ចិនអះអាងជាថ្មី នឹងជួយអភិវឌ្ឍន៍មូលដ្ឋានទ័ពរាមកម្ពុជាឱ្យកាន់តែទំនើប ក្រោយអាមេរិកបង្ហាញកង្វល់
ចិនបញ្ជាក់ជំហរជាថ្មីរបស់ខ្លួនថា នឹងជួយអភិវឌ្ឍន៍ទីតាំងមូលដ្ឋានកងទ័ពជើងទឹករាមរបស់កម្ពុជាឱ្យកាន់តែល្អប្រសើរជាមុន។ ការបញ្ជាក់បែបនេះ ធ្វើឡើងបន្ទាប់ពីលោកប្រធានាធិបតីអាមេរិក ចូ បៃឌិន បន្តលើកឡើងពីកង្វល់ចំពោះមុខជុំវិញតួនាទី និងសកម្មភាពរបស់ចិននៅមូលដ្ឋានទ័ពរាមកម្ពុជា អំឡុងពេលលោកជួបជាមួយប្រមុខរដ្ឋាភិបាលកម្ពុជាក្នុងកិច្ចប្រជុំអាស៊ាន។
ចុះផ្សាយនៅថ្ងៃ៖
ស្តាប់ - ០២:៣៧
ការធ្វើទំនើបភាវូបនីយកម្មនៃមូលដ្ឋានទ័ពជើងទឹករាមដែលភាគីចិនបានលើកឡើងគឺ ការអភិវឌ្ឍន៍មូលដ្ឋានទ័ពឱ្យទៅជាកំពង់ផែទឹកជ្រៅ និងការអភិវឌ្ឍន៍នូវហេដ្ឋារចនាសម្ព័ន្ធជុំវិញទីតាំងនោះ។
ក្នុងសន្នីសិទកាសែតពីទីក្រុងប៉េកាំងអ្នកនាំពាក្យក្រសួងការបរទេសចិន លោកស្រី ម៉ៅ ណីង បានថ្លែងថា ចិននឹងបន្តជួយធ្វើទំនើបកម្មមូលដ្ឋានកងទ័ពជើងទឹករាមរបស់កម្ពុជាបន្ថែមទៀត បើទោះបីជាមានភាពចម្រូងចម្រាស និងភាពស្រពិចស្រពិលដែលជាចេតនាបង្កឡើងដោយសហរដ្ឋអាមេរិក ជុំវិញការចោទប្រកាន់ថា កម្ពុជាបានផ្តល់ភ្លើងខៀវឱ្យចិនអភិវឌ្ឍន៍សម្រាប់ជាផលប្រយោជន៍របស់យោធាចិននៅមូលដ្ឋានយោធារាមកម្ពុជា។
អ្នកនាំពាក្យរូបនេះបន្តអះអាងថា ជំហររបស់ចិនក្នុងការជួយធ្វើទំនើបកម្មមូលដ្ឋានទ័ពរាម គឺជាការជួយធម្មតាប៉ុណ្ណោះរបស់ចិនចំពោះកម្ពុជា ដោយមិនគិតពីផលប្រយោជន៍ឡើយ។
អ្វីដែលជាការកត់សម្គាល់នោះ ការលើកឡើងនូវសំណុំរឿងមូលដ្ឋានទ័ពរាមក្នុងសន្នីសិទកាសែតរបស់ក្រសួងការបរទេសចិនជាសាធារណៈនេះ គឺជាឆ្លើយតបទៅកាន់សហរដ្ឋអាមេរិក ក្រោយលោកប្រធានាធិបតីអាមេរិក ចូ បៃដិន នៅតែបន្តលើកយកបញ្ហាមូលដ្ឋានទ័ពរាមមកជជែកនៅចំពោះមុខ លោកនាយករដ្ឋមន្ត្រីហ៊ុន សែន ក្នុងជំនួបទ្វេរភាគីកាលពីថ្ងៃទី១២ ខែ វិច្ឆិកា។ ក្រោយជំនួបទ្វេរភាគីរួច សេតវិមានសហរដ្ឋអាមេរិកបានចេញសេចក្តីថ្លែងការណ៍មួយថា សហរដ្ឋអាមេរិកបានស្នើឱ្យកម្ពុជាបង្ហាញនូវតម្លាភាពពេញលេញពាក់ព័ន្ធនឹងសកម្មភាព យោធាចិននៅលើមូលដ្ឋានកងទ័ពជើងទឹករាមកម្ពុជា។
ក្នុងសំណុំរឿងដ៏ចម្រូសចម្រាសនេះ មួយផ្នែកពីជ្រុងអ្នកវិភាគភូមិសាស្ត្រនយោបាយធ្លាប់អះអាងថា ការធ្វើទំនើបភាវូបនីយកម្មមូលដ្ឋានកងទ័ពជើងទឹករាម គឺដើម្បីការពារសន្តិសុខជាតិ បូរណភាពទឹកដី និងអធិបតេយ្យភាពជាតិរបស់កម្ពុជា ហើយក៏ដើម្បីការពារពីសកម្មភាពឈានពានដែនទឹកពីសំណាកប្រទេសជិតខាង ជាពិសេសប្រទេសវៀតណាមដែរ។
ប៉ុន្តែមួយផ្នែករបស់អ្នកវិភាគចាត់ទុកថា ការបើកទ្វារឱ្យចិនអភិវឌ្ឍន៍នៅលើមូលដ្ឋានកងទ័ពជើងទឹករាមរបស់កម្ពុជា បានផ្ទុយទៅនឹងច្បាប់រដ្ឋធម្មនុញ្ញរបស់កម្ពុជា ដោយមិនអនុញ្ញាតឱ្យយោធាបរទេសណាមួយមានវត្តមានលើដែនអធិបតេយ្យភាពខ្លួនបានឡើយ។
យ៉ាងណា លោក គង់ ភោគ រដ្ឋលេខាធិការក្រសួងការបរទេសកម្ពុជាក៏បានថ្លែងបញ្ជាក់ជាថ្មីក្នុងអំឡុងកិច្ចប្រជុំកំពូលអាស៊ានថា កម្ពុជាមិនមានហេតុផលណាមួយលាក់បាំងចំពោះសកម្មភាពអភិវឌ្ឍន៍នៅលើមូលដ្ឋានទ័ពរាមនោះទេ ដោយជាក់ស្តែង កម្ពុជាតែងតែផ្តល់ឱកាសឱ្យភាគីបរទេសដូចជា សេនានុពន្ធសហរដ្ឋអាមេរិក និងបណ្តាស្ថានទូតមួយចំនួនចូលអង្កេតម្តងជាពីរដងរួចមកហើយ ដើម្បីស្រាយបំភ្លឺនូវការចោទប្រកាន់នានា។
លោក គង់ ភោគថា មែនទែនទៅ មិនមានប្រទេសណាមួយអនុញ្ញាតឱ្យរដ្ឋបរទេសចូលពិនិត្យក្នុងមូលដ្ឋានទ័ពនៃប្រទេសនោះដូចកម្ពុជាទេ ព្រោះនេះជាកិច្ចការផ្ទៃក្នុងរបស់ជាតិ និងដែនអធិបតេយ្យភាពរបស់កម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ