កម្ពុជាបំបែកកំណត់ត្រាចាស់របស់អង់គ្លេសក្នុងការតម្រៀបចំនួនបេះដូងបានច្រើនជាងគេ
កម្ពុជាទទួលបានប័ណ្ណប្រកាសជាផ្លូវការ កាលពីម្សិលមិញចំពោះកំណត់ត្រាពិភពលោក ក្នុងការតម្រៀប បេះដូងក្រដាសបានចម្រុះព៌ណចំនួនជិត៤លានបេះដូង នៅបរិវេនប្រាសាទអង្គរវត្ត។ នេះជាការបំបែកកំណត់ត្រាចាស់របស់ប្រទេសអង់គ្លេសកាលពីឆ្នាំ២០១៩ ដែលផ្គុំបានចំនួនជាង៥ម៉ឺនរូបបេះដូង។
ចុះផ្សាយនៅថ្ងៃ៖
ស្តាប់ - ០១:៣៥
បេះដូងក្រដាសតូចៗចំនួន ៣,៩១៧,៨០៥ ត្រូវបានតម្រៀបចេញជារូបរាងដេះដូងធំមួយនៅផ្នែកខាងឆ្វេងផ្លូវចូលប្រាសាទអង្គរវត្ត ខណៈរូបក្រដាសដេះដូងតូចៗនេះ ត្រូវផ្គុំចេញជាពាក្យ«ខ្មែរ»នៅខាងស្តាំផ្លូវចូលប្រាសាទ។
ការតម្រៀប បេះដូងក្រដាសបានចំនួនជិត៤លានបេះដូងនេះគឺប្រើពេល២ថ្ងៃក្នុងការរាប់ និងប្រើមនុស្សចំនួន១៥០នាក់។ នេះបើតាមសេចក្តីប្រកាសរបស់សហភាពសហព័ន្ធយុវជនកម្ពុជា។
បេះដូងចម្រុះព៌ណនេះធ្វើឡើងពីក្រដាស ផ្សុំផ្គុំនឹងបន្ទះឬស្សីដោតនៅលើសួនស្មៅបរិវេនប្រាសាទអង្គរវត្ត។ ការរំលេចចេញនូវរូបដេះដូង និងពាក្យខ្មែរនេះ ត្រូវបានសហភាពសហព័ន្ធយុវជនកម្ពុជាគូសបញ្ជាក់ថា ជាលើកតម្កើងមរតក វប្បធម៌ និងអរិយធម៌របស់ខ្មែរ។
លោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា បានថ្លែងថា ការបត់រូបបេះដូងនេះមិនមែនផ្តោតសំខាន់តែទៅលើការបំបែកឯទគ្គកម្មប៉ុណ្ណោះ តែជាការបង្កើតកម្មវិធីឲ្យមានការចូលរួមពីគ្រប់ទិសទី មករួមគ្នាក្នុងចំណុចតែមួយ គោលដៅតែមួយ។
បើតាមអ្នករៀបចំកម្មវិធី ក្រដាសរូបបេះដូងទាំងជិត៤លាននោះ ត្រូវបានដាក់តាំងបង្ហាញសម្រាប់ព្រឹត្តិការណ៍អង្គរសង្ក្រាន្តពីថ្ងៃទី១១មេសារហូតដល់ថ្ងៃចុងក្រោយ។ នេះជាការបំបែកកំណត់ត្រាចាស់របស់ប្រទេសអង់គ្លេសកាលពីឆ្នាំ២០១៩ ដែលផ្គុំបានចំនួន៥៣,៧០៤រូបបេះដូង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ