ក្រុមកូដករណាហ្គាវើលដ៍ ដាក់លិខិតសុំតុលាការបំភ្លឺពីលក្ខខណ្ឌ ដែលពួកគេត្រូវដាក់ក្រោមការឃ្លាំមើល
ក្រុមកូដករណាហ្គាវើលដ៍ នៅថ្ងៃចន្ទនេះ បានដាក់លិខិតមួយច្បាប់ ស្នើសុំតុលាការក្រុងភ្នំពេញ បំភ្លឺអំពីលក្ខខណ្ឌដែលតុលាការបានដាក់ពួកគេឲ្យស្ថិតក្រោមការឃ្លាំមើលតាមផ្លូវច្បាប់។ ការដាក់លិខិតសុំការបំភ្លឺនេះ ធ្វើឡើងបន្ទាប់ពីក្រុមកូដករណាហ្គាវើលដ៍ ព្រួយបារម្ភអំពីការចាប់ខ្លួន ដូចករណីសហជីព កញ្ញា ឈឹម ស៊ីថរ ដែលតុលាការប្រើប្រាស់វិធានការច្បាប់ ដើម្បីឃុំឃាំងនៅពន្ធនាគារ។
ចុះផ្សាយនៅថ្ងៃ៖
ស្តាប់ - ០១:៥៣
ក្រុមកូដករណាហ្គាវើលដ៍បានអះអាងថា ការដាក់លិខិតនេះ គឺដើម្បីដឹងថា តើក្រុមកូដករណាហ្គាវើលដ៍ត្រូវដាក់ឲ្យស្ថិតក្រោមលក្ខខណ្ឌឃ្លាំមើលយ៉ាងណាខ្លះ? បើតាមក្រុមកូដករ គឺក្រោយពេលដែលពួកគេត្រូវបានដោះលែងពីការឃុំឃាំងរួចហើយ នៅមិនទាន់ទទួលបានលិខិតបញ្ជាក់ថា ពួកគេស្ថិតក្នុងលក្ខខណ្ឌបម្រាមសកម្មភាពអ្វីខ្លះពីតុលាការនៅឡើយ។
កញ្ញា ឈឹម សុខន តំណាងក្រុមកូដករ ដែលបានដាក់លិខិតចូលទៅតុលាការក្រុងភ្នំពេញ នាព្រឹកនេះ បានបញ្ជាក់ប្រាប់អ្នកសារព័ត៌មានថា ក្រុមកូដករចង់ដឹងអំពីបម្រាមរបស់តុលាការមកលើពួកគេ តួយ៉ាង តើមិនអនុញ្ញាតឲ្យក្រុមកូដករចេញទៅក្រៅប្រទេស ជាដើម។ បើតាមកញ្ញា ឈឹម សុខន មិនមែនក្រុមកូដករមិនចង់គោរពតាមបម្រាមរបស់តុលាការនោះទេ។ ក៏ប៉ុន្តែដោយសារក្រុមអ្នកតវ៉ាណាហ្គាវើលដ៍ មិនបានដឹងថា បម្រាមរបស់តុលាការដែលបង្គាប់ពួកគេតាំងពីឆ្នាំ២០២២មកនោះ មានអ្វីខ្លះ។
បើតាមក្រុមអ្នកតវ៉ាណាហ្គាវើលដ៍ គឺសង្ឃឹមថា តុលាការនឹងបំភ្លឺអំពីលក្ខខណ្ឌ និងបម្រាមទាំងនោះ ក្រោយពួកគេបានដាក់លិខិតទៅសាលាដំបូងភ្នំពេញ នាព្រឹកនេះ។
ទឡ្ហីករណ៍កញ្ញា ឈឹម ស៊ីថរ បានធ្វើឲ្យក្រុមកូដករណាហ្គាវើលដ៍មួយចំនួន បង្ហាញក្តីកង្វល់អំពីការប្រើប្រាស់វិធានការច្បាប់មកលើពួកគេ ដ្បិតដីកាបង្គាប់កន្លងមក គឺតុលាការសាលាដំបូងរាជធានីភ្នំពេញ បានដាក់ពួកគេឲ្យស្ថិតក្រោមលក្ខខណ្ឌឃ្លាំមើលសកម្មភាពតាមផ្លូវច្បាប់។
កញ្ញា ឈឹម ស៊ីថរ សហជីពតំណាងកម្មករណាហ្គាវើលដ៍ ត្រូវបានអាជ្ញាធរចាប់ខ្លួនជាថ្មីម្តងទៀត កាលពីចុងខែវិច្ឆិកា ដោយអាជ្ញាធរចោទប្រកាន់ថា សហជីពរូបនេះបានរំលោភលក្ខខណ្ឌដែលហាមឃាត់មិនឱ្យចាកចេញពីប្រទេស។ មកដល់ពេលនេះ មេសហជីពរូបនេះ បានស្ថិតនៅក្នុងដំណាក់ឃុំឃាំងរបស់តុលាការ ខណៈដែលការទាមទារឲ្យដោះលែងកន្លងមក មិនត្រូវតុលាការអើពើ។
យ៉ាងណាមិញ ក្រុមកូដករណាហ្គាវើលដ៍ នៅតែរក្សាជំហរដដែល ថាកញ្ញា ឈឹម ស៊ីថរ មិនមានទោសទណ្ឌ ខណៈដែលក្រុមអ្នកតវ៉ាទាំងនោះ នៅតែបន្តកូដកម្មប្រឆាំងនឹងការបញ្ឈប់បុគ្គលិកនៃក្រុមហ៊ុនណាហ្គាវើលដ៍ បើទោះបីជាមិនមានមេសហជីពរបស់ខ្លួនតំណាងក៏ដោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ