សំណុំរឿងណាហ្គាវើលដ៍៖លោក ហ៊ុន សែន ថា មានអ្នកទំនុកបំរុងកម្មករ តែសង្គមស៊ីវិលប្រកែក
ជាលើកដំបូងលោកនាយករដ្ឋមន្ត្រី ហ៊ុន សែន នៅថ្ងៃនេះបាននិយាយដោយប្រយោលលើសំណុំរឿងរបស់កូដករណាហ្គាវើលដ៍។ ផ្ដើមពីវិបត្តិអត់ការងារធ្វើក្នុងពិភពលោកអំឡុងពេលកូវីដ១៩ លោកនាយករដ្ឋមន្ត្រីក៏បានទាញភ្ជាប់សំណុំរឿងកូដករណាហ្គាវើលដ៍ទៅជាមួយដោយអះអាងថា ប្រសិនបើគ្មានការគាំទ្រពីក្រោយខ្នងតើពួកគេមានលទ្ធភាពឯណាធ្វើកូដកម្មជាង១ឆ្នាំនោះ? បើតាមនាយករដ្ឋមន្ត្រីលោកបានដាក់សំណួរនេះទៅកាន់ភ្ញៀវបរទេសម្នាក់ដែលទំនងជាចោទសួរលោកលើបញ្ហានេះ។
ចុះផ្សាយនៅថ្ងៃ៖
ស្តាប់ - ០៣:០៥
បើទោះជាមិននិយាយឲ្យចំឈ្មោះក៏គេដឹងស្មាន លោក ហ៊ុន សែន សំដៅដល់វិវាទរវាងក្រុមហ៊ុនណាហ្គាវើលដ៍និងបុគ្គលិកដែលចេញតវ៉ារកដំណោះស្រាយ ខណៈវិបត្តិនេះអូសជើងជាង១ឆ្នាំទៅហើយ។ ជាង១ឆ្នាំមកនេះ បើតាមលោក ហ៊ុន សែន ប្រសិនបើគ្មានអ្នកទំនុកបំរុងពីក្រោយទេ តើពួកគេមានលទ្ធភាពឯណាចេញធ្វើបាតុកម្ម។ ទន្ទឹមនឹងនេះលោកក៏ព្រមានវែកមុខ និងចាប់ខ្លួនអ្នកនៅពីក្រោយរឿងនេះដែរ។ លោកប្រមុខរដ្ឋាភិបាលក៏បានបញ្ជាក់ដែរថា ការតវ៉ាតាំងពីមានអ្នកចូលរួមជាង៣០០នាក់ធ្លាក់មកនៅជាង១០០នាក់ ដោយសារតែកម្មករភាពច្រើនយល់ព្រមទទួលសំណង់ និងចេញធ្វើការងារថ្មី តាមរយៈការជួយជ្រោមជ្រែងពីក្រសួងការងារ។
លោក ឃុន ថារ៉ូ អ្នកគ្រប់គ្រងកម្មវិធីការងារនៃអង្គការសង់ត្រាល់បានការពារថា ការធ្វើកូដកម្មគឺជាសិទ្ធមូលដ្ឋានរបស់កម្មករដែលមានចែងនៅក្នុងច្បាប់ស្ដីពីការងារ តែបែរជាអាជ្ញាធរនិយាយថា ការធ្វើកូដកម្មរបស់កម្មករជារឿងខុសនីតិវិធីទៅវិញ។ បើតាមលោក ឃុន ថារ៉ូ គេមិនគួរចាត់ទុកការធ្វើកូដកម្មរបស់កម្មករណាហ្គាវើលដ៍ទៅជាការធ្វើបាតុកម្មក្នុងទម្រង់បរិបទនយោបាយនោះទេ ហើយវិវាទការងារនេះងាយដោះស្រាយព្រោះវាបានកើតឡើងដោយការបញ្ឈប់កម្មករខុសពីនីតិវិធីដែលមានចែងក្នុងច្បាប់។ ចំពោះការចោទថា កម្មករទទួលបានមូនិធិជាថ្នូរនឹងការធ្វើបាតុកម្មគឺជាចោទប្រកាន់ដោយមិនមើលមូលដ្ឋានច្បាប់ព្រោះកុំភ្លេចថា កម្មករណាហ្គាវើលដ៍ជានីតិបុគ្គលដែលមានសហជីពជាតំណាងទទួលបានវិភាគទានពីសមាជិក អង្គការដៃគូ ដើម្បីទ្រទ្រង់ប្រតិបត្តិការនៃសកម្មភាពរបស់ខ្លួន។
មាត្រា២២នៃច្បាប់ស្ដីពីសហជីពត្រង់ចំណុច(គ) ចែងថា អំណោយនិងជំនួយធនធានហិរញ្ញវត្ថុដែលទទួលបានដោយស្របច្បាប់ពីសមាជិកសហជីពឬសមាគមនិយោជកឬភាគីផ្សេងៗទៀត សម្រាប់បម្រើឲ្យសកម្មភាពស្រចច្បាប់។
បច្ចុប្បន្នកូដករណាហ្គាវើលដ៍មួយចំនួនកំពុងប្រឈមបទល្មើសព្រហ្មទណ្ឌ៤ករណី។ ទី១-បទញុះញង់ ទី២-បំពានច្បាប់កូវីដ១៩ធ្វើបាតុកម្មអំឡុងពេលជំងឺកូវីដ១៩រីករាលដាល ទី៣-ក្រុមហ៊ុនប្ដឹងកម្មករទៅសាលាដំបូងរាជធានីភ្នំពេញ ទី៤-ក្រុមហ៊ុនប្ដឹងកម្មករពីរំលោភលើទ្រព្យសម្បត្តិឯកជននៅពេលដែលកូដករធ្វើកូដកម្ម។
គួរជម្រាបជូនថា សាលាដំបូងរាជធានីភ្នំពេញនៅថ្ងៃទី២១កុម្ភៈបានបើកសវនាការជំនុំជម្រះអតីតថ្នាក់ដឹកនាំសហជីពណាហ្គាវើលដ៍ចំនួន៩នាក់ ដែលត្រូវបានចោទប្រកាន់ពាក់ព័ន្ធនឹងបទចោទ«ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម»។ ក្នុងចំណោមសហជីពទាំង៩នាក់នោះ មានតែកញ្ញា ឈឹម ស៊ីថរ ទេ ដែលកំពុងជាប់ពន្ធនាគារ ក្រោយកញ្ញាត្រូវបានចាប់ខ្លួនជាថ្មី កាលពីខែវិច្ឆិកា ឆ្នាំ២០២២ ក្រោមបទចោទថាបំពានបម្រាមរបស់តុលាការ ដែលហាមមិនឱ្យចេញទៅក្រៅប្រទេស។ សហជីព៨នាក់ផ្សេងទៀត ត្រូវបានដាក់ឱ្យនៅក្រៅឃុំ ប៉ុន្តែស្ថិតនៅក្រោមការតាមដានរបស់តុលាការ។
គួររំឭកផងដែរថា បុគ្គលិកក្រុមហ៊ុនកាស៊ីណូណាហ្គាវើលដ៍ បានប្រមូលផ្តុំធ្វើកូដកម្មជាច្រើនខែ បន្ទាប់ពីកម្មករនិយោជិតប្រមាណ១.៣២៩នាក់ត្រូវបានបញ្ឈប់ពីការងារ កាលពីខែមេសា ឆ្នាំ២០២១៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ