាតឲ្យមានការជួបតវ៉ានៅខាងមុខក្រុមហ៊ុនកាស៊ីណូនេះទៀតឡើយ។
អាជ្ញាធរទីក្រុងភ្នំពេញ បានគូសបញ្ជាក់ថា ខ្លួនបានព្យាយាមសម្របសម្រួលពន្យល់ ណែនាំ និងធ្វើជាអន្តរការីក្នុងការដោះស្រាយវិវាទការងារនេះជាច្រើនលើកច្រើនសារតែថាក្រុមអ្នកតវ៉ានៅតែបដិសេធមិនទទួលដំណោះស្រាយ។
បើតាមអាជ្ញាធរដដែល នៅក្នុងករណី ក្រុមអ្នកតវ៉ានៅបន្តសកម្មភាពប្រមូលផ្តុំ ដែលធ្វើឲ្យប៉ះពាល់ដល់សន្តិសុខ សុវត្ថិភាព សណ្តាប់ធ្នាប់ក្នុងពេលប្រជុំអាស៊ាន នោះនឹងត្រូវទទួលខុសត្រូវចំពោះមុខច្បាប់។
ជាឆ្លើយតបមកវិញ កញ្ញា ឈឹម ស៊ីថរ ប្រធានសហជីពទ្រទ្រង់សិទ្ធិការងារ នៃបុគ្គលិក កម្មករខ្មែរ ប្រចាំក្រុមហ៊ុនណាហ្គាវើលដ៍ ចាត់ទុកថា នេះរឿងអសមត្ថភាពដដែលៗរបស់សាលាក្រុង ដែលមិនហ៊ាន ជំរុញ ឲ្យថៅកែ បរទេស មករកស៊ី នៅកម្ពុជា ឲ្យគោរពច្បាប់ការងារ គោរព សេរីភាព សហជីព តែថា អាជ្ញាធរ ចេះតែគំរាម និងប្រើហិង្សាលើ ពលរដ្ឋខ្លួនឯង។
ទោះជាមានការព្រមានចាត់វិធានការតាមច្បាប់ ក្នុងករណីនៅតែបន្តការតវ៉ាក៏ដោយ តែបើតំណាងសហជីពរូបនេះ គឺជំហរ កម្មករ ពួក គាត់ អត់ ផ្អាក ទេ ដោយសំអាងថា គ្មាន ច្បាប់ ហាមពួកគេមិនឲ្យប្រើ សិទ្ធិខ្លួនឯង នៅពេលមានកម្មវិធីបុណ្យជាតិ ឬពេលមានកិច្ចប្រជុំណាមួយនោះឡើយ។
គួរឲ្យដឹងថា មកទល់ពេលនេះ ក្រុមអ្នកតវ៉ាដែលនៅសល់តែជាង១០០នាក់ គឺភាគច្រើនកំពុងជាប់បណ្តឹងនៅតុលាការដែលប្តឹងដោយភាគីថៅកែក្រុមហ៊ុនណាហ្គាវើលដ៍ដោយចោទថា អ្នកតវ៉ាទាំងនោះរំលោភសិទ្ធិលំនៅឋាន ខណៈពួកគេតវ៉ានៅខាងមុខក្រុមហ៊ុនល្បែងស៊ីសងមួយនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ