ក្រុមអ្នកតស៊ូមតិជំរុញឲ្យបង្កើតប្រអប់មួយឲ្យសាធារណៈជនផ្តល់យោបល់លើការធ្វើលទ្ធកម្មនានា
ក្រុមអ្នកធ្វើការខាងតស៊ូមតិ ជំរុញឲ្យរដ្ឋាភិបាលបង្កើតប្រព័ន្ធមួយសម្រាប់ឲ្យសាធារណៈជនផ្តល់យោបល់ទៅលើផែនការធ្វើលទ្ធកម្មនានា ខណៈសេចក្តីព្រាងច្បាប់ស្តីពីលទ្ធកម្មសាធារណៈកំពុងស្ថិតក្នុងដំណាក់កាលពិភាក្សា។ ការជំរុញនេះធ្វើឡើងតាមរយៈរបាយការណ៍ «សិក្សាស្រាវជ្រាវលើក្របខណ្ឌច្បាប់លទ្ធកម្មសាធារណៈ» ដែលត្រូវបានផ្សព្វផ្សាយក្នុងសិក្ខាសាលាមួយ កាលពីម្សិលមិញ ដោយអង្គការតម្លាភាពកម្ពុជាTI វិទ្យាស្ថានតស៊ូមតិ និងគោលនយោបាយ API ដោយមានជំនួយផ្នែកច្បាប់ពីការិយាល័យមេធាវី សិដ្ឋាល័យ។
ចុះផ្សាយនៅថ្ងៃ៖
ស្តាប់ - ០២:២៤
របាយការណ៍ចំនួន៤ទំព័រ ទាក់ទងនឹងបញ្ហាលទ្ធកម្មសាធារណៈនេះ ក្រុមអ្នកតស៊ូមតិ បានផ្តោតសំខាន់លើបញ្ហាបច្ចេកទេស ៧ចំណុច ដូចជា តម្លាភាព ការគ្រប់គ្រង គណនេយ្យភាព និងសុចរិតភាព ការគ្រប់គ្រង និងត្រួតពិនិត្យ សិទ្ធិប្តឹងទាមទារ ការចូលរួមពីសាធារណជន និងការបើកចំហ និងបរិយាបន្ន។
តាមរយៈរបាយការណ៍នេះ ពួកគេ បានផ្តល់យោបល់ថា រដ្ឋាភិបាលគួរបង្កើតប្រព័ន្ធមួយដែលអនុញ្ញាតឱ្យសាធារណជនអាចផ្តល់យោបល់ទៅលើផែនការលទ្ធកម្ម និងគម្រោងលទ្ធកម្ម ដោយយកគណនេយ្យភាពសង្គមដែលបង្កើតឡើងដោយរដ្ឋបាលថ្នាក់ក្រោមជាតិជាគំរូ។
ជុំវិញគណនេយ្យភាព និងសុចរិតភាព របាយការណ៍នេះស្នើឲ្យសេចក្តីព្រាងច្បាប់ស្តីពីលទ្ធកម្មសាធារណៈចាត់ទុកវិធីដេញថ្លៃដោយប្រកួតប្រជែង ជាសាធារណៈ ជាវិធីសាស្ត្រលទ្ធកម្មទូទៅ និងស្វ័យប្រវត្តិ ជាជាងកត់សំគាល់ថា វិធីសាស្ត្រដេញថ្លៃដោយប្រកួតប្រជែងនេះ គឺជាវិធីសាស្ត្រលទ្ធកម្មដែលមានតម្លាភាពខ្ពស់ និងជំរុញឲ្យប្រើក្នុងលទ្ធកម្មសាធារណៈ។
បើតាមក្រុមអ្នកតស៊ូតមិ ដើម្បីជំរុញឱ្យមានការចូលរួមពីសាធារណជនឱ្យមានប្រសិទ្ធភាព ព័ត៌មានអំពីគម្រោងលទ្ធកម្មសាធារណៈរួមមានព័ត៌មានអំពីតម្លៃ គុណភាព និងការអនុវត្ត គួរត្រូវបានបោះផ្សាយជូនសាធារណជន ជាទម្រង់សង្ខេប និងងាយយល់។សាធារណជនអាចត្រូវបានតំណាងដោយសមាជិកសភា ឬក្រុមប្រឹក្សាថ្នាក់ក្រោមជាតិ ដើម្បីពិនិត្យនិងសម្រេចលើការចំណាយទៅលើគម្រោងលទ្ធកម្មសាធារណៈ។ ដូច្នេះ រាល់ថវិកាដែលត្រូវចំណាយទៅលើគម្រោងលទ្ធកម្មសាធារណៈ និងផែនការគម្រោងលទ្ធកម្មសាធារណៈ គួរត្រូវបានរាយការណ៍ជាសង្ខេបជូនសភា និងក្រុមប្រឹក្សាថ្នាក់ក្រោមជាតិ ភ្ជាប់ជាមួយនឹងឯកសារថវិកាប្រចាំឆ្នាំ សម្រាប់ឱ្យសភា និងក្រុមប្រឹក្សាថ្នាក់ក្រោមជាតិ ពិនិត្យ និងសម្រេច។
ប៉ុន្តែក្នុងរបាយការណ៍ដដែលនេះ ក្រុមអ្នកតស៊ូមតិ បានស្នើការពិចារណាទៅលើការផ្ទេរមុខងារត្រួតពិនិត្យលទ្ធកម្ម ទៅស្ថាប័នដោយឡែក ក្រៅពីក្រសួងសេដ្ឋកិច្ច និងហិរញ្ញវត្ថុ ដើម្បីធានានូវតុល្យភាពនៃអំណាច និងចៀសវាងនូវបញ្ហាទំនាស់ផលប្រយោជន៍ ខណៈក្រសួងសេដ្ឋកិច្ចមានមុខងារគ្រប់គ្រងលទ្ធកម្មសាធារណៈរួចទៅហើយ។
លើសពីនេះ របាយការណ៍នេះ ក៏បានស្នើឱ្យសេចក្តីព្រាងច្បាប់លទ្ធកម្មសាធារណៈ ចែងនូវបញ្ញត្តិពិសេស លុបលើបញ្ញត្តិទូទៅនៃច្បាប់កិច្ចសន្យា ដើម្បីមោឃៈរាល់កិច្ចសន្យាលទ្ធកម្មដែលត្រូវបានធ្វើឡើងដោយមិនស្របច្បាប់។ ប្រការនេះអាចជួយកាត់បន្ថយបញ្ហាពុករលួយដែលផ្តើមឡើងដោយវិស័យឯកជន ដើម្បីទទួលបានកិច្ចសន្យាលទ្ធកម្មសាធារណៈផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ