ក្រសួងកិច្ចការនារី ប្រឆាំងការប៉ះពាល់តម្លៃស្រ្តី ក្រោយមានសំណើបង្គាប់ឲ្យលោក ផែង វណ្ណៈ សុំទោសជាសាធារណៈ
ក្រសួងកិច្ចការនារី នៅថ្ងៃព្រហស្បត្តិ៍នេះ បានសំដែងនូវការសោកស្ដាយ និងមិនគាំទ្រចំពោះសកម្មភាពទាំងឡាយណា ដែលប៉ះពាល់ដល់តម្លៃស្រ្តីខ្មែរ។ ប្រតិកម្មរបស់ក្រសួងកិច្ចការនារីបានធ្វើឡើងមួយថ្ងៃ ក្រោយអង្កការសង្គមស៊ីវិលចំនួន៤០ បានដាក់សំណើឲ្យក្រសួងពាក់ព័ន្ធចំនួន៤ ក្នុងនោះមានក្រសួងកិច្ចការនារីផងដែរបង្គាប់ឲ្យលោក ផែង វណ្ណៈ ម្ចាស់គេហទំព័រព័ត៌មាន Pheng Vannak News សុំទោសជាសាធារណៈទាក់ទងទៅនឹងការប្រមាថស្រ្តី ដែលជាអ្នកសារព័ត៌មានVODកាលពីពេលថ្មីៗនេះ។
ចុះផ្សាយនៅថ្ងៃ៖
ស្តាប់ - ០២:៣៦
តាមរយៈសេចក្ដីប្រកាសព័ត៌មានចេញផ្សាយនៅថ្ងៃនេះ ក្រសួងកិច្ចការនារីបានបង្ហាញជំហរប្រឆាំងយ៉ាងដាច់ណាត់ ចំពោះសកម្មភាពនិងទង្វើដែលមានចរិតអសីលធម៍ ប៉ះពាល់ដល់កិត្តិយស សេចក្ដីថ្លៃថ្នូរ របស់ស្រ្តីខ្មែរ។ ជាសកម្មភាព ដែលក្រសួងចាត់ទុកថា ជាគំរូមិនល្អ ដល់យុវជន យុវតី កុមារា កុមារីជំនាន់ក្រោយ ដែលជាទំពាំងស្នងឬស្សី និងជាសរសរទ្រូងរបស់ប្រទេសជាតិ។
ទោះយ៉ាងណាសេចក្តីប្រកាសព័ត៌មានរបស់ក្រសួងកិច្ចការនារី គឺធ្វើឡើងជាទូទៅ ដោយមិនសំដៅទៅរកបុគ្គលណាម្នាក់នោះទេ ក៏ប៉ុន្តែគេអាចដឹងបានថាសេចក្តីប្រកាសនេះ គឺជាការឆ្លើយតបទៅនឹងសំណើរបស់ក្រុមអង្គការសង្គមស៊ីវិលចំនួន៤០ ដែលបានស្នើឲ្យក្រសួងពាក់ព័ន្ធចំនួន៤ រួមមានក្រសួងកិច្ចការនារី ក្រសួងវប្បធម៍និងវិចិត្រសិល្បៈ ក្រសួងប្រៃសណីយ៍និងទូរគមនាគមន៍ ព្រមទាំងក្រសួងព័ត៌មានចាត់វិធានការ និងទាមទារឲ្យលោក ផែង វណ្ណៈម្ចាស់គេហទំព័រព័ត៌មាន Pheng Vannak News ទទួលស្គាល់កំហុស និងកែតម្រូវពាក្យពេចន៍ប្រមាថ ម៉ាក់ងាយ និងសុំទោសជាសាធារណៈ ចំពោះស្ត្រីម្នាក់ជាអ្នកសារព័ត៌មានវីអូឌីនោះ។
កន្លងមកសង្គមស៊ីវិល បានបង្ហាញការព្រួយបារម្ភ និងមើលឃើញថា ការប្រើប្រាស់ភាសារបស់លោកផែង វណ្ណៈ លើស្ត្រីអ្នកកាសែត គឺជាការបៀតបៀនលើវិជ្ជាជីវៈយ៉ាងធ្ងន់ធ្ងរ ដែលអាចជាកត្តាមួយកាន់តែធ្វើឲ្យចំនួនអ្នកសារព័ត៌មានជាស្ត្រីកាន់តែថយចុះ។ ប្រការទាំងនេះ ធ្វើឲ្យប៉ះពាល់ដល់ស្ថានភាពផ្លូវកាយ ផ្លូវចិត្ត និងលទ្ធភាពក្នុងការបំពេញវិជ្ជាជីវៈរបស់ពួកគេ ហើយក៏អាចជាកត្តាបន្ទច់ បង្អាក់ស្រ្តីផ្សេងទៀត មិនឲ្យចាប់អាជីពការងារក្នុងវិស័យសារព័ត៌មានផងដែរ។
សូមរំលឹកថា លោកផែង វណ្ណៈ ម្ចាស់គេហទំព័រ Pheng Vannak News តាមរយៈបណ្ដាញសង្គមរបស់ខ្លួន បានប្រើពាក្យសម្ដីអសីលធម៍ ដល់អ្នកសារព័ត៌មានស្រ្តី VOD ជុំវិញព័ត៌មានមួយពាក់ព័ន្ធនឹងលោក ហ៊ុន ម៉ាណែត។ ទោះបីជាយ៉ាងណាក៏ដោយ លោកនាយករដ្ឋមន្ត្រី ហ៊ុន សែន បានបញ្ជាឲ្យបិទអាជ្ញាប័នវីអូឌីនេះរួចហើយ ដោយចោទថាល្មើសនឹងច្បាប់ស្ដីរបបសារព័ត៌មាន។
ក៏ប៉ុន្តែ ការប្រើភាសារបស់លោកផែង វណ្ណៈ គឺជារឿងមួយផ្សេងទៀត ដែលប៉ះពាល់ដល់តម្លៃស្រ្តីខ្មែរ ជាពិសេស សេចក្ដីថ្លៃថ្នូររបស់សាមីខ្លួន។ យ៉ាងណាមិញ លោក ផែង វណ្ណៈកាលពីថ្ងៃទី១៤កុម្ភៈ បានឆ្លើយតបដោយបង្ហោះសេចក្ដីថ្លែងការណ៍រួមរបស់អង្គការសង្គមស៊ីវិល ដែលមានស្នាមគូសខ្វែងចោល និងបានប្រកាសថាសេចក្ដីថ្លែងការណ៍នេះ គ្មានតម្លៃសម្រាប់កម្ពុជា ហើយក៏គ្មានតម្លៃសម្រាប់លោក ធ្វើការសុំទោសដែរ ដោយលោកឆើ្លយតបថាលោកមិនបានមើលងាយស្ត្រីខ្មែរនោះទេ ដោយអ្វីដែលលោកសរសេរនេះ គឺគ្រាន់តែជាឧទាហរណ៍តែប៉ុណ្ណោះ។ លោកឆ្លៀតគូសបញ្ជាក់ថា លោកសុខចិត្តសុំទោសអ្នកសារព័ត៌មានស្រ្តីម្នាក់នេះ បើអង្គភាពសារព័ត៌មាននិងអង្គការសង្គមស៊ីវិល បង្គាប់ឲ្យលោកសម រង្ស៊ី សុំទោសដែរ ក្នុងករណីដែលលោកចោទថាបានប្រមាថលើសាកសពប្អូនថ្លៃលោកនាយករដ្ឋមន្រ្តីហ៊ុន សែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ