សកម្មជនបន្តស្នើឲ្យផ្តល់យុត្តិធម៌ដល់សកម្មជនថៃដែលបាត់ខ្លួននៅកម្ពុជា
យុវជនដែលជាសកម្មជនសិទ្ធិមនុស្សចំនួន២១នាក់ បានធ្វើការប្រមូលផ្តុំគ្នានៅមុខហាងកាហ្វេមួយកន្លែង ក្នុងសង្កាត់ជ្រោយចង្វារ ជាទីកន្លែងដែលសកម្មជនសិទ្ធិមនុស្សថៃលោក វ៉ាន់ឆាឡឺម សាតស័ក្តិសិទ្ធ បានបាត់ខ្លួនកាលពីថ្ងៃទៅ០៤ ខែមិថុនា ឆ្នាំ២០២០ ពោលគឺអស់រយៈពេល៣ឆ្នាំមកហើយ។ នៅក្នុងការរំលឹកខួបនេះ ក្រុមសកម្មជននៅតែបន្តស្នើអាជ្ញាធរកម្ពុជាបន្តការស៊ើបអង្កេតលើពីការបាត់ខ្លួននេះ និងផ្តល់យុត្តិធម៌នៅក្នុងករណីនេះ។ ប៉ុន្តែពីខាងអាជ្ញាធរកម្ពុជា គូសបញ្ជាក់ថា សំណុំរឿងនេះនៅមិនទាន់បិទការស៊ើបអង្កេតនៅឡើយ តែគ្មានឡើយតម្រុយ ឬក៏ស្រមោលណាមួយ។
ចុះផ្សាយនៅថ្ងៃ៖
ស្តាប់ - ០២:០៣
អ្នកនាំពាក្យក្រសួងមហាផ្ទៃកម្ពុជា ប្រាប់វិទ្យុបារាំងអន្តរជាតិRFI ថា សមត្ថកិច្ចកម្ពុជានៅមិនបិទការស៊ើបអង្កេតលើសំណុំរឿងនេះការបាត់ខ្លួនសកម្មជនសិទ្ធិមនុស្សថៃលោក វ៉ាន់ឆាឡឺម សាតស័ក្តិសិទ្ធនោះនៅឡើយ។ ជាមួយគ្នានេះ លោក ខៀវ សុភ័គ ថ្លែងថា ប្រសិនសិនបើសកម្មជនដែលជាអ្នកធ្វើការជួបជុំនោះមានតម្រុយណាមួយគួរតែសហការជាមួយអាជ្ញាធរកម្ពុជា ខណៈលោកយល់ថា ការបាត់ខ្លួននេះអាចជារឿងនយោបាយ។
បើតាម លោក ខៀវ សុភ័គ មកទល់ពេលនេះ អាជ្ញាធរកម្ពុជា នៅគ្មានតម្រុយ ឬស្រមោលណាមួយបង្ហាញពីការបាត់ខ្លួនលោក វ៉ាន់ឆាឡឺម សោះឡើយ នៅពេលដែលសាកសួរពីសកម្មភាពដែលថតបាននៅតាមកាមេរ៉ាសុវត្ថិភាព។
នៅក្នុងការរំលឹកខួប៣ឆ្នាំនៃការបាត់ខ្លួនសកម្មជនថៃអាវក្រហមរូបនេះ កាលពីថ្ងៃទី៤មិថុនា ក្រុមសកម្មជនចំនួន២១នាក់ដែលពាក់ស្រោមមុខសកម្មជនវ៉ាន់ឆាឡឺម នៅតែបន្តស្នើអាជ្ញាធរកម្ពុជាបន្តការស៊ើបអង្គេតលើពីការបាត់ខ្លួននេះ និងផ្តល់យុត្តិធម៌នៅក្នុងករណីនេះ។
ក្នុងអំឡុងពេលជួបជុំគ្នានោះ ក្រុមយុវជនបាននិមន្តព្រះសង្ឃដើម្បីធ្វើកិច្ចតាមបែបសាសនា និងបន្តដើរជាក្បួនពីចំណុចបាត់ខ្លួនរហូតដល់រង្វង់មូលជ្រោយចង្វារ។ ក្នុងពេលប្រមូលផ្តុំនិងដើរហែរក្បួន អាជ្ញាធរស្លៀកពាក់ស៊ីវិលជាច្រើនបានមកថតរូបភាព និងថតវីដេអូ ការជួបជុំនោះពីដើមរហូតដល់ចប់។ នេះបើតាមមជ្ឈមណ្ឌលសិទ្ធិមនុស្សកម្ពុជា។
វ៉ាន់ឆាលឺម ដែលបាត់ខ្លួននៅអាយុ៣៧ឆ្នាំ ត្រូវគេស្គាល់ថាជាសកម្មជនប្រជាធិបតេយ្យមួយរូប ដែលហ៊ានរិះគន់វាយប្រហារដោយចំៗទៅលើរដ្ឋាភិបាលថៃដឹកនាំដោយលោក ប្រាយុទ្ធ ចាន់អូឆារ។ ក្រោយរដ្ឋប្រហារថ្ងៃទី២២ឧសភាឆ្នាំ២០១៤នៅប្រទេសថៃ លោកវ៉ាន់ឆាលឺមបានភៀសខ្លួនទៅកាន់ប្រទេសឡាវ និងក្រោយមកមកកាន់កម្ពុជា ដើម្បីគេចពីរឿងក្ដីក្ដាំចោទប្រកាន់ដោយរដ្ឋាភិបាលថៃ ទាក់ទងនឹងបទល្មើសប្រមាថព្រះមហាក្សត្រ និងបទឧក្រិដ្ឋតាមប្រព័ន្ធកុំព្យូទ័រ។
មួយថ្ងៃមុនពេលត្រូវចាប់ពង្រត់ ពោលគឺនៅថ្ងៃទី០៣ខែមិថុនា លោកវ៉ាន់ឆាលឺម បានបង្ហោះនូវវីដេអូដ៏ខ្លីមួយលើបណ្ដាញសង្គមហ្វេសប៊ុក ដែលមានខ្លឹមសារជេរប្រមាថនាយករដ្ឋមន្ដ្រីថៃ លោកប្រាយុទ្ធ ចាន់អូឆារ ថាជាមេដឹកនាំដែលល្ងង់ខ្លៅ បានតែនិយាយ តែដឹកនាំប្រទេសមិនកើត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ