អាជ្ញាធរថា កម្ពុជានៅតែបន្តទទួលបានពាក្យបណ្តឹងស្តីពីករណីជួយដូរមនុស្ស
មន្ត្រីជាន់ខ្ពស់ក្រសួងមហាផ្ទៃទទួលស្គាល់ថា ករណីជួញដូរមនុស្ស និងករណីចាញ់បោកបញ្ឆោតតាមប្រព័ន្ធអនឡាញនៅតែបន្តកើតមានដដែលក្នុងប្រទេសកម្ពុជា។ ក៏ប៉ុន្តែ ករណីទាំងនេះ មន្ត្រីជាន់ខ្ពស់ក្រសួងមហាផ្ទៃអះអាងថា ស្ថិតក្នុងកម្រិតតិចតូចជាងពេលមុន។ តិចតូចដោយសារតែ ពាក្យបណ្តឹងស្នើឱ្យអាជ្ញាធរកម្ពុជាជួយអន្តរាគមន៍សង្គ្រោះជនបរទេសដែលរងគ្រោះ គឺមានតិចជាង៣បណ្តឹងក្នុងមួយថ្ងៃ បើធៀបនឹងឆ្នាំកន្លងមក មានប្រមាណជិត២០បណ្តឹង។ តែយ៉ាងណា អង្គការសង្គមស៊ីវិលស្នើឱ្យរដ្ឋាភិបាលបង្កើនប្រសិទ្ធភាពចុះបង្ក្រាបបន្តទៀត។
ចុះផ្សាយនៅថ្ងៃ៖
ស្តាប់ - ០២:២៥
លោក ខៀវ សុភ័គ អ្នកនាំពាក្យក្រសួងមហាផ្ទៃបានឱ្យដឹងថា អាជ្ញាធរកម្ពុជាបានស្វែងរកឃើញជនរងគ្រោះពីការចាញ់បោកតាមប្រព័ន្ធអនឡាញ និងករណីជួញដូរមនុស្សខុសច្បាប់ជាបន្តបន្ទាប់ ក្រោយពេលដែលអាជ្ញាធរទទួលបានពាក្យបណ្តឹងស្នើឱ្យជួួយសង្គ្រោះជនរងគ្រោះដែលភាគច្រើនជាជនជាតិចិន និងតៃវ៉ាន់។
បច្ចុប្បន្នករណីជួញដូរមនុស្ស និងការបង្ខាំងមនុស្សដើម្បីបោកប្រាស់តាមប្រព័ន្ធអនឡាញនៅកម្ពុជា មានសភាពអន់ថយ និងវិវត្តន៍ទៅរកស្ថានភាពល្អប្រសើរ ពិសេសពាក្យបណ្តឹងស្នើឱ្យអាជ្ញាធរកម្ពុជាអន្តរាគមន៍ជួយសង្គ្រោះជនរងគ្រោះវិញ ក៏មានតិចតូចបំផុត ពោលគឺមានចំនួនមិនដល់៣បណ្តឹងនោះទេក្នុងមួយថ្ងៃ ខណៈនាពេលកន្លងទៅបណ្តឹងអាចមានចន្លោះពី១៥ដល់២០បណ្តឹងក្នុងមួយថ្ងៃ។ នេះបើតាមការអះអាងពីលោក ខៀវ សុភ័គ។
បើតាមមន្ត្រីជាន់ខ្ពស់ក្រសួងមហាផ្ទៃរូបនេះ គិតចាប់តាំងពីពេលដែលអាជ្ញាធរចុះបង្ក្រាប និងជួយសង្គ្រោះជនរងគ្រោះពីករណីជួញដូរមនុស្ស និងការបង្ខាំងមនុស្សខុសច្បាប់ គឺអាជ្ញាធរបានសង្គ្រោះជនរងគ្រោះប្រមាណ២ពាន់នាក់ និងបិទអាជីវកម្មដែលជាប់ពាក់ព័ន្ធករណីខាងលើចំនួន៥កន្លែង និង៤កន្លែងផ្សេងទៀតកំពុងស្ថិតក្រោមការស៊ើបអង្កេត។ ទីតាំងដែលជាប់ពាក់ព័ន្ធភាគច្រើន គឺមានភូមិសាស្ត្រក្នុងខេត្តព្រះសីហនុ និងស្វាយរៀង។
ជាជំហានបន្ទាប់លោក ខៀវ សុភ័គបញ្ជាក់ថា នាយកដ្ឋានអន្តោប្រវេសន៍នឹងពង្រឹងការចេញចូលរបស់ជនបរទេសដែលមកធ្វើការ ឬប្រកបអាជីវកម្មក្នុងប្រទេសកម្ពុជា ដើម្បីទប់ស្កាត់ករណីជួញដូរ ឬបង្ខាំងមនុស្សខុសច្បាប់។
លោក អំ សំអាត នាយកគ្រប់គ្រងទូទៅនៃអង្គកាលីកាដូសង្កេតឃើញករណីជួញដូរមនុស្សនៅកម្ពុជាពិតជាមានសភាពអន់ថយមួយកម្រិត។ ក៏ប៉ុន្តែករណីខ្លះនៅតែកើតមានដដែល ដែលទាមទារឱ្យអាជ្ញាធរបង្កើនប្រសិទ្ធិភាពចុះស្រាវជ្រាវ និងអនុវត្តច្បាប់ឱ្យបានតឹងរុឹង។
យោងតាមរបាយការណ៍ស្តីពីលទ្ធផលជួយសង្គ្រោះជនបរទេសរបស់ក្រសួងមហាផ្ទៃបានឱ្យដឹងថា គិតមកទល់ពេលនេះ អាជ្ញាធរកម្ពុជាទទួលបានពាក្យបណ្តឹងសរុបចំនួន៩៣៦ករណី ដែលមានមនុស្សចំនួន២,២៨៤នាក់ ឬ១៦សញ្ជាតិ។ ក្នុងនោះ អាជ្ញាធរបានចុះស៊ើបអង្កេតចំនួន៨៩៨បណ្តឹង និងបានរកឃើញមនុស្សចំនួន១,៣៧៣នាក់ដែលមាន១៤សញ្ជាតិ។ ក្នុងចំណោមអ្នកដែលបានរកឃើញ អាជ្ញាធរឃាត់ខ្លួនចំនួន១៣៧នាក់ (ចិន៖ ១០៥នាក់ ខ្មែរ៖ ១៧នាក់ វៀតណាម១២ និងថៃ០៣នាក់)។
ដោយឡែកបណ្តឹងចំនួន៣៨ផ្សេងទៀត អាជ្ញាធរកំពុងបន្តចុះប្រតិបត្តិការសា្រវជ្រាវ ខណៈបណ្តឹងចំនួន៣០៣ករណីដែលមានមនុស្សចំនួន៧៤២នាក់បានបិទបញ្ចប់ដោយមូលហេតុរកពុំឃើញ។ នេះបើតាមរបាយការណ៍ដដែលខាងលើ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ