UNនៅកម្ពុជាអំពាវនាវយុវវ័យត្រូវប្រុងប្រយ័ត្ននិងការពារខ្លួនពីការឆ្លងជំងឺអេដស៍
តំណាងអង្គការសហប្រជាជាតិប្រចាំនៅកម្ពុជាបានអំពាវនាវឲ្យមានការប្រុងប្រយ័ត្ន និងការពារពីករណីឆ្លងជំងឺអេដស៍ ខណៈនៅកម្ពុជាក្នុងចំណោមយុវវ័យដែលមានអាយុពី ១៥ដល់២៤ឆ្នាំ ក្នុងនោះបុរសវ័យក្មេងមានរហូតដល់ ៤១% បានឆ្លងជំងឺអេដស៍ថ្មី និងស្រ្តីវ័យក្មេងមានរហូតដល់ ៣៧% បានឆ្លងជំងឺអេដស៍ថ្មី។ ការអំពាវនាវនេះ ត្រូវគេកត់សម្គាល់ឃើញថាធ្វើឡើងចំពេលបុណ្យនៃសេចក្ដីស្រលាញ់ ១៤កុម្ភៈ ជាថ្ងៃដែលយុវវ័យមួយចំនួនភ្លើតភ្លើនភ្លេចខ្លួន ងាយនឹងឆ្លងនូវជំងឺអេដស៍នេះ។
ចុះផ្សាយនៅថ្ងៃ៖
ស្តាប់ - ០២:០៨
បើតាមអង្គការសហប្រជាជាតិនៅកម្ពុជា នេះជាសមាមាត្រខ្ពស់បំផុតនៃការប៉ាន់ប្រមាណការឆ្លងថ្មីនៃមេរោគអេដស៍នៅក្នុងប្រទេសកម្ពុជា ដូច្នេះត្រូវប្រុងប្រយ័ត្ន និងការពារ។ របាយការណ៍នៃការឆ្លងជំងឺអេដស៍ថ្មីនៅកម្ពុជានេះ ត្រូវបានអង្គការសហប្រជាជាតិប្រចាំកម្ពុជាដកស្រង់មកពីរបាយការណ៍របស់អង្គការUNAIDS ឆ្នាំ២០២២ ខណៈអង្គការUNAIDSនេះ បានអះអាងថា នៅប្រទេសកម្ពុជា គឺជារៀងរាល់ថ្ងៃមនុស្សចំនួន ៣នាក់ឆ្លងនូវមេរោគអេដស៍។
ក្នុងរបាយការណ៍របស់អង្គការUNAIDS ឆ្នាំ២០២២ បានបញ្ជាក់ថា ក្នុងចំណោមយុវវ័យដែលមានអាយុពី ១៥-២៤ឆ្នាំ ជាបុរសវ័យក្មេងមានរហូតដល់ ៤១% នៃអ្នកឆ្លងថ្មីក្នុងចំណោមបុរស ហើយស្ត្រីវ័យក្មេងមានរហូតដល់ ៣៧% នៃអ្នកឆ្លងថ្មីក្នុងចំណោមស្រ្តី។ របាយការណ៍នេះ ត្រូវបានអង្គការសហប្រជាជាតិនៅកម្ពុជា ដកស្រង់យកមកបង្ហោះនៅលើទំព័រហ្វេសប៊ុក ដើម្បីដាស់តឿនពីការការពារខ្លួនកុំឲ្យឆ្លងជំងឺអេដស៍ និងជំងឺផ្សេងទៀត គឺត្រូវប្រើប្រាស់ស្រោមអនាម័យ។
យ៉ាងណាមិញរបាយការណ៍នៃអ្នកឆ្លងជំងឺអេដស៍នៅកម្ពុជា ដែលអង្គការសហប្រជាជាតិនៅកម្ពុជា យកមកបង្ហោះនៅលើបណ្ដាញសង្គមហ្វេសប៊ុកនេះ ត្រូវគេកត់សម្គាល់ឃើញផងដែរថា ធ្វើឡើងស្របពេល បុណ្យនៃទិវាសេចក្ដីស្រលាញ់ ១៤កុម្ភៈ ហាក់ដាស់ស្មារតីយុវវ័យនៅកម្ពុជា កុំភ្លើតភ្លើននឹងថ្ងៃនេះ ត្រូវប្រយ័ត្ន និងការពារខ្លួន កុំឲ្យឆ្លងនូវជំងឺអេដស៍។
សូមរំលឹកថា មេរោគអេដស៍បានផ្ទុះរីករាលដាលនៅកម្ពុជាខ្លាំងនៅឆ្នាំ១៩៩៨ ដែលមានអត្រាឆ្លងក្នុង១០០នាក់ក្នុងមួយថ្ងៃ ហើយនៅពេលនោះ គឺមានអ្នកផ្ទុកមេរោគអេដស៍រហូតជិត ១៧ម៉ឺននាក់។ ក្នុងរយៈពេលជិត២០ឆ្នាំមកនេះ ចំនួនអ្នកផ្ទុកមេរោគបានថយចុះមកនៅត្រឹម ៥៧០០០នាក់ ដែលអត្រាអ្នកឆ្លងមេរោគនេះ មានត្រឹម២នាក់ក្នុងមួយឆ្នាំ។
ការថយចុះនៃអ្នកឆ្លងនេះ ធ្វើឲ្យអង្គការសហប្រជាជាតិ បានចាត់ទុកកម្ពុជា ថាជាប្រទេសមួយ នៅក្នុងចំណោមប្រទេសចំនួន៦ ផ្សេងទៀតនៅទូទាំងពិភពលោក ដែលទទួលជោគជ័យនៃការសម្រេចបានមុន៣ឆ្នាំ នៃទិសដៅប្រឆាំងមេរោគអេដស៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ