អ្នកសេដ្ឋកិច្ច៖ ការគិតគូសាងសង់ផ្លូវរថភ្លើងល្បឿនលឿនរបស់រដ្ឋាភិបាលគឺជារឿងអាទិភាព
អ្នកជំនាញសេដ្ឋកិច្ចយល់ថាការសិក្សាគម្រោងសាងសង់ផ្លូវរថភ្លើងល្បឿនលឿនពីភ្នំពេញទៅព្រះសីហនុ និងពីភ្នំពេញទៅក្រុងប៉ោយប៉ែតពីសំណាក់រដ្ឋាភិបាល គឺជារឿងអាទិភាពដែលចាំបាច់ត្រូវតែធ្វើ ដើម្បីជំរុញដល់វិស័យដឹកជញ្ជូននៅកម្ពុជាកាន់តែឆាប់រហ័ស ហើយចំណេញពេលវេលា។ ក្រៅពីនេះការមានផ្លូវរថភ្លើងល្បឿនលឿន ក៏ជាផ្នែកមួយកាត់បន្ថយការដឹកជញ្ជូនតាមផ្លូវគោកនាំឱ្យខូចផ្លូវ ខាតបង់ថវិកាជួសជុល និងកាត់បន្ថយគ្រោះថ្នាក់ចរាចរណ៍ជាដើម។
ចុះផ្សាយនៅថ្ងៃ៖
ស្តាប់ - ០១:៣០
លោកបណ្ឌិត ហុង វណ្ណៈ អ្នកជំនាញសេដ្ឋកិច្ចនៃវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជា បានលើកឡើងថា គម្រោងសាងសង់ផ្លូវរថភ្លើងល្បឿនលឿនរបស់រដ្ឋាភិបាលជាផ្នែកមួយនៃសសៃឈាមសេដ្ឋកិច្ច ដែលកម្ពុជាគួរតែធ្វើការសាងសង់ឲ្យបានឆាប់ ខណៈប្រទេសជិតខាងគេបានធ្វើផ្លូវរថភ្លើងល្បឿនលឿននេះ ហើយគេបាននិងកំពុងសិក្សាធ្វើនៅកន្លែងផ្សេងៗទៀត។ បើតាមលោក ហុង វណ្ណៈ ការមានផ្លូវរថភ្លើងល្បឿនលឿន នឹងធ្វើឱ្យវិស័យដឹកជញ្ជូននៅកម្ពុជាកាន់ប្រសើរថែមទៀត និងជាផ្នែកមួយកាត់បន្ថយផលប៉ះពាល់សម្រាប់ការដឹកជញ្ជូនដែរ។
ជាមួយគ្នានេះលោកឧកញ៉ា ស៊ិន ចាន្ធី ប្រធានសមាគមភស្តភារ ក៏គាំទ្រចំពោះការសិក្សាគម្រោងសាងសង់ផ្លូវរថភ្លើងល្បឿនលឿនពីភ្នំពេញទៅព្រះសីហនុ និងពីភ្នំពេញទៅក្រុងប៉ោយប៉ែតផងដែរ។ បើតាមលោកឧកញ៉ា ស៊ិន ចាន្ធី ការដឹកជញ្ជូនតាមផ្លូវគោក គឺផ្លូវរថភ្លើងល្បឿនលឿននេះហើយជាសក្ដានុពលដ៏មានសារសំខាន់ក្នុងវិស័យដឹកជញ្ជូន ជាពិសេសធ្វើឲ្យចំនេញពេលវេលា ហើយដឹកជញ្ជូនបានច្រើន មិនធ្វើឲ្យប៉ះពាល់ដូចការដឹកជញ្ជូនតាមផ្លូវថ្នល់ នាំឲ្យខូចខាតផ្លូវជាដើម។
សូមបញ្ជាក់ថា លោកនាយករដ្ឋមន្រ្តី ហ៊ុន សែន បានជំរុញក្រសួងសេដ្ឋកិច្ច និងហរិញ្ញវត្ថុ និងក្រសួងសាធារណការ និងដឹកជញ្ជូន ឱ្យពន្លឿនការសិក្សាគម្រោងសាងសង់ផ្លូវរថភ្លើងល្បឿនលឿន ពីភ្នំពេញទៅព្រះសីហនុ និងពីភ្នំពេញទៅក្រុងប៉ោយប៉ែត។ ការលើកឡើងរបស់លោក បានធ្វើឡើងនៅក្នុងកិច្ចប្រជុំពេញអង្គគណៈរដ្ឋមន្ត្រី នៅថ្ងៃទី១៣ ខែមករា។
បើតាមលោក ហ៊ុន សែន ការទៅបំពេញទស្សនកិច្ចនៅប្រទេសចិននៅខែក្រោយនេះ លោកនឹងស្នើសុំការគាំទ្រពីចិនទាក់ទងការសិក្សាគម្រោងសាងសង់ផ្លូវរថភ្លើងល្បឿនលឿននេះផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ