កម្ពុជាឈរនៅលេខរៀងទី៣ដែលមានប្រជាជនផឹកស្រាច្រើនជាងគេក្នុងតំបន់អាស៊ាន
កម្ពុជាឈរនៅលេខរៀងទី៣ ដែលមានប្រជាជនផឹកស្រាច្រើនជាងគេនៅក្នុងតំបន់អាស៊ាន និងឈរនៅលេខរៀងទី៣៦ នៅលើពិភពលោក ពោលគឺប្រជាជនកម្ពុជាម្នាក់អាចផឹកស្រាបាន ២១.៧លីត្រ។ នេះបើយោងតាមរបាយការណ៍របស់ Wisevoter។ របាយការណ៍នេះ អ្នកធ្វើកិច្ចការងារសង្គមលើកឡើងថាអាចឆ្លុះបញ្ចាំងការពិតដែរ ដោយសារតែកម្ពុជាគ្មានច្បាប់កំណត់អាយុនៃការផឹកស្រា។
ចុះផ្សាយនៅថ្ងៃ៖
ស្តាប់ - ០២:១៣
នៅក្នុងតំបន់អាស៊ាន បើមើលតាមរបាយការណ៍របស់ Wisevoter ឃើញថាកម្ពុជាឈរនៅលេខរៀងទី៣ ដែលមានប្រជាជនផឹកស្រាច្រើនជាងគេ និងលេខរៀងទី៣៦នៅក្នុងចំណោមប្រទេសនៅលើពិភពលោក ខណៈឡាវវិញឈរនៅលេខរៀងទី១ក្នុងតំបន់អាស៊ាន និងលេខរៀងទី១៨នៅលើពិភពលោក បន្ទាប់មកប្រទេសវៀតណាមឈរនៅលេខទី២ក្នុងតំបន់អាស៊ាន និងលេខរៀងទី២៨ នៅលើពិភពលោ ក។ ចំណែកប្រទេសអាស៊ានដែលមានប្រជាជនផឹកស្រាទាបជាងគេ គឺប្រទេសព្រុយណេ បន្ទាប់មកមានសាំងហ្គាពួរ ម៉ាឡេស៊ី និងប្រទេឥណ្ឌូនេស៊ី។
ចំពោះរបាយការណ៍នេះ លោក យ៉ង់ គឹមអេង ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាព លើកឡើងថា របាយការណ៍នេះ វាអាចឆ្លុះបញ្ចាំងការពិតពីកម្ពុជាដែរ។ ឆ្លុះបញ្ចាំងការពិត ដោយលោកបញ្ជាក់ថា ដោយសារកម្ពុជាពុំមានច្បាប់កំណត់អាយុប្រជាជន ដែលមានអាយុប៉ុន្មានទើបអាចទិញស្រានិងផឹកស្រាបាន។ មិនតែប៉ុណ្ណោះលោក យ៉ង់ គឹមអេង ក៏បានលើកឡើងដែរថា ប៉ាណូផ្សព្វផ្សាយពាណិជ្ជកម្មស្រាបៀ និងកន្លែងលក់ស្រាដោយពុំមានច្បាប់កំណត់ ក៏ជាបញ្ហាមួយជំរុញឲ្យមានការផឹកស្រាកាន់តែច្រើនផងដែរ។
យ៉ាងណាមិញ ការបរិភោគជាតិអាល់កុលញឹកញាប់ និងច្រើនហួសប្រមាណ អាចបង្កជាជំងឺ ព្រមទាំងគ្រោះថ្នាក់ផ្សេងៗ។ បញ្ហាប្រឈមទាំងនេះ អាចធ្វើឲ្យអ្នកបរិភោគវាត្រូវខាតអាយុចំនួន១ឆ្នាំជាមធ្យម។ នេះគឺជាការសន្និដ្ឋានក្នុងរបាយការណ៍នៃអង្គការOCDE ដែលបានធ្វើការអង្កេតជាមួយប្រជាជននៅតាមប្រទេសសមាជិកទាំង៥២ កាលពីឆ្នាំ២០២១។ យោងតាមអ្នកជំនាញ គឺពុំមានតួលេខវិទ្យាសាស្រ្ត បញ្ជាក់ថា កម្រិតបរិភោគជាតិអាល់កុលត្រឹមប៉ុណ្ណា ទើបមិនបង្កគ្រោះថ្នាក់ដល់ជីវិតនោះទេ។
ប៉ុន្តែរបាយការណ៍ OCDE បានកំណត់ថា ការបរិភោគជាតិអាល់កុល ដែលមានលក្ខណៈសាមញ្ញ មិនបង្កគ្រោះថ្នាក់ គឺសម្រាប់មនុស្សស្រី ១កែវជារៀងរាល់ថ្ងៃ សម្រាប់មនុស្សប្រុស ១.៥កែវជាប្រចាំថ្ងៃ។
ជុំវិញការផឹកស្រានៅកម្ពុជា សង្គមស៊ីវិលធ្លាប់លើកឡើងថារដ្ឋាភិបាលគួរតែមានច្បាប់គ្រប់គ្រងគ្រឿងស្រវឹងនៅកម្ពុជាទើបល្អ ជាពិសេសកំណត់អាយុផឹកស្រា ពីព្រោះការផឹកស្រាក៏ជាចំណែកមួយធ្វើឲ្យមានអំពើហិង្សា និងគ្រោះថ្នាក់ចរាចរណ៍នៅកម្ពុជាផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ