កម្ពុជា ខ្ចីប្រាក់កូរ៉េខាងត្បូង ជិត ២ពាន់លានដុល្លារ សម្រាប់គម្រោងអភិវឌ្ឍន៍បន្ថែម
រដ្ឋាភិបាលកម្ពុជា បានខ្ចីប្រាក់កូរ៉េខាងត្បូងជិត ២ពាន់លានដុល្លារបន្ថែម សម្រាប់ដំណើរការគម្រោងអភិវឌ្ឍសេដ្ឋកិច្ច ឆ្នាំ២០២២ ដល់ ២០២៦ និងការកសាងលើប្រព័ន្ធហេដ្ឋារចនាសម្ព័ន្ធនានា ក្នុងខេត្តព្រះសីហនុ និងរាជធានីភ្នំពេញ។ ពិធីប្រគល់ និងទទួលប្រាក់កម្ចី បានធ្វើឡើងនៅព្រឹកថ្ងៃសុក្រ ទី ៩ខែធ្នូនេះ ក្រោមអធិបតីភាព លោកនាយករដ្ឋមន្ត្រីហ៊ុន សែន ជាមួយតំណាងជាន់ខ្ពស់ប្រទេសកូរ៉េខាងត្បូង។
ចុះផ្សាយនៅថ្ងៃ៖
ស្តាប់ - ០១:៤៧
ទឹកប្រាក់កម្ចីពីកូរ៉េខាងត្បូង ចំនួនជិត ២ពាន់លានដុល្លារ ត្រូវបានរដ្ឋាភិបាលកម្ពុជា អះអាងថា សម្រាប់គាំទ្រដល់ការអភិវឌ្ឍនៅកម្ពុជា លើ ២កត្តាធំៗ។ ទី ១ គឺទឹកប្រាក់ចំនួន ១៥០០លានដុល្លារ ជាការចុះហត្ថលេខាលើកិច្ចសម្របសម្រួលក្របខណ្ឌ ស្ដីពីការផ្ដល់ឥណទានសម្បទាន នៃមូលនិធិសហប្រតិបត្តិការអភិវឌ្ឍន៍សេដ្ឋកិច្ចសម្រាប់ ឆ្នាំ ២០២២-២០២៦។
ទី ២ ជាការចុះហត្ថលេខាលើគម្រោងពង្រឹងសមត្ថភាពប្រព័ន្ធបណ្ដាញបញ្ជូនអគ្គិសនីនៅខេត្តព្រះសីហនុ ដែលមានទឹកប្រាក់ចំនួន ៧០លានដុល្លារ។ ហើយទឹកប្រាក់ជិត ២៥០លានដុល្លារទៀត នឹងត្រូវប្រើប្រាស់លើគម្រោងសាងសង់ស្ពានមិត្តភាពកម្ពុជា-សាធារណរដ្ឋកូរ៉េ ផ្សារចាស់-ជ្រោយចង្វារ និងជ្រោយចង្វារ-អរិយក្សត្រ។ ទឹកប្រាក់លើគម្រោងទាំង ២នេះ ត្រូវបានចុះហត្ថលេខាប្រគល់ និងទទួល ដោយរដ្ឋមន្ត្រីក្រសួងការបរទេស និងក្រសួងសេដ្ឋកិច្ច របស់កម្ពុជា ជាមួយតំណាងជាន់ខ្ពស់របស់កូរ៉េខាងត្បូង។
គួរជម្រាបជូនថា គិតត្រឹមឆមាសទី ៣នៃឆ្នាំ ២០២២ បំណុលសាធារណៈក្រៅប្រទេស របស់កម្ពុជា មានទំហំសរុបជាង ៩ពាន់៥រយលានដុល្លារ។ ក្នុងនោះ បំណុលទ្វេភាគីផ្សេងៗ មាន ២១ភាគរយ និងបំណុលតែជាមួយចិន គឺមានរហូតដល់ ៤១ភាគរយ។ នេះបើយោងតាមសេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ ២០២៣ ដោយមានលម្អិតដែរថា រដ្ឋាភិបាលកម្ពុជា បានកំណត់ទំហំនៃការខ្ចីប្រាក់ពីដៃគូអភិវឌ្ឍន៍សម្រាប់ឆ្នាំ ២០២៣ ចំនួន ១ ៧០០លាន SDR កើនឡើង ១០០លាន SDR ធៀបនឹងថវិកាឆ្នាំ ២០២២។
គម្រោងសំខាន់ៗ ដែលរដ្ឋាភិបាលកម្ពុជា ចាំបាច់ត្រូវការកម្ចីបន្ថែម មានពាក់ព័ន្ធនឹងវិស័យថាមពល វិស័យធារាសាស្ត្រ វិស័យហេដ្ឋារចនាសម្ព័ន្ធរូបវ័ន្ត វិស័យសុខាភិបាល វិស័យអប់រំ និងបណ្តុះបណ្តាលវិជ្ជាជីវៈ វិស័យកសិកម្ម និងវិស័យអាទិភាពផ្សេងទៀតចំនួន ៥គម្រោងជុំវិញការគ្រប់គ្រងហិរញ្ញវត្ថុ សេដ្ឋកិច្ចឌីជីថល ធម្មជាតិ និងបរិស្ថានជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ