គិតពីឆ្នាំ២០១៨ ដល់ខែកញ្ញាឆ្នាំ២០២២ គម្រោងអគារខ្ពស់ៗចាប់ពី៥ជាន់ទៅមានជិត ២ ៥០០អគារ
គិតពីចាប់ផ្តើមអនុវត្តកាលពីឆ្នាំ២០១៨ រហូតដល់ដំណាច់ខែកញ្ញា ឆ្នាំ២០២២ គម្រោងអគារខ្ពស់ៗ ចាប់ពី៥ជាន់ឡើងទៅនៅទូទាំងប្រទេសមានចំនួន ២ ៤៩២អគារ ក្នុងនោះ៦៨២អគារ នៅខេត្តព្រះសីហនុ។ តាមរបាយការណ៍ក្រសួងរៀបចំដែនដី នគរូបនីយកម្ម និងសំណង់ សម្រាប់រយៈពេល៩ខែ គម្រោងសាងសង់អគារខ្ពស់នៅឆ្នាំ២០២២ មានការធ្លាក់ចុះ ទោះជាតួលេខមិនទាន់ពេញមួយឆ្នាំក៏ដោយ។
ចុះផ្សាយនៅថ្ងៃ៖
ស្តាប់ - ០២:១៣
ក្នុងចំណោមអគារខ្ពស់ទាំង ២៥០០អគារ អគារខ្ពស់ៗចាប់ពី៥ជាន់ដល់៩ជាន់ មានចំនួន ១ ៣៩៣អគារ ចាប់ពី១០ជាន់ដល់១៩ជាន់ មានចំនួន ៦៩៤អគារ ចាប់ពី២០ជាន់ដល់២៩ជាន់ មានចំនួន២៣០អគារ ចាប់ពី៣០ជាន់ដល់៣៩ជាន់ មាន១២៥អគារ និងចាប់ពី៤០ជាន់ឡើងទៅមានចំនួន៥០អគារ។ នេះបើតាមតួលេខរបស់ក្រសួងដែនដី នគរូបនីយកម្ម និងសំណង់។
ដោយឡែកសម្រាប់ឆ្នាំ២០២២វិញ គិតត្រឹមរយៈពេល៩ខែ ឃើញថាមានគម្រោងសាងសង់អគារខ្ពស់តិចតួចធៀបទៅនឹងឆ្នាំកន្លងៗទៅ ដោយចាប់ពី៥ជាន់ទៅដល់៩ជាន់ មានចំនួន៦៩អគារ ពី១០ជាន់ដល់១៩ជាន់ មានចំនួន១៩អគារ និងពី២០ជាន់ដល់២៩ជាន់ មាន៣អគារ។ ចំណែកអគារកម្ពស់ចាប់ពី៣០ជាន់ឡើងទៅ មិនមានគម្រោងសាងសង់ទេ ខណៈឆ្នាំ២០១៩ មុនវិបត្តិកូវីដ-១៩ គម្រោងអគារខ្ពស់បែបនេះមានរហូតដល់ជាង៤០អគារ។
ចំពោះគម្រោងអគារស្នាក់នៅរួម និងបុរីវិញ ក៏មានការថយចុះដែរ សម្រាប់រយៈពេល៩ខែឆ្នាំ២០២២ ដោយអគារស្នាក់នៅរួមមានចំនួន៤២ និងបុរីលំនៅឋាន និងលំនៅឋានមានលក្ខណៈជាបុរីមានចំនួន២០ ខណៈដែលពេញ១ឆ្នាំ២០២១ អគារស្នាក់នៅរួមមានចំនួន៨៤ និងបុរីលំនៅឋានមានចំនួន ៨១។ ជារួមអគារស្នាក់នៅរួមសរុបមានចំនួន ៤២៥គម្រោង និងបុរីលំនៅឋានសរុបមានចំនួន ៤៩៥គម្រោង។
ទោះយ៉ាងណាតួលេខទាំងនេះ ត្រូវអ្នកជំនាញផ្នែកអចលនទ្រព្យនានាមើលឃើញថាមិនមានការផ្លាស់ប្តូរច្រើននោះទេ បើទោះជារបាយការណ៍ឆ្នាំ២០២២ នៅខ្វះ៣ខែទៀតក៏ដោយ។ សូមបញ្ជាក់ថា នៅឆ្នាំ២០២២នេះ ប្រទេសកម្ពុជាមានគម្រោងសំណង់នៅទូទាំងប្រទេសចំនួនជាង ៣ ៨០០គម្រោង ដែលមានផ្ទៃក្រឡាសំណង់សរុបជាង ៦,៥លានម៉ែត្រការ៉េ គិតជាទុនវិនិយោគ គឺមានជាង ២ ៦០០ លានដុល្លារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ