អាជ្ញាធរកោះហៅមេដឹកនាំសង្គមស៊ីវិល៤រូបទៅសួររឿងបង្ហោះចម្រៀង«ឈាមបាតុករ»
មេដឹកនាំអង្គការសង្គមស៊ីវិលចំនួន៤នាក់ ត្រូវបានប៉ូលីសក្រុងភ្នំពេញចេញលិខិតឲ្យទៅបំភ្លឺរឿងបង្ហោះបទចម្រៀងដែលមានចំណងជើងថា«ឈាមបាតុករ»។ លិខិតអញ្ជើញរបស់ប៉ូលីសក្រុងបានដាក់កាលបរិច្ឆេទដូចៗគ្នា គឺថ្ងៃទី០៧ ខែមករា ឆ្នាំ២០២៣ ក៏ប៉ុន្តែការបំភ្លឺតម្រូវឲ្យមេដឹកនាំសង្គមស៊ីវិលចូលទៅថ្ងៃផ្សេងៗគ្នាចាប់តាំងពីថ្ងៃទី០៩ ដល់ថ្ងៃទី១១ ខែមករានេះ។ ការកោះហៅសកម្មជនសង្គមស៊ីវិលទៅបំភ្លឺពេលនេះ ធ្វើឡើងបន្ទាប់ពីមានការស្នើសុំពីក្រសួងវប្បធម៌កាលពីថ្ងៃទី០៦ ខែមករាកន្លងទៅ។
ចុះផ្សាយនៅថ្ងៃ៖
ស្តាប់ - ០២:២៥
មេដឹកនាំអង្គការសង្គមស៊ីវិល ដែលស្នងការប៉ូលីសក្រុងភ្នំពេញការិយាល័យប្រឆាំងបទល្មើសបច្ចេកវិទ្យាកោះហៅទៅសាកសួរនោះមាន លោក អំ សំអាត នាយកប្រតិបត្តិអង្គការសិទ្ធិមនុស្សលីកាដូ ដែលត្រូវចូលទៅនៅថ្ងៃទី០៩ ខែមករានេះ។ លោក វន់ ពៅ ប្រធានសហភាពផ្ទះសាមគ្គី លោក មឿន តុលា ប្រធាអង្គការសម្ព័ន្ធភាពការងារ និងសិទ្ធិមនុស្ស(សង់ត្រាល់) ត្រូវចូលទៅស្នងការថ្ងៃទី១០ ខែមករា និងលោក ថេង សាវឿន ប្រធានអង្គការសម្ព័ន្ធសហគមន៍កសិករកម្ពុជា ត្រូវចូលទៅថ្ងៃទី១១ ខែមករា។
តាមលិខិតអញ្ជើញចំនួន៤ផ្សេងៗគ្នា មេដឹកនាំអង្គការសង្គមស៊ីវិលទាំង៤រូប ត្រូវប៉ូលីសក្រុងភ្នំពេញបញ្ជាក់ថាចូលទៅបំភ្លឺរឿងបង្ហោះចម្រៀងអមដោយរូបភាពមានចំណងជើងថា«ឈាមបាតុករ»។ បទចម្រៀងឈាមបាតុករនេះ គឺជាប្រភេទចម្រៀងរ៉េប ដែលដែលច្រៀង និងនិពន្ធដោយលោក គា សុគន្ធ រៀបរាប់ពីការប្រឈបមុខដាក់គ្នាដោយហឹង្សាររវាងបាតុករដែលជាកម្មករកាត់ដេរ និងកងកម្លាំងរដ្ឋាភិបាលនៅតាមបណ្តោយផ្លូវវេងស្រេង កាលពី៩ឆ្នាំមុន។
បទចម្រៀងក៏ក្តោបទៅលើខ្លឹមសារទាមទាររកយុត្តិធម៌ និងការចងចាំ ដែលបាតុករប្រដាប់ដោយដំបង និងដុំថ្ម ទាមទារតម្លើងប្រាក់ឈ្នួល ហើយរងការបង្ក្រាបបង្ហូរឈាមពីកងកម្លាំងរដ្ឋាភិបាល ដោយមេដឹកនាំសង្គមស៊ីវិលបង្ហាញរបាយការណ៍ថាមានមនុស្ស៤នាក់ស្លាប់ និងជិត៤០រងរបួស។
សូមរំលឹកថា កាលពីថ្ងៃទី០៨ ខែមករាកន្លងទៅ ក្រសួងវប្បធម៌បានចេញលិខិតមួយច្បាប់ទៅកាន់លោក នេត សាវឿន អគ្គស្នងការនគរបាលជាតិ ស្នើសុំផ្តល់កិច្ចអន្តរាគមន៍ចាត់វិធានការទប់ស្កាត់បណ្តាញប្រព័ន្ធព័ត៌មានសង្គម ដែលបានយកបទចម្រៀងអមដោយរូបភាពក្រោមចំណងជើងថា«ឈាមបាតុករ» ទៅបង្ហោះផ្សព្វផ្សាយ។
ការស្នើឲ្យប៉ូលីសចាត់វិធានការនេះ ក្រោយអង្គការលីកាដូ អង្គការសង់ត្រាល់ អង្គការ IDEA CAMBODIA របស់លោក វន់ ពៅ និងអង្គការសម្ព័ន្ធសហគមន៍កសិករកម្ពុជា ព្រមទាំងមានការចែករំលែកជាលក្ខណៈបុគ្គលជាច្រើនទៀតផង បាននាំគ្នាបង្ហោះបទចម្រៀងនេះចាប់តាំងពីថ្ងៃទី០៣ ខែមករាមក។
ទោះយ៉ាងណា ក្រសួងវប្បធម៌បានចាត់ទុកថាខ្លឹមសារនៃបទចម្រៀង«ឈាមបាតុករ»នេះ បង្ហាញពីការអុជអាល ញុះញង់ អចនឹងបង្កអសន្តិសុខសណ្តាប់ធ្នាប់ដល់សង្គម។ ក៏ប៉ុន្តែក្រុមអង្គការសង្គមស៊ីវិលយល់ថាបទចម្រៀងនេះ បានឆ្លុះបញ្ចាំងពីការពិត ដែលជាសេរីភាពនៃការសម្តែងមតិ និងជាមធ្យោបាយដើម្បីទាមទាររកយុត្តិធម៌៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ