អង្គការចំនួន៤០ស្នើឲ្យក្រសួងពាក់ព័ន្ធបង្គាប់ឲ្យលោក ផែង វណ្ណៈ សុំទោសជាសាធារណៈ
ក្រុមអង្គការសង្គមស៊ីវិលចំនួន៤០ស្ថាប័នរួមគ្នាស្នើទៅក្រសួងពាក់ព័ន្ធចំនួន៤ឲ្យមានចំណាត់ការលើលោក ផែង វណ្ណៈ ថាបានប្រមាថទៅលើស្ត្រីម្នាក់ជាអ្នកសារព័ត៌មានវីអូឌី។ លិខិតចំហដែលចេញថ្ងៃទី១៤កុម្ភៈនោះ បានធ្វើឡើង ខណៈដែលលោក ផែង វណ្ណៈ អះអាងថាខ្លួននឹងមិនសុំទោសចំពោះអ្វីដែលលោក បានសរសេរនៅលើហ្វេសប៊ុកនោះឡើយ ដោយថានេះគ្រាន់តែជាឧទាហរណ៍។
ចុះផ្សាយនៅថ្ងៃ៖
ស្តាប់ - ០១:៥០
នៅក្នុងសេចក្តីថ្លែងការណ៍រួមចុះថ្ងៃទី១៤កុម្ភៈ ក្រុមអង្គការផ្នែកសិទ្ធិស្ត្រី បានទទួចដល់ក្រសួងកិច្ចការនារី ក្រសួងវប្បធម៌ ក្រសួងព័ត៌មាន និងក្រសួងប្រៃសនីយ៍ បង្គាប់ឲ្យលោក ផែង វណ្ណៈ ត្រូវទទួលស្គាល់កំហុស និងកែតម្រូវពាក្យពេចន៍ប្រមាថ ម៉ាក់ងាយ និងសូមទៅសជាសាធារណៈចំពោះស្ត្រីម្នាក់ជាអ្នកសារព័ត៌មានវីអូឌី។
ក្រុមអង្គការចំនួន៤០នេះ ដែលនាំមុខដោយគណៈកម្មាធិការលប់បំបាត់ការរើសអើសស្ត្រី(NGO-CEDAW) តាមពីក្រោយអង្គការយែនឌ័រ និងអភិវឌ្ឍន៍(GADC) អង្គការក្លាហាន អង្គការបន្ទាយស្រី ជាដើមបានគូសបញ្ជាក់ថា អ្វីដែលលោក ផែង វណ្ណៈ បានសរសេរនោះគឺជាការប្រមាថម៉ាក់ងាយ ប៉ះពាល់ទៅដល់កិច្ចប្រឹងប្រែងរបស់រដ្ឋាភិបាលក្នុងការលើកកម្ពស់យែនឌ័រ ឆ្ពៅទៅសម្រេចគោលដៅឆ្នាំ២០២៣។
ក្រុមអង្គការទាំងនេះ បានស្នើឲ្យក្រសួងហៅលោក ផែង វណ្ណៈទៅរៀនសូត្រអំពីយែនឌ័រក្នុងវិស័យព័ត៌មាន ទប់ស្កាត់មាតិកាព័ត៌មានដែលបង្កប់ខ្លឹមសារប្រមាថដល់ស្រ្តី កុំឲ្យកើតមានបន្តទៀត។
សំណេររបស់លោក ផែង វណ្ណៈ គឺបន្ទាប់ពីស្ត្រីអ្នកសារព័ត៌មានវីអូឌីបានផ្សាយព័ត៌មានមួយពាក់ព័ន្ធនឹងលោក ហ៊ុន ម៉ាណែត ដែលនាំឲ្យមានប្រតិកម្មខ្លាំងៗពីលោកនាយករដ្ឋមន្ត្រី ហ៊ុន សែន និងទីបំផុតបានបញ្ជាឲ្យបិទអាជ្ញាប័នវីអូឌី។
លោកស្រី ស ស៊ីណែត អ្នកនាំពាក្យក្រសួងកិច្ចការនារីប្រាប់RFI កាលពីថ្ងៃចន្ទថា ស្ត្រីអ្នកសារព័ត៌មានVOD អាចដាក់ពាក្យប្តឹងទៅតុលាការ ។បើតាមអ្នកនាំពាក្យដដែល ករណីលោកផែង វណ្ណៈប្រើប្រាស់ពាក្យសម្តីមិនសមរម្យទៅលើអ្នកសារព័ត៌មានជាស្ត្រីនោះ គឺប៉ះពាល់យ៉ាងធ្ងន់ធ្ងរទៅលើសេចក្តីថ្លៃថ្នូរ និងកិត្តិយសរបស់សាមីខ្លួនជាខ្លាំង។
លោកស្រី ស ស៊ីណែត គូសបញ្ជាក់ថា ស្ត្រីអ្នកសារព័ត៌មានដែលរងការប្រមាថក៏មានសិទ្ធិពេលលេញក្នុងការស្វែងរកកិច្ចគាំទ្រផ្នែកច្បាប់ ជាពិសេសអាចដាក់ពាក្យប្តឹងទៅអាជ្ញាធរ និងសមត្ថកិច្ចដែលនៅជិតខ្លួនបំផុត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ