លោក ហ៊ុន សែន បញ្ជាឲ្យអាជ្ញាធរខេត្តសម្របសម្រួលជាមួយម្ចាស់ដីរុះរបងថ្មលើឆ្នេរអូរឈើទាលចេញ
របងថ្មរឹងមាំ ដែលត្រូវបានសាងសង់ឡើងនៅលើឆ្នេរខ្សាច់អូរឈើទាលទំហំជិត១ហិចតា នៃខេត្តព្រះសីហនុ ត្រូវបានវាយចោលវិញហើយកាលពីយប់ថ្ងៃទី០៨ ខែកុម្ភៈ ម្សិលមិញ។ លោក ឡុង ឌីម៉ង់ អភិបាលរងខេត្តព្រះសីហនុបានប្រាប់វិទ្យុបារាំងអន្តរជាតិ RFI នៅថ្ងៃព្រហស្បតិ៍នេះថា ម្ចាស់ទីតាំងបានរុះរើរបងថ្ម១ផ្នែកបែរទៅសមុទ្រហើយ ក្រោយពីមានបញ្ជាពីលោកនាយករដ្ឋមន្ត្រី ហ៊ុន សែន មករដ្ឋបាលខេត្តព្រះសីហនុ។ ក៏ប៉ុន្តែថាតើរបងថ្មនេះត្រូវវាយចោលវិញទាំងស្រុង ឬក៏រដ្ឋត្រូវដកហូតដីយកវិញ ធ្វើជាកម្មសិទ្ធិសាធារណៈរបស់រដ្ឋ ប្រសិនបើខុសច្បាប់ ឬយ៉ាងណានោះ វាជារឿងហួសសមត្ថកិច្ចរបស់អាជ្ញាធរខេត្ត ហើយករណីនេះវាជាការសម្រេចរបស់រដ្ឋាភិបាល។ នេះបើតាម លោកឡុង ឌីម៉ង់។
ចុះផ្សាយនៅថ្ងៃ៖
សូមស្តាប់លោកឡុង ឌីម៉ង់៖
សូមបញ្ជាក់ថាបន្ទាប់ពីមានការសាងសង់របងថ្មរឹងមាំកាលពីពេលថ្មីៗនេះ នៅលើឆ្នេរខ្សាច់អូរឈើទាលនៃខេត្តព្រះសីហនុ មហាជនបានសម្តែងនូវប្រតិកម្មព្រោងព្រាធជាពិសេសតាមរយៈបណ្តាញសង្គម និងប្រព័ន្ធផ្សព្វផ្សាយនានា ជម្រុញឲ្យអាជ្ញាធរ ក៏ដូចជារដ្ឋាភិបាលវាយកំទេចចោល និងដកហូតយកមកវិញទុកជាសម្បត្តិសាធារណៈរបស់រដ្ឋ។ ប្រតិកម្មរិះគន់របស់មហាជនយ៉ាងផុលផុសនេះ ក៏ព្រោះតែពួកគេពិនិត្យមើលទៅខុសនឹងច្បាប់ភូមិបាល ហើយក៏ផ្ទុយនឹងអនុសាសន៍របស់ប្រមុខរដ្ឋាភិបាល ដែលបានថ្លែងកាលពីឆ្នាំ២០២០ នៅខេត្តព្រះសីហនុផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ