លោក សម រង្ស៊ី ទាមទារឱ្យនាយករដ្ឋមន្ត្រីសងប្រាក់៣០ពាន់លានដុល្លារ បន្ទាប់ពីលោក ហ៊ុន សែន ថាលោក សម រង្ស៊ី នៅជំពាក់៣០ម៉ឺនដុល្លារ
លោក សម រង្ស៊ី ទាមទារឱ្យលោកនាយករដ្ឋមន្ត្រី ហ៊ុន សែន ផ្តល់សំណងមកប្រជាពលរដ្ឋខ្មែរក្នុងទំហំទឹកប្រាក់៣០ពាន់លានដុល្លារ ដោយលោកចោទថា ប្រមុខរដ្ឋាភិបាល និងមន្ត្រីជិតដិតរបស់លោក បានកេងប្រវ័ញ្ចលុយជាតិ យ៉ាងតិច១ពាន់លានដុល្លារមួយឆ្នាំ ក្នុងរយៈពេល៣០ឆ្នាំកន្លងមកនេះ។ ប្រតិកម្មរបស់លោកសម រង្ស៊ី គឺជាការឆ្លើយតបបន្ទាប់ពីលោក ហ៊ុន សែន បានប្រកាសនៅពេលថ្មីៗតាមទារលុយ លោក សម រង្ស៊ី នៅជំពាក់លុយចំនួន៣០ម៉ឺនដុល្លារទៀត ជុំវិញបទបរិហាកេរ្តិ៍ បើទោះជាលក់ទីស្នាក់បក្សហើយតែនៅសងមិនគ្រប់។
ចុះផ្សាយនៅថ្ងៃ៖
ស្តាប់ - ០២:២៩
ក្នុងសំណេរនៅលើបណ្តាញសង្គមរបស់ លោក សម រង្ស៊ី អតីតមេដឹកនាំបក្សប្រឆាំងកំពុងនិរទ្ទេសខ្លួននៅក្រៅប្រទេសរូបនេះបានរៀបរាប់ថា ក្រោមការដឹកនាំរបស់លោកនាយករដ្ឋមន្ត្រី ហ៊ុន សែនអស់រយៈពេល៣០ឆ្នាំកន្លងមក លោកតែងតែមើលឃើញនូវរូបភាពកាប់បំផ្លាញព្រៃឈើ ការប្លន់ដីធ្លីពលរដ្ឋ ការលុបបឹងរំលាយភ្នំ ការធ្វើអាជីវកម្មបិតបាំងលើរ៉ែមាស និងលោហធាតុផ្សេងទៀត ក៏ដូចជា ការលួចជំនួយអន្តរជាតិដែលមិនបានមកដល់ដៃពលរដ្ឋជាដើម។ ផ្អែកតាមសកម្មភាពទាំងអស់នេះ លោក សម រង្ស៊ីចាត់ទុកថា លោកនាយករដ្ឋមន្ត្រី ហ៊ុន សែន និងមន្ត្រីក្រោមឱវាទរបស់លោកបាន«ប្លន់ជាតិ និងប្លន់រាស្ត្រ»មិនតិចជាង១ពាន់លានដុល្លារនោះទេក្នុងមួយឆ្នាំ។
ខ្លឹមសារប្រតិកម្មរបស់លោក សម រង្ស៊ីនាពេលនេះ ស្តែងឡើងបន្ទាប់ពីលោកនាយករដ្ឋមន្ត្រី ហ៊ុន សែន ដែលជាសត្រូវនយោបាយរបស់លោកបានប្រកាសថា លោក សម រង្ស៊ីនៅជំពាក់លុយលោកចំនួន៣០ម៉ឺនដុល្លារបន្ថែមទៀត ជុំវិញបណ្តឹងទាមទារសំណងជំងឺចិត្ត ១លានដុល្លារអាមេរិក ពាក់ព័ន្ធនឹងបទបរិយាកេរ្តិ៍ជាសាធារណ។ គឺជាបណ្តឹងរបស់លោក ហ៊ុន សែន បន្ទាប់ពីលោក សម រង្ស៊ីបានចោទថា រដ្ឋាភិបាលកម្ពុជា គឺនៅពីក្រោយខ្នងនៃករណីឃាតកម្មលើលោកបណ្ឌិត កែម ឡី និងមួយទៀត គឺករណីស្លាប់របស់លោក ហុក ឡង់ឌីនៅក្នុងឧប្បត្តិហេតុធ្លាក់ឧទ្ធម្ភាគចក្រមួយក្នុងអំឡុងឆ្នាំ២០០៨។
គួររំឭកផងដែរថា ក្នុងសំណុំរឿងបទបរិហាកេរ្តិ៍នេះ លោកនាយករដ្ឋមន្ត្រីហ៊ុន សែនក៏បានប្តឹងលោក សម រង្ស៊ីទៅកាន់តុលាការប្រទេសបារាំងផងដែរ ដោយលោកចាត់ទុកថា ការលើកឡើងរបស់លោក សម រង្ស៊ីបានប៉ះពាល់ដល់កិត្តិយស និងកេរ្តិ៍ឈ្មោះរបស់លោកខ្លាំង។ ប៉ុន្តែនៅថ្ងៃទី១០ ខែតុលា ឆ្នាំ២០២២ សហមេធាវីការពារក្តីឱ្យលោកសមរង្ស៊ីបញ្ជាក់ថា តុលាការបារាំងបានសម្រេចលើកលែងការចោទប្រកាន់ចំពោះលោក សម រង្ស៊ី ក្នុងសំណុំរឿងបទបរិហារកេរ្តិ៍ ពីលោកនាយករដ្ឋមន្ត្រី ហ៊ុន សែន។
ក្នុងនោះ តុលាការបារាំងក៏មិនបានចោទប្រកាន់លោកនាយករដ្ឋមន្ត្រីជុំវិញករណីស្លាប់របស់លោក ហុក ឡង់ឌីឡើយ ដោយតុលាការបារាំងអះអាងថា លោក សម រង្ស៊ីមានភស្តុតាងណាមួយឱ្យបានច្បាស់លាស់ជុំវិញពីការចោទប្រកាន់ទៅលើលោកនាយករដ្ឋមន្ត្រី ហ៊ុន សែន។
ទោះជាយ៉ាងណា នៅវេទិកាសម្ពោធដាក់ឲ្យប្រើប្រាស់ផ្លូវលេខ១៤៦B តភ្ជាប់ទៅផ្លូវលេខ១៤៨ កាលពីថ្ងៃទី២២ ខែ ធ្នូកន្លងទៅ លោក ហ៊ុន សែនបានរំលឹកដល់លោក សម រង្ស៊ីឱ្យសងលុយដែលនៅជំពាក់៣០ម៉ឺនដុល្លារទៀត បន្ទាប់ពីលោកបានទទួលប្រាក់សំណង៧០ម៉ឺនដុល្លារក្រោយតុលាការចេញដីកាសម្រេចរឹបអូសទីស្នាក់ការអតីតគណបក្សសង្គ្រោះជាតិយកទៅលក់ឡៃឡុងកាលពីពាក់កណ្តាលខែ វិច្ឆិកា ឆ្នាំ២០២១៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ