ថៃចង់ឲ្យបើកព្រំដែនឡើងវិញជាមួយកម្ពុជានៅតំបន់ប្រាសាទព្រះវិហារ
ប្រជាជនថៃកំពុងរង់ចាំយ៉ាងអន្ទះសារចង់ឲ្យមានការបើកឡើងវិញនូវព្រំដែនទៅកាន់ប្រាសាទព្រះវិហារដែលជាប់គ្នានឹងខេត្តស៊ីសាកេតរបស់ថៃ ដើម្បីដំណើរការវិស័យទេសចរណ៍។ នេះបើតាមការចុះផ្សាយរបស់បាងកកប៉ុស្តិ៍នៅថ្ងៃចន្ទនេះ។ ការលើកឡើងនេះ គឺបន្ទាប់ពីព្រំដែនតំបន់ប្រាសាទវិហារត្រូវបានបិទអស់រយៈពេល១៥ឆ្នាំ ចាប់តាំងពីកងទ័ពនៃប្រទេសទាំងពីរ បានប៉ះទង្គិចគ្នាដោយប្រដាប់អាវុធអំឡុងឆ្នាំ២០០៨ ដែលធ្វើឲ្យច្រកទេសចរណ៍មួយនេះត្រូវបានបិទទាំងស្រុង។
ចុះផ្សាយនៅថ្ងៃ៖
ស្តាប់ - ០២:១៦
ប្រភពក្នុងស្រុកមួយរបស់ថៃបាននិយាយថា មានការប៉ុនប៉ងជាច្រើនពីប្រទេសថៃក្នុងការចាប់ដៃជាមួយកម្ពុជាដើម្បីបើកច្រកទេសចរណ៍ចូលទៅប្រាសាទព្រះវិហារឡើងវិញ។ ឧទាហរណ៍ អភិបាលខេត្ត Ubon Ratchathani មួយរូបបានស្នើឱ្យកម្ពុជាអនុញ្ញាតឱ្យភ្ញៀវទេសចរចូលប្រាសាទព្រះវិហារតាមច្រកខេត្តស៊ីសាកេត។ ប៉ុន្តែសំណើនេះត្រូវបានច្រានចោលទាំងស្រុងក្រោមលេសថាមានតែលោកនាយករដ្ឋមន្ត្រី ហ៊ុន សែន ប៉ុណ្ណោះដែលមានសិទ្ធិសម្រេច។
កាលពីឆ្នាំ២០១៣ តុលាការយុត្តិធម៌អន្តរជាតិ ICJ បានទាមទារឲ្យភាគីទាំងពីរដកកងទ័ពដែលឈរជើងនៅមុខប្រាសាទព្រះវិហារចេញឲ្យអស់ បន្ទាប់ពីមានបណ្តឹងរបស់កម្ពុជាទៅកាន់តុលាការមួយនេះ។ ទោះជាយ៉ាងណា សេចក្តីសម្រេចរបស់តុលាការ ICJ បានអនុញ្ញាតឲ្យថៃ និងកម្ពុជាដាក់ពង្រាយកម្លាំងល្បាតតាមនៅតាមព្រំដែនខាងក្រៅបាន។
ទោះបីជាសេចក្តីសម្រេចរបស់ ICJ បាននិយាយថា ថៃ និងកម្ពុជា គួរតែស្វែងរកកិច្ចព្រមព្រៀងរួមគ្នាមួយ ដើម្បីបង្កើតតំបន់ទេសចរណ៍ជុំវិញប្រាសាទព្រះវិហារ ចាប់តាំងពីបទឈប់បាញ់ក្នុងឆ្នាំ ២០១១ក៏ដោយ
តែកន្លែងទេសចរណ៍ដ៏ពេញនិយមមួយនេះត្រូវបានបិទទាំងស្រុងរយៈពេល១៥ឆ្នាំមកហើយ។
បើទោះបីជាបទឈប់បាញ់បានអនុវត្តរយៈពេល ១២ឆ្នាំក៏ដោយតែ កម្ពុជា និងថៃបានព្រមព្រៀងគ្នាត្រូវតែមានមន្ត្រីមកពីប្រទេសថៃ ៥ នាក់ និងពីកម្ពុជា ៥ នាក់ ឈរជើងនៅចំណុចសម្របសម្រួលព្រំដែន ដើម្បីជួយបកប្រែ និងសម្របសម្រួលចលនារបស់ពួកគេ ជៀសវាងការយល់ច្រឡំ។
បើតាមកាសែតថៃដដែលនេះ ក្រៅពីការពារព្រំដែន ទាំងទាហានថៃ និងខ្មែរនៅតំបន់នោះ បានចំណាយពេលលេងកម្សាន្តជាមួយគ្នាដូចជាលេងបាល់ទះ បាល់ផ្តៅ និងប៉េតង់។
ប្រភពដដែលបន្តថា ដំណោះស្រាយដ៏មានសុទិដ្ឋិនិយមក្នុងការបន្ធូរបន្ថយជម្លោះព្រំដែនរវាងថៃ និងកម្ពុជា គឺការអនុញ្ញាតឱ្យភ្ញៀវទេសចរចូលទៅទស្សនាប្រាសាទព្រះវិហារនៅលើទឹកដីខេត្តស៊ីសាកេត និងអនុញ្ញាតឱ្យភ្ញៀវទេសចរពីប្រទេសកម្ពុជាចូលទៅក្នុងតំបន់ Pha Mor E-Daeng ក្នុងឧទ្យានជាតិ Khao Phra Viharn ។គេរំពឹងថា លោកឧត្តមសេនីយ៍ ហ៊ុន ម៉ាណែត នឹងដោះស្រាយវិវាទជុំវិញប្រាសាទព្រះវិហារ ដែលអាចឈានទៅដល់ការដកទ័ពជាអចិន្ត្រៃយ៍ និងអនុញ្ញាតឲ្យបើកច្រកទេសចរណ៍នេះប្រកបដោយនិរន្តរភាពនាពេលអនាគត។នេះបើតាមបាងកកប៉ុស្តិ៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ