អាមេរិកបន្តឲ្យចំណាត់ថ្នាក់កម្ពុជាជាប្រទេសមិនបានទប់ស្កាត់បទល្មើសជួញដូរមនុស្ស
អាមេរិកនៅតែបន្តកំណត់កម្ពុជា ជាប្រទេសដែលមិនបានទប់ស្កាត់បទល្មើសជួញដូរមនុស្សឲ្យមានប្រសិទ្ធិភាពដដែរ។ នៅក្នុងរបាយការណ៍ប្រចាំឆ្នាំ២០២៣ ក្រសួងការបរទេសអាមេរិក បានបន្តដាក់កម្ពុជាជាប្រទេសស្ថិតនៅក្នុងកម្រិតទី៣ ទៅលើការដួញដូរមនុស្ស ដែលមានន័យថារដ្ឋាភិបាលកម្ពុជាមិនបានបំពេញតាមស្តង់ដារអប្បបរមានសម្រាប់ការលុបបំបាត់ការជួញដូរមនុស្ស និងមិនបានប្រឹងប្រែងឲ្យបានខ្លាំងក្លាក្នុងការទប់ស្កាត់ការជួញដូរ។
ចុះផ្សាយនៅថ្ងៃ៖
ស្តាប់ - ០២:៣៨
ដូចទៅនឹងឆ្នាំ២០២២ដែរ កម្ពុជាបានបន្តស្ថិតនៅចំណាត់ថ្នាក់ទី៣ ឬបញ្ជីក្រហម នៅក្នុងបទល្មើសជួញដូរមនុស្សជាសកល។ នេះបើតាមរបាយការណ៍របស់ក្រសួងការបរទេសអាមេរិក នៅថ្ងៃសុក្រ។ ការឲ្យចំណាត់ថ្នាក់ទី៣នៅក្នុងរបាយការណ៍ជាសកលរបស់អាមេរិកបែបនេះ បានបង្ហាញថា កម្ពុជាបានស្ថិតនៅលំដាប់បញ្ជីក្រហម២ឆ្នាំជាប់គ្នាផ្ទួនៗ ដែលមិនបានទប់ស្កាត់បទល្មើសជួញដូរមនុស្ស។
ឬសគឹលដែលចំណាត់ថ្នាក់កម្ពុជា នៅតែស្ថិតនៅលំដាប់ទី៣បែបនេះ គឺដោយសារតែអំពើពុករលួយ និងការពាក់ព័ន្ធនឹងមន្ត្រីរដ្ឋាភិបាលនៅក្នុងដំណើរការឧក្រិដ្ឋកម្មនានា ដែលបានចាក់ឬសយ៉ាងជ្រៅ និងធ្វើឲ្យប៉ះពាល់ទៅក្នុងដំណើរការនៃការបង្កើតច្បាប់មួយចំនួន ក្រោមហេតុផលនយោបាយ ក៏ដូចជាការប៉ះពាល់ដល់ការអនុវត្តច្បាប់ជាដើម។ តាមរបាយការណ៍ មានឧក្រិដ្ឋកម្មជាច្រើន ដែលរដ្ឋាភិបាលកម្ពុជាពុំបានប្រឹងប្រែងដោះស្រាយ ដែលរួមមានការជួញដូរមនុស្ស នៅក្នុងប្រតិបត្តិការបោកប្រាស់តាមប្រព័ន្ធបច្ចេកវិទ្យា ក្នុងវិស័យកម្សាន្ត និងអាជីវកម្មឡឥដ្ឋ។
ទោះយ៉ាងណា របាយការណ៍របស់ក្រសួងការបរទេសអាមេរិក ក៏បានទទួលស្គាល់ខ្លះដែរ ពីចំណាត់ការរបស់រដ្ឋាភិបាល បានស៊ើបអង្កេត និងកាត់ទោសអ្នកជួញដូរកាន់តែច្រើន តាមរយៈការបង្កើតក្រុមការងារពិសេសដោះស្រាយបញ្ហានេះកាលពីឆ្នាំកន្លងទៅ។
ជាការសាទរ ដែលធ្វើឡើងនៅគ្រាដែលរដ្ឋាភិបាលកម្ពុជា បានបើកយុទ្ធនាការបង្រ្កាបបទល្មើសជួញដូរមនុស្ស តាមទីតាំងកម្សាន្តក្នុងខេត្តជាគោលដៅ តួយ៉ាងដូចជាខេត្តព្រះសីហនុ។ ការបើកយុទ្ធនាការ កាលពីឆ្នាំ២០២២នោះ គឺដោយសារតែក្រសួងការបរទេសអាមេរិក បានវាយតម្លៃ និងឲ្យចំណាត់ថ្នាក់កម្ពុជាស្ថិតនៅក្នុងលំដាប់ទី៣ ដែលជាប្រទេសមិនបានទប់ស្កាត់បទល្មើសជួញដូរមនុស្ស និងធ្វើឲ្យបទល្មើសជាខ្នាតអន្តរជាតិនេះ មានការកើនឡើង។
លោកស្រី ជូ ប៊ុនអេង អនុប្រធានអចិន្ត្រៃយ៍នៃគណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស សុំមិនបញ្ចេញប្រតិកម្មអ្វីទាំងអស់ចំពោះការវាយតម្លៃរបស់អាមេរិក ដែលបន្តឲ្យចំណាត់ថ្នាក់កម្ពុជា ក្នុងលំដាប់ដ៏អាក្រក់បែបនេះ។ ផ្ទុយមកវិញ ជាទស្សនៈផ្ទាល់ខ្លួន អនុប្រធានអចិន្ត្រៃយ៍នៃគណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស បានសម្តែងនូវការអន់ចិត្ត និងថាវាមិនសក្តិសមទាល់តែសោះចំពោះកម្ពុជា ដែលបន្តទទួលបានចំណាត់ថ្នាក់ដែលមិនល្អបែបនេះ។ មិនសក្តិសម ដោយសារតែឆ្នាំ២០២២កន្លងទៅ អាជ្ញាធរកម្ពុជាបានព្យាយាមជួយជនរងគ្រោះបានរាប់ពាន់នាក់ និងបង្រ្កាបបានទីតាំងជួញដូរមនុស្សជាច្រើន តាមរយៈការបើកយុទ្ធនាការបង្រ្កាបការជួញដូរមនុស្ស។ នេះបើតាមលោកស្រី ជូ ប៊ុនអេង។ តាមលោកស្រី ជូ ប៊ុនអេង កម្ពុជាគួរតែទទួលបានការសរសើរចំពោះការប្រឹងប្រែងរបស់ខ្លួន និងចំណាត់ថ្នាក់ល្អជាងឆ្នាំមុន។
លោកស្រី ជូ ប៊ុនអេង ថា របាយការណ៍ប្រចាំឆ្នាំ២០២៣ គឺអាមេរិកចង់តែបង្ហាញពីភាពអវិជ្ជមាន ហើយបើកភ្នែកម្ខាង និងបិទភ្នែកម្ខាង សរសេររបាយការណ៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ