សមាគមដឹកជញ្ចូន ស្នើឱ្យក្រុមហ៊ុនសម្រួលតម្លៃបន្ថែម ក្រោយរថយន្តដឹកទំនិញមិនសូវប្រើប្រាស់ផ្លូវល្បឿនលឿន
សមាគមភស្តុភារកម្មកម្ពុជាស្នើឱ្យរដ្ឋាភិបាលបញ្ចុះតម្លៃសេវានៃការប្រើប្រាស់ផ្លូវល្បឿនលឿនសម្រាប់ប្រភេទរថយន្តដឹកទំនិញធន់ធ្ងន់ឱ្យស្ថិតក្នុងតម្លៃមួយសមរម្យដែលអាចទទួលយកបាន។ ការស្នើនេះ ធ្វើឡើងបន្ទាប់ពីសមាគមមើលឃើញថា ការប្រើប្រាស់ផ្លូវល្បឿនលឿនពីសំណាក់រថយន្តដឹកទំនិញប្រភេទកុងតឺន័រ នៅមានចំនួនតិចតូចនៅឡើយ បើធៀបនឹងរថយន្តទេសចរណ៍ និងរថយន្តលក្ខណៈគ្រួសារ។ បើតាមសមាគម ចំនួនតិចតូចនេះ គឺដោយសារតែតម្លៃសេវានៃការប្រើប្រាស់ផ្លូវល្បឿនលឿនបន្តចោទជាបញ្ហា បើទោះបីក្រុមហ៊ុនផ្លូវល្បឿនលឿនបានបញ្ចុះតម្លៃ២០ភាគរយសម្រាប់ឆ្នាំដំបូងយ៉ាងណាក្តី។
ចុះផ្សាយនៅថ្ងៃ៖
ស្តាប់ - ០២:៣២
លោកឧកញ៉ា ស៊ិន ចន្ធី ប្រធានសមាគមភស្តុភារកម្មកម្ពុជាបានអះអាងថា ហេតុផលដែលរថយន្តប្រភេទដឹកទំនិញមិនសូវប្រើប្រាស់ផ្លូវល្បឿនលឿនភ្នំពេញ-ព្រះសីហនុ ច្រើនដូចលក្ខណៈរថយន្តទេសចរណ៍ និងគ្រួសារ គឺដោយសារតែថ្លៃសេវាប្រើប្រាស់នៅមានតម្លៃខ្ពស់ពេក ពោលគឺមានតម្លៃជាង១០០ដុល្លារសម្រាប់ការធ្វើដំណើរទៅ-មក ខណៈរថយន្តដឹកទំនិញរបស់ក្រុមហ៊ុនភាគច្រើនជាប្រភេទរថយន្តមួយទឹក និងមានសភាពចាស់ដែលមិនសមស្របទៅនឹងលក្ខខណ្ឌប្រើប្រាស់ផ្លូវល្បឿនលឿន។ ចំណែក តម្លៃសណ្តោងរថយន្តនៅពេលមានករណីអាសន្ន ឬខូច ក៏មានតម្លៃថ្លៃថែមទៀត។
ម្ល៉ោះហើយ លោកឧកញ៉ាចាត់ទុកថា ហេតុផលទាំងអស់នេះហើយ ទើបរថយន្តដឹកទំនិញប្រភេទកុងតឺន័រ មានការរារែកមិនប្រើប្រាស់ផ្លូវល្បឿនលឿន បើទោះបីភាគីក្រុមហ៊ុនបានបញ្ចុះតម្លៃ២០ភាគរយសម្រាប់ឆ្នាំដំបូងយ៉ាងណាក្តី និងត្បិតថា ការប្រើប្រាស់ផ្លូវល្បឿនលឿនអាចចំណេញពេលវេលា។ ប៉ុន្តែទិន្នាការបច្ចុប្បន្ន ផលចំណេញលើតម្លៃដឹកជញ្ចូនរបស់ក្រុមហ៊ុនកំពុងធ្លាក់ចុះ ដែលធ្វើឱ្យក្រុមហ៊ុនមិនមានលទ្ធភាពគ្រប់គ្រាន់ក្នុងការដឹកទំនិញលើផ្លូវល្បឿនលឿន។
បើតាមប្រធានសមាគមរូបនេះ ការខ្សត់រថយន្តដឹកទំនិញលើផ្លូវល្បឿនលឿនភ្នំពេញ-ព្រះសីហនុ គឺឆ្លុះបញ្ចាំងឱ្យឃើញពីសញ្ញាណអវិជ្ជមានចំពោះការវិនិយោគផ្លូវល្បឿនលឿននេះ។ អវិជ្ជមានដ៏ហេតុថា ផ្លូវល្បឿនលឿនមិនបានផ្តល់ឱកាសឱ្យរថយន្តដឹកទំនិញទទួលបានការប្រើប្រាស់ក្នុងតម្លៃសមរម្យ ដើម្បីជួយជំរុញកំណើន និងចរន្តសេដ្ឋកិច្ចជាតិ។
ទាក់ទិននឹងការប្រើប្រាស់ផ្លូវល្បឿនលឿននេះ លោកនាយករដ្ឋមន្ត្រី ហ៊ុន សែន កាលពីថ្ងៃទី២២ ខែធ្នូ ឆ្នាំ២០២២ក៏បានអំពាវនាវដល់បណ្តាក្រុមហ៊ុនដឹកជញ្ចូនទំនិញដែលធ្លាប់ប្រើប្រាស់ផ្លូវជាតិលេខ៤ឱ្យងាកមកដឹកទំនិញតាមផ្លូវល្បឿនលឿនជំនួសវិញ ដោយលោកនាយករដ្ឋមន្ត្រីលើកហេតុផលថា ការប្រើប្រាស់ផ្លូវល្បឿនលឿនអាចចំណេញវេលា និងថវិកាច្រើន។ ការអំពាវនាវបែបនេះ ធ្វើឡើងក្រោយលោកនាយករដ្ឋមន្ត្រីសង្កេតឃើញថា ការដឹកជញ្ចូនតាមផ្លូវល្បឿនលឿនពីសំណាក់រថយន្តដឹកទំនិញមិនសូវមានចំនួន បើធៀបនឹងរថយន្តទេសចរណ៍ និងរថយន្តលក្ខណៈគ្រួសារ។
សូមជម្រាបថា ផ្លូវល្បឿនលឿននេះសាងសង់ដោយក្រុមហ៊ុន PPSHV Expressway Co., Ltd និងក្រុមហ៊ុនបុត្រសម្ព័ន្ធនៃ ក្រុមហ៊ុនសាជីវកម្មស្ពានថ្នល់ចិន (CRBC) ដោយចំណាយថវិកាជិត ២ពាន់លានដុល្លារ។ ផ្លូវនេះមានផ្លូវបំបែកទិស ៧កន្លែង មានកន្លែងឈប់សម្រាកចំនួន ៣កន្លែង ចំណតរថយន្ត១កន្លែង មណ្ឌលប្រតិបត្តិការ និងថែទាំចំនួន ៤កន្លែង ស្ពានធំ និងស្ពានមធ្យមចំនួន៤០កន្លែង ស្ពានតូចចំនួន៥កន្លែង ដែលឆ្លងកាត់រាជធានីភ្នំពេញ និងខេត្តចំនួន០៤បួនក្នុងនោះរួមមាន៖ ខេត្តកណ្តាល ខេត្តកំពង់ស្ពឺ ខេត្តកោះកុង និងខេត្តព្រះសីហនុប្រវែង។ ចំណែករាល់ការធ្វើដំណើរ ក្រុមហ៊ុនវិនិយោគ នឹងយកថ្លៃធ្វើដំណើរឆ្លងកាត់ផ្លូវល្បឿនលឿននេះ ចាប់ពី ១២ដុល្លារ ដល់ ៦០ដុល្លារ តាមប្រភេទយានយន្ត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ