អ្នកជំនាញUN ថា ៣០ឆ្នាំក្រោយមានកិច្ចព្រមព្រៀងទីក្រុងប៉ារីស កម្ពុជានៅតែបរាជ័យការធានាបញ្ហាសិទ្ធិមនុស្ស និងលទ្ធិប្រជាធិបតេយ្យ
ក្រុមអ្នកជំនាញផ្នែកសិទ្ធិមនុស្ស និងអ្នករាយការណ៍ប្រចាំកម្ពុជា បានបន្តចេញមុខមករិះគន់ពីការបោះឆ្នោតជ្រើសតាំងតំណាងរាស្ត្រនីតិកាលទី៧ ថា បានធ្វើឲ្យប៉ះពាល់ភាពជឿជាក់ ដោយសារតែការបង្ក្រាប និងបំពានយ៉ាងធ្ងន់ធ្ងរលើបញ្ហាសិទ្ធិមនុស្ស លំហសង្គមស៊ីវិលនិងនយោបាយ។ ក្រុមអ្នកជំនាញសិទ្ធិមនុស្សនៃអង្គការសហប្រជាជាតិបានចុចដោយចំថា កម្ពុជានៅតែបរាជ័យពីការធានាបាននូវសិទ្ធិមនុស្ស និងលទ្ធិប្រជាធិបតេយ្យ សេរី ពហុបក្ស នៅរយៈពេល៣០ឆ្នាំក្រោយមានកិច្ចព្រមព្រៀងសន្តិភាពទីក្រុងប៉ារីស។
ចុះផ្សាយនៅថ្ងៃ៖
ស្តាប់ - ០២:១១
តាមរយៈសេចក្តីប្រកាសព័ត៌មាន ពីទីក្រុងហ្សឺណែវ ប្រទេសស្វីស នៅថ្ងៃទី២សីហា ក្រុមអ្នកជំនាញផ្នែកសិទ្ធិមនុស្សរបស់អង្គការសហប្រជាជាតិ និងរួមទាំង លោក Vitit Muntarbhorn អ្នករាយការណ៍ពិសេសប្រចាំកម្ពុជា ផងនោះ បានបង្ហាញពីក្តីកង្វល់របស់ខ្លួនចំពោះការបោះឆ្នោតឆ្នាំ២០២៣ ដែលទើបតែបញ្ចប់ថ្មីៗនេះ ថាបានធ្វើឲ្យប៉ះពាល់ដល់ភាពជឿជាក់ពីសំណាក់សហគមន៍អន្តរជាតិ ដោយសារតែការរំលោភសិទ្ធិមនុស្ស ការរឹតបន្តឹងលើលំហសង្គមស៊ីវិល និងនយោបាយ ការហាមប្រាមគណបក្សប្រឆាំងដ៏មានឥទ្ធិពលមិនឲ្យចូលរួមការបោះឆ្នោត ដែលជាហេតុធ្វើឲ្យការបោះឆ្នោតកន្លងទៅនេះ មិនមានតុល្យភាព។
ក្រុមអ្នកជំនាញផ្នែកសិទ្ធិមនុស្សរបស់អង្គការសហប្រជាជាតិ ចាត់ទុកថា ការបង្រួមលំហប្រជាធិបតេយ្យ និងការគាបសង្កត់ បាននិងកំពុងប្រាសចាកពីការសន្យារបស់កម្ពុជាក្រោមកាតព្វកិច្ចអន្តរជាតិ និងកិច្ចព្រមព្រៀងសន្តិភាពទីក្រុងប៉ារីស។ កិច្ចព្រមព្រៀងសន្តិភាពទីក្រុងប៉ារីស ដែលក្រុមអ្នកជំនាញផ្នែកសិទ្ធិមនុស្សអន្តរជាតិ បានស្តីបន្ទោសថា ៣០កន្លងផងផុតទៅនេះ កម្ពុជានៅតែបរាជ័យក្នុងការធានាការពារសិទ្ធិមនុស្ស និងការធ្វើឲ្យខូចប្រព័ន្ធនៃគោលការណ៍ប្រជាធិបតេយ្យ។
បើតាមសេចក្តីប្រកាស គឺរាល់បញ្ហាទាំងអស់ដែលបានកើតឡើង ជុំវិញបញ្ហាបោះឆ្នោតឃុំ-សង្កាត់ឆ្នាំ២០២២ និងការបោះឆ្នោតជ្រើសតាំងតំណាងរាស្ត្រឆ្នាំ២០២៣ នឹងត្រូវយកទៅពិចារណាក្នុងរបាយការណ៍សិទ្ធិមនុស្សកម្ពុជា ដោយក្រុមប្រឹក្សាសិទ្ធិមនុស្សអង្គការសហប្រជាជាតិនៅចុងឆ្នាំនេះ។
គួរកត់សម្គាល់ថា ការបោះឆ្នោតឆ្នាំ២០២៣នេះ ត្រូវបានសហគមន៍អន្តរជាតិចោលភ្នែកសម្លឹងមើល ពីការដំណើរការនៃលទ្ធិប្រជាធិបតេយ្យ និងការគោរពសិទ្ធិមនុស្ស ដ្បិតជាពេលដែលកម្ពុជាកំពុងស្ថិតក្នុងដំណាក់កាលអន្តរកាល នៃការផ្លាស់ប្តូរនាយករដ្ឋមន្ត្រីថ្មី។ ក្រុមអ្នកជំនាញផ្នែកសិទ្ធិមនុស្សរបស់អង្គការសហប្រជាជាតិ លើកឡើងថា សហគមន៍អន្តរជាតិត្រូវតែមានការប្រុងប្រយ័ត្ន និងរៀបចំឆ្លើយតបជាអន្តរជាតិចំពោះវិបត្តិប្រជាធិបតេយ្យនៅកម្ពុជា ក្រោយពេលដែលលោកនាយករដ្ឋមន្ត្រី ហ៊ុន សែន ត្រៀមផ្ទេរអំណាចឲ្យទៅលោក ហ៊ុន ម៉ាណែត ក្នុងពេលខាងមុខនេះ។
តាមក្រុមអ្នកជំនាញUN រដ្ឋាភិបាលថ្មីត្រូវតែគោរពកាតព្វកិច្ចសិទ្ធិមនុស្សអន្តរជាតិរបស់ខ្លួន និងកិច្ចព្រមព្រៀងសន្តិភាពទីក្រុងប៉ារីស រួមទាំងដោះស្រាយបញ្ហារំលោភសិទ្ធិមនុស្សធ្ងន់ធ្ងរទាំងចាស់ និងថ្មី ដែលរារាំងដល់ការអភិវឌ្ឍន៍ប្រទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ