លោក ស ខេង ប្រាប់សាលាក្រុងឲ្យពិនិត្យមើលសំណង់ប៉ះផ្លូវសាធាណៈដែលធ្វើឲ្យខូចសោភ័ណភាពទីក្រុង
លោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ បានប្រាប់ឲ្យសាលាក្រុងភ្នំពេញពិនិត្យអំពីករណីសាងសង់សំណង់ខុសច្បាប់ នៅលើផ្លូវ និងចំណីផ្លូវសាធារណៈឡើងវិញ បន្ទាប់ពីលោកកត់សម្គាល់ថា កំពុងប្រឈមនឹងបញ្ហាមួយចំនួន។ សម្រាប់លោក ស ខេង សំណង់មួយចំនួនបាននឹងកំពុងសាងសង់បានប៉ះពាល់ដល់សោភ័ណភាពទីក្រុងភ្នំពេញ ដ្បិតបានរំលោភលើចំណីផ្លូវសាធារណៈ។
ចុះផ្សាយនៅថ្ងៃ៖
ស្តាប់ - ០១:៥៩
ថ្លែងនៅក្នុងពិធីបិទសន្និបាតបូកសរុបការងារប្រចាំឆ្នាំ២០២២ និងលើកកម្ពស់ការងារឆ្នាំ២០២៣ របស់សាលាក្រុងភ្នំពេញ លោក ស ខេង រដ្ឋមន្ត្រីក្រសួងមហាផ្ទៃ បានអះអាងថា ភ្នំពេញ ដែលជាប៉ូលសេដ្ឋកិច្ចដ៏ចម្បងរបស់ជាតិ បាននឹងកំពុងទាក់ទាញការវិនិយោគពីវិនិយោគិនក្នុងស្រុក និងពីបណ្តាប្រទេសនានា ដើម្បីអភិវឌ្ឍវិស័យដីធ្លី អចលនទ្រព្យ និងផលិតកម្ម សេវាកម្ម ដែលធ្វើឱ្យសន្ទុះនៃការអភិវឌ្ឍទីក្រុងមានការរីកចម្រើនយ៉ាងឆាប់រហ័សក្នុងរយៈពេលប៉ុន្មានឆ្នាំចុងក្រោយនេះ។
តែនៅទន្ទឹមនឹងការអភិវឌ្ឍ រដ្ឋមន្ត្រីក្រសួងមហាផ្ទៃរូបនេះ បានកត់សម្គាល់ថា ទីក្រុងភ្នំពេញកំពុងប្រឈមនឹងការរំលោភបំពានដីសាធារណៈ ដ្បិតសំណង់មួយចំនួនបានសាងសង់នៅលើផ្លូវ និងចំណីផ្លូវរបស់រដ្ឋ។ បើតាមលោក ស ខេង បញ្ហានេះ គឺសាលាក្រុងភ្នំពេញត្រូវតែពិនិត្យឡើងវិញ និងចាត់វិធានការឲ្យទាន់ពេលវេលា។ នេះក៏ព្រោះថា សំណង់ទាំងនោះបានធ្វើឲ្យប៉ះពាល់ដល់សោភ័ណភាពរបស់ទីក្រុងទាំងមូល។
លោក ស ខេង បានគូសបញ្ជាក់ថា បញ្ហានេះ សាលាក្រុងភ្នំពេញត្រូវតែទប់ស្កាត់ ការសង់សំណង់គ្មានច្បាប់អនុញ្ញាត ក៏ដូចជាសំណង់ទាំងឡាយណា ដែលបានធ្វើឲ្យប៉ះពាល់ដល់សណ្តាប់ធ្នាប់សាធារណៈ និងបរិស្ថានរបស់ទីក្រុង។ តាមលោក ស ខេង អាជ្ញាធរត្រូវពង្រឹងការគ្រប់គ្រងការសាងសង់សំណង់គ្រប់ប្រភេទឱ្យបានត្រឹមត្រូវស្របតាមច្បាប់ ស្ដីពីសំណង់ លិខិតបទដ្ឋានពាក់ព័ន្ធ និងបទដ្ឋានបច្ចេកទេស ព្រមទាំងអនុវត្តឱ្យបានម៉ឺងម៉ាត់តាមប្លង់គោលប្រើប្រាស់ដីរាជធានីភ្នំពេញ។
គួរកត់សម្គាល់ថា សំណង់ខុសច្បាប់ ដោយរំលោភបំពានផ្លូវបំពានសាធារណៈ បានក្លាយជាបញ្ហាដែលរដ្ឋាភិបាលយកមកជជែក ក្រោយសំណង់អគារខ្ពស់ៗជាច្រើន បាននិងកំពុងរីកដូចផ្សិតក្នុងទីក្រុងភ្នំពេញ និងតាមបណ្តាខេត្ត។ ករណីសំណង់អគារខុសច្បាប់មួយចំនួន ដែលអាចសាងសង់បាន ត្រូវបានធនាគារពិភពលោកយល់ថា ដោយសារតែការសាងសង់ជាមុន រួចផ្តល់អាជ្ញាបណ្ណជាក្រោយ។ តាមរបាយការណ៍ធនាគារពិភពលោក កាលពីឆ្នាំ២០១៨ គឺ ប្រទេសកម្ពុជាបានប្រឈមនឹង គុណភាពអន់ថយនៃសំណង់លំនៅដ្ឋាន និងកង្វះហេដ្ឋារចនាសម្ព័ន្ធជាមូលដ្ឋានក្នុងទីប្រជុំជន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ