លោក សម រង្ស៊ី ថាមានសេណារីយ៉ូ២ដែលធ្វើឲ្យលោក ហ៊ុន សែន ព្រួយបារម្ភ
ប្រមុខគណបក្សប្រឆាំងនៅក្រៅប្រទេសបានលើកឡើងនូវសេណារីយ៉ូចំនួន២ ដែលលោក សម រង្ស៊ី អះអាងថាជាការព្រួយបារម្ភរបស់លោក ហ៊ុន សែន បង្ខំចិត្តកែច្បាប់ថ្មីដើម្បីបង្ខំពលរដ្ឋឲ្យទៅបោះឆ្នោត។ បើតាម លោក សម រង្ស៊ី ចលនាពហិកានេះ ជាការបង្ហាញពីកម្លាំងរបស់គណបក្សប្រឆាំង ដែលនឹងធ្វើឲ្យខូចខាតដល់ភាពស្របច្បាប់ នៃរដ្ឋាភិបាលថ្មី ក្រោយការបោះឆ្នោត។ ប៉ុន្តែនៅថ្ងៃនេះ លោក ហ៊ុន សែន បានបន្តរំឭកពីច្បាប់ដែលលោកបញ្ជាឲ្យចែងបន្ថែមនោះគឺមានទោសទណ្ឌអាចជាប់ពន្ធនាគារថែមទៀត ចំពោះអ្នករារាំង ឬបង្កបញ្ហាដល់ការបោះឆ្នោត។
ចុះផ្សាយនៅថ្ងៃ៖
ស្តាប់ - ០១:៥៤
ក្រោយពីការរារាំង គណបក្សភ្លើងទៀន មិនឲ្យចូលរួមក្នុងការបោះឆ្នោត លោក ហ៊ុន សែន ប្រឈមសេណារីយ៉ូ ២ ដែលធ្វើឲ្យគាត់ព្រួយបារម្ភដូចគ្នា។ នេះជាការលើកឡើងនៅលើហ្វេសប៊ុកលោក សម រង្ស៊ី ម្សិលមិញ ដែលធ្វើឲ្យលោក ហ៊ុន សែន ឆ្លើយតបបន្ថែមទៀតនៅថ្ងៃនេះ។
នៅចំពោះមុខកម្មករក្នុងទីក្រុងភ្នំពេញនៅពុធ លោក ហ៊ុន សែន បានបង្ហើបថាមាត្រាថ្មីនៅក្នុងសេចក្តីព្រាងច្បាប់ដែលលោកបញ្ជាឲ្យធ្វើការកែប្រែនោះ គឺមានការពិន័យជាប្រាក់ពី៥លានទៅ២០លានរៀល និងក៏ទោសទណ្ឌជាប់ពន្ធនាគារថែមទៀត ចំពោះអ្នករារាំង ឬបង្កបញ្ហាដល់ការបោះឆ្នោត។
យោងតាមមាត្រា១៤២នៃច្បាប់បោះឆ្នោតជ្រើសតាំងតំណាងរាស្ត្រចែងថា ត្រូវផាកពិន័យពី៥ទៅ២០លានរៀលដោយមិនគិតទោសព្រហ្មទណ្ឌចំពោះជនណាដែលប្រើមធ្យោបាយទុច្ចរឹក រារាំងមិនឲ្យពលរដ្ឋទៅបោះឆ្នោត និងការធ្វើឲ្យបាត់ទំនុកចិត្តលើការបោះឆ្នោតជាដើម។
ប៉ុន្តែសម្រាប់ លោក សម រង្ស៊ី ការជំរុញឲ្យចេញច្បាប់ថ្មីដែលយល់ថាដើម្បីពលរដ្ឋឲ្យទៅបោះឆ្នោតនេះ បង្ហាញពីការភ័យខ្លាចរបស់ លោក ហ៊ុន សែន ចំពោះចលនាពហិការ មិនចូលរួមក្នុងការបោះឆ្នោត ថ្ងៃ ២៣ កក្កដា ខាងមុខ។
ប្រមុខបក្សប្រឆាំងនៅក្រៅប្រទេស ព្រមានថា ចលនាពហិការដ៏ធំបែបនេះ ជាការបង្ហាញពីកម្លាំងរបស់គណបក្សប្រឆាំង ដែលនឹងធ្វើឲ្យខូចខាតដល់ភាពស្របច្បាប់ នៃរដ្ឋាភិបាលថ្មី ក្រោយការបោះឆ្នោត ហើយនឹងមិនអាចទៅរួចចំពោះការផ្ទេរអំណាចទៅកូនលោក ហ៊ុន សែន។
សេណារីយ៉ូ បែបនេះ ត្រូវបានលោក សម រង្ស៊ី អះអាងថាធ្វើឲ្យ លោក ហ៊ុន សែន ព្រួយបារម្ភយ៉ាងខ្លាំង ពីព្រោះបើ លោក ហ៊ុន ម៉ាណែត មិនអាចមកជំនួសគាត់បានទេ គាត់នឹងបាត់បង់និទណ្ឌភាព ។
លោក សម រង្ស៊ី អះអាងថា លោក ហ៊ុន សែន គ្មានមធ្យោបាយអ្វី ទប់ទល់យុទ្ធវិធីគូសសន្លឹកឆ្នោតចោលនេះទេ ពីព្រោះការបោះឆ្នោត ត្រូវមានការសម្ងាត់។
យ៉ាងណាក៏ដោយ លោក ហ៊ុន សែន ព្រមាននៅថ្ងៃនេះថា ប្រសិនបើអ្នកនៅក្នុងស្រុកហ៊ានធ្វើតាមអ្វីដែលលោក សម រង្ស៊ី គូសវាសនេះ នោះគណបក្សភ្លើងទៀននឹងត្រូវរំលាយចោល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ