ប្រមុខការទូតកម្ពុជាត្រៀមចូលរួមកិច្ចប្រជុំរដ្ឋមន្ត្រីការបរទេសអាស៊ាន ដើម្បីជជែកពីបញ្ហាតំបន់
ប្រមុខការទូតកម្ពុជា លោក ប្រាក់ សុខុន នឹងត្រៀមចូលរួមកិច្ចប្រជុំរដ្ឋមន្ត្រីអាស៊ានចំនួន៤ថ្ងៃ នៅប្រទេសឥណ្ឌូនេស៊ី ដែលជាប្រធានអាស៊ានប្តូរវេននៅឆ្នាំនេះ។ នេះបើតាមសេចក្តីប្រកាសរបស់ក្រសួងការបរទេសកម្ពុជា។ យ៉ាងណាមិញ កិច្ចប្រជុំរដ្ឋមន្ត្រីការបរទេសអាស៊ានលើកនេះ អ្នកតាមដានបញ្ហាអន្តរជាតិយល់ថា នឹងមានការជជែកពីដំណោះស្រាយបន្តទៀត ទៅលើករណីជាប់គាំងនយោបាយនៅក្នុងប្រទេសភូមា។
ចុះផ្សាយនៅថ្ងៃ៖
ស្តាប់ - ០១:៤២
លោក ប្រាក់ សុខុន រដ្ឋមន្ត្រីក្រសួងការបរទេសកម្ពុជា នឹងត្រូវចូលរួមកិច្ចប្រជុំរដ្ឋមន្ត្រីការបរទេសអាស៊ានលើកទី៥៦ ពីថ្ងៃទី១១ដល់ថ្ងៃទី១៤កក្កដាខាងមុខ ក្នុងពេលដែលឥណ្ឌូនេស៊ីនឹងត្រូវរ៉ាប់រងជាប្រធានអាស៊ាននៅក្នុងឆ្នាំនេះ។ ក្រោមមូលបទ «សារៈសំខាន់អាស៊ាន៖ ស្នូលនៃកំណើន» រដ្ឋមន្ត្រីការបរទេសអាស៊ាននឹងត្រូវពិភាក្សាគ្នា ដើម្បីជំរុញបន្ថែម នូវដំណើរការកសាងសហគមន៍អាស៊ាន និងការឯកភាព សាមគ្គីភាពអាស៊ានកាន់តែខ្លាំងឡើង។ នេះបើតាមសេចក្តីប្រកាសរបស់ក្រសួងការបរទេស នៅថ្ងៃសុក្រ។
កិច្ចប្រជុំរដ្ឋមន្ត្រីការបរទេសអាស៊ានលើកនេះ ក៏នឹងត្រូវជជែកពីតួនាទីរបស់អាស៊ាន នៅក្នុងបញ្ហាតំបន់និងអន្តរជាតិ ដែលជាប្រយោជន៍ និងក្តីបារម្ភរបស់បណ្តាប្រទេសជាសមាជិក។ បញ្ហាតំបន់ ដែលមិនអាចមើលរំលងបាន អំពីបញ្ហាជាប់គាំងនយោបាយនៅក្នុងប្រទេសភូមា។ នេះបើតាមការកត់សម្គាល់របស់អ្នកតាមដានបញ្ហាអន្តរជាតិ។
លោក វណ្ណ ប៉ុណ្ណា អ្នកស្រាវជ្រាវភូមិសាស្រ្តនយោបាយ យល់ថា កម្ពុជាជាប្រទេសដើរតួនាទីសំខាន់ជាងគេ នៅក្នុងការស្វែងរកដំណោះស្រាយដល់ភូមា ខណៈដែលកម្ពុជាគឺជាប្រទេសដែលជំរុញបញ្ហាភូមានេះ នៅក្នុងពេលដែលខ្លួនរ៉ាប់រងជាប្រធានអាស៊ាននៅក្នុងឆ្នាំ២០២២។ យ៉ាងណាមិញ យន្តការដោះស្រាយវិបត្តិភូមា ក៏ត្រូវការតួអង្គផ្សេងៗទៀត តួយ៉ាងប្រទេសមហាអំណាច និងអង្គការសហប្រជាជាតិ។ នេះបើតាមលោក វណ្ណ ប៉ុណ្ណា។
គួរបញ្ជាក់ថា នៅក្នុងវិបត្តិជាប់គាំងរបស់ភូមា ក៏ជាពេលដែលកម្ពុជាត្រូវធ្វើជាប្រធានអាស៊ានកាលពីឆ្នាំ២០២២ កម្ពុជាបានចាត់តាំងប្រសិតពិសេសរបស់ខ្លួន គឺលោក ប្រាក់ សុខុន ក្នុងការសម្របសម្រួល និងធ្វើទស្សនកិច្ចចំនួន២លើក ខណៈដែលវិបត្តិនយោបាយនៅតែបន្តជាប់គាំង។ បន្ថែមពីនេះ លោកនាយករដ្ឋមន្ត្រី ហ៊ុន សែន កាលពីដើមឆ្នាំ២០២២ ក៏ធ្លាប់ទៅទស្សនកិច្ចភូមា នៅអំឡុងពេលដែលរបបសឹកយោធាចូលកាន់កាប់អំណាច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ