លោក ហ៊ុន សែន ថាកំពុងពិចារណាកែរដ្ឋធម្មនុញ្ញកំណត់សញ្ជាតិតែមួយសម្រាប់អ្នកនយោបាយ
ប្រមុខរដ្ឋាភិបាលកម្ពុជានៅថ្ងៃចន្ទនេះ បានថ្លែងថាលោកកំពុងពិចារណាធ្វើវិសោធនកម្មរដ្ឋធម្មនុញ្ញ ដើម្បីកំណត់សញ្ជាតិតែមួយសម្រាប់អ្នកនយោបាយខ្មែរ ព្រមទាំងមន្ត្រីរាជការ និងកងកម្លាំងប្រដាប់អាវុធ ខណៈដែលបច្ចុប្បន្នការកំណត់សញ្ជាតិតែមួយបានដៅតែទៅលើឥស្សរជនចំនួន១៣រូបប៉ុណ្ណោះ។ ការព្រលយបែបនេះរបស់លោក ហ៊ុន សែន ដោយសារតែលោកសំដែងការធុញទ្រាន់នឹងអ្នកកាទូតបរទេសមួយចំនួន តែងតែលើកឡើងពីបញ្ហាអ្នកនយោបាយដែលមានសញ្ជាតិបរទេសកំពុងជាប់ឃុំ ឬមានបញ្ហាផ្លូវច្បាប់នៅកម្ពុជា។
ចុះផ្សាយនៅថ្ងៃ៖
ស្តាប់ - ០២:០៥
នៅក្នុងពិធីបើកការដ្ឋានពង្រីកកំណាត់ផ្លូវជាតិលេខ៧ពីស្គន់ ទៅក្រុងកំពង់ចាម លោកនាយករដ្ឋមន្ត្រី ហ៊ុន សែន ទទួលស្គាល់ថា ការធ្វើវិសោធនកម្ម ឬកែរដ្ឋធម្មនុញ្ញជាច្បាប់កំពូលដើម្បីកំណត់សញ្ជាតិតែមួយសម្រាប់អ្នកនយោបាយខ្មែរ គឺនឹងប៉ះពាល់ផលផងដែរ ទៅលើសមាជិកជាន់ខ្ពស់របស់គណបក្សប្រជាជនកម្ពុជា។ តែលោកហ៊ានអះអាងថា ពួកគេ អាចនឹងលះបង់សញ្ជាតិបរទេសចោល ប្រសិនមានការកំណត់បែបនេះនោះ។
សម្រាប់លោក ហ៊ុន សែន គឺគ្មានឡើយឧបសគ្គក្នុងការកែរដ្ឋធម្មនុញ្ញ ដើម្បីកំណត់សញ្ជាតិតែមួយពង្រីងទៅលើអ្នកនយោបាយជាទូទៅនោះ ខណៈច្បាប់កំពូលនេះទើបកែប្រែ និងចូលជាធរមានកាលពីថ្ងៃទី៣ ខែវិច្ឆិកា ឆ្នាំ២០២១។ ការកំណត់សញ្ជាតិតែមួយកន្លងមក គឺបានដៅតែទៅលើឥស្សរជនចំនួន១៣រូបប៉ុណ្ណោះ ដែលកាន់តំណែងជានាយករដ្ឋមន្ត្រី ប្រធានសភា ប្រធានព្រឹទ្ធសភា ប្រធានក្រុមប្រឹក្សាធម្មនុញ្ញ និងសមាជិកទាំង៩រូបរបស់គណៈកម្មាធិការជាតិរៀបចំការបោះឆ្នោត។
មូលហេតុចំបងដែលប្រមុខរដ្ឋាភិបាលកម្ពុជាបង្ហាញចេតនាចង់កំណត់សញ្ជាតិតែមួយពង្រីកវិសាលភាពគ្របដណ្តប់ទៅលើអ្នកនយោបាយទាំងអស់នោះ គឺដោយសារតែលោកសំដែងការធុញទ្រាន់ ខណៈអ្នកកាទូតបរទេសមួយចំនួនតែងតែលើកឡើងពីបញ្ហាអ្នកនយោបាយដែលមានសញ្ជាតិបរទេសកំពុងជាប់ឃុំ ឬមានបញ្ហាផ្លូវច្បាប់នៅកម្ពុជា។
អ្នកនយោបាយខ្មែរដែលមានសញ្ជាតិបរទេសកំពុងជាប់បណ្តឹងនៅតុលាការ តួយ៉ាង លោក សុន ឆ័យ អនុប្រធានគណបក្សភ្លើងទៀន ដែលត្រូវបានបង្គាប់ឲ្យសងជំងឺចិត្តទៅគណបក្សប្រជាជនកម្ពុជា១លានដុល្លារក្នុងបទបរិហាកេរ្តិ៍ ខណៈកញ្ញា សេង ធារី មេធាវីខ្មែរសញ្ជាតិអាមេរិកាំងកំពុងជាប់ពន្ធនាគារនៅខេត្តព្រះវិហារ។
កាលពីជំនួបទ្វេភាគីរវាងប្រធានាធិបតីអាមេរិក លោក ចូ បៃឌិន និងលោក ហ៊ុន សែន កាលពីខែវិច្ឆិកានៅក្រៅកិច្ចប្រជុំកំពូលអាស៊ាន ក្រសួងការបរទេសអាមេរិកបានគូសបញ្ជាក់ថា លោក ចូ បៃឌិន បានស្នើឲ្យលោក ហ៊ុន សែន ដោះលែងកញ្ញា សេង ធារី និងអ្នកទោសមនសិកាដទៃទៀត។ ប៉ុន្តែលោក ហ៊ុន សែន អះអាងថា លោកមិនបានឭប្រធានាធិបតីអាមេរិកនិយាយពីរឿងឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ