ក្រសួងសុខាភិបាលបញ្ជាក់ថាកុមារីនៅខេត្តព្រៃវែងពិតជាស្លាប់ដោយសារជំងឺផ្តាសាយបក្សី H5N1
នាយកដ្ឋានប្រយុទ្ធជំងឺឆ្លងនៃក្រសួងសុខាភិបាល (CDC) កាលពីថ្ងៃទី២២ ខែកុម្ភៈ បានប្រកាសពីករណីរកឃើញកុមារីម្នាក់ មានអាយុ១១ឆ្នាំ រស់នៅភូមិរលាំង ឃុំរំលេច ស្រុកស៊ីធរកណ្តាល ខេត្តព្រៃវែង បានស្លាប់បាត់បង់ជីវិតដោយសារជំងឺផ្តាសាយបក្សី H5N1។ ការប្រកាសនេះ ក្រោយពីក្រុមគ្រូពេទ្យបានយកសំណាក់ពីកុមារីនោះ ទៅធ្វើរោគវិនិច្ឆ័យហើយរកឃើញថា ពិតជាមានជំងឺផ្តាសាយបក្សី H5N1មែន។
ចុះផ្សាយនៅថ្ងៃ៖
ស្តាប់ - ០១:៥៦
ក្រោយពីកុមារីម្នាក់ស្លាប់ដោយសារជំងឺផ្តាសាយបក្សី H5N1 លោកវេជ្ជបណ្ឌិត លី សុវណ្ណ បានបញ្ជាក់ប្រាប់វិទ្យុបារាំង RFI ថាក្រុមគ្រូពេទ្យគ្រប់ឯកទេសបាននិងកំពុងបន្តចុះពិនិត្យស្រាវជ្រាវលើមនុស្ស និងសត្វនៅតំបន់នោះ ក្រែងនៅមានអ្នកឆ្លងជំងឺផ្តាសាយបក្សី H5N1នេះ ដើម្បីងាយស្រួលគ្រប់គ្រងនិងព្យា បាលសម្រាប់អ្នកឆ្លង។
យ៉ាងណាមិញបើតាមនាយកដ្ឋានប្រយុទ្ធជំងឺឆ្លង CDC កុមារីដែលស្លាប់ដោយសារជំងឺផ្ដាសាយបក្សី H5N1នោះ បានចាប់ផ្តើមឈឺនៅថ្ងៃទី១៦ កុម្ភៈ ដោយមានរោគសញ្ញាគ្រុនក្តៅ ៣៩អង្សាសេ ព្រមទាំងមានក្អក ឈឺក។ CDC បានអះអាងថាក្រោយព្យាបាលនៅមូលដ្ឋានមិនធូរស្រាល ដោយកុមារីចាប់ផ្តើមហត់ក៏បញ្ជូនទៅព្យាបាលនៅមន្ទីរពេទ្យកុមារជាតិនៅភ្នំពេញ។
នាយកដ្ឋានប្រយុទ្ធជំងឺឆ្លង បានបញ្ជាក់ថា នៅថ្ងៃទី២១ ខែកុម្ភៈ គ្រូពេទ្យព្យាបាលបានយកវត្ថុផ្ញើមកវិទ្យាស្ថានជាតិសុខភាពសាធារណ: រួចទទួលលទ្ធផលថ្ងៃទី២២ ខែកុម្ភ: បញ្ជាក់មានវិជ្ជមាន មេរោគផ្តាសាយបក្សី H5N1។ ទន្ទឹមគ្នានេះ CDC ក៏បានក្រើនរំលឹកប្រជាពលរដ្ឋកុំឲ្យប៉ះពាល់សត្វឈឺឬងាប់ ទាំងសត្វបក្សីស្រុក និងបក្សីព្រៃ ហើយអ្នកសង្ស័យសូមទៅពិគ្រោះជំងឺជាមួយគ្រូពេទ្យ ឬទូរស័ព្ទទៅលេខ១១៥។
បើតាមលោកវេជ្ជបណ្ឌិត លី សុវណ្ណ ប្រធាននាយកដ្ឋានជំងឺឆ្លងនៃក្រសួងសុខាភិបាល ចាប់តាំងពីឆ្នាំ២០០៤ រហូតដល់ឆ្នាំ២០២៣នេះ កម្ពុជារកឃើញអ្នកឆ្លងជំងឺផ្តាសាយបក្សី H5N1 ៥៧ករណី ធ្វើឲ្យមានអ្នកស្លាប់សរុប ៣៨នាក់ហើយ។
ទាក់ទិនទៅនឹងរកឃើញកុមារីដែលស្លាប់ដោយជំងឺផ្តាសាយបក្សី H5N1នេះ ក្រសួងសុខាភិបាល នៅតែបន្តអំពាវនាវដល់ប្រជាពលរដ្ឋឲ្យមានការប្រុងប្រយ័ត្ន និងការពារកុំឲ្យឆ្លងជំងឺផ្តាសាយបក្សីនេះ ត្រូវយកចិត្តទុកដាក់ខ្ពស់ចំពោះសុខភាព ជាពិសេសកុំបរិភោគសត្វដែលងាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ