បណ្ឌិតមាស នី៖ វិបត្តិទឹកកខ្វក់ដងស្ទឹងសង្កែបង្ហាញឱ្យឃើញពីចំណុចខ្សោយរបស់អាជ្ញាធរពាក់ព័ន្ធ
រយៈពេល១សប្តាហ៍ទៅហើយដែលទឹកដងស្ទឹងសង្កែ ខេត្តបាត់ដំបង បានប្រែទៅជាព័ណ៌ខ្មៅខុសប្រក្រតី និងមានសារធាតុបំពុលធ្វើឱ្យងាប់ត្រីមួយចំនួន ដោយសារការលេចធ្លាយទឹកកខ្វក់ចេញពីក្រុមហ៊ុនចិនមួយ។ បើតាមក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ នេះគឺជាលើកទី៣ ដែលបង្កឱ្យមានផលប៉ះពាល់ដល់បរិស្ថានធ្ងន់ធ្ងរដូច្នេះ។ លោកបណ្ឌិត មាស នី អ្នកវិភាគបញ្ហាសង្គមយល់ថា វិបត្តិខាងលើនេះបង្ហាញពលរដ្ឋឱ្យឃើញយ៉ាងច្បាស់អំពីកំសោយនៃការគ្រប់គ្រងរបស់អាជ្ញាធរពាក់ព័ន្ធ។ សូមស្តាប់ អោ ស្រីពេជ្រ៖
ចុះផ្សាយនៅថ្ងៃ៖
ស្តាប់ - ០៣:០៥
ក្រុមហ៊ុនចិនផលិតម្សៅដំឡូងមី សំបកគ្រាប់ថ្មាំ អេតាណុល ជីវគីមី និងសារធាតុបន្ថែមអាហារ នៅក្នុងខេត្តបាត់ដំបង ដែលមានឈ្មោះថា Phoenix IndustrialCO.,LTD. បានធ្វើឱ្យបែកធ្លាយសំណល់រាវ ឬ ទឹកកខ្វក់ ចូលក្នុងស្ទឹងសង្កែ ដែលជាហេតុបណ្តាលឱ្យទឹកស្ទឹងសង្កែប្រែជាព័ណ៍ខ្មៅខុសសព្វមួយដង និងមានសារធាតុបំពុលធ្វើឱ្យងាប់ត្រីមួយចំនួន។ ហើយនេះគឺជាលើកទី៣ ដែលបង្កឱ្យមានផលប៉ះពាល់ដល់បរិស្ថានធ្ងន់ធ្ងរដូច្នេះ។
នៅក្នុងលិខិតចុះថ្ងៃទី៤ ខែសីហា ឆ្នាំ២០២៣ ផ្ញើទៅកាន់ប្រធានក្រុមហ៊ុនចិនខាងលើនេះ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានបញ្ជាឱ្យក្រុមហ៊ុននោះផ្អាកដំណើរការទាំងស្រុង នូវរាល់សកម្មភាពផលិតកម្មជាបណ្តោះអាសន្ន ដោយរក្សាបៀវត្សរ៍បុគ្គលិក កម្មករជាធម្មតា ក្នុងរយៈពេល២សប្តាហ៍ គឺរហូតដល់ថ្ងៃទី១៨ ខែសីហា ឆ្នាំ២០២៣ ដើម្បីកែសម្រួលកំហុសឆ្គងដែលបានព្រមព្រៀងគ្នាហើយរវាងក្រុមហ៊ុននិងគណៈកម្មាការចម្រុះខេត្តបាត់ដំបង។
ទន្ទឹមគ្នានេះ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានព្រមានទុកជាមុនថា ក្រុមហ៊ុនចិនPhoenix Industrial CO.,LTD. នឹងត្រូវប្រឈមមុខក្នុងការផ្អាកបន្តទៀត ក្នុងករណីពុំបានអនុវត្តត្រឹមត្រូវ និងទាន់ពេលវេលា តាមលក្ខខណ្ឌដែលបានព្រមព្រៀងគ្នា។
គួរជម្រាបថា រដ្ឋាករទឹកស្អាតខេត្តបាត់ដំបងបានប្រកាសផ្អាកការបូមទឹកយកមកចម្រោះសម្រាប់ការប្រើប្រាស់ ប្រជាពលរដ្ឋ។ រីឯរដ្ឋបាលខេត្តបាត់ដំបងវិញបានបំភ្លឺថា គិតត្រឹមនៅរសៀលថ្ងៃទី៤ខែសីហា ទឹកបានប្រែមកសភាពធម្មតាវិញ ជាមួយនឹងគុណភាពល្អជាធម្មតា គ្មានផលប៉ះពាល់ដល់សុខភាពទៀតនោះទេ។
អ្នកវិភាគបញ្ហាសង្គម លោកបណ្ឌិត មាស នី តាមរយៈវិទ្យុបារាំងនៅថ្ងៃទី៨សីហានេះ យល់ថា វិបត្តិទឹកកខ្វក់នៅដងស្ទឹងសង្កែនៅពេលនេះ បង្ហាញឱ្យឃើញពីកំសោយនៃការគ្រប់គ្រងរបស់អាជ្ញាធរមន្ត្រីពាក់ព័ន្ធ។ ជាកម្សោយ ពីព្រោះ មិនមែនជារឿងថ្មី តែជារឿងចាស់ ដែលតែងកើតមានរាល់រដូវភ្លៀងធ្លាក់នៅប៉ុន្មានឆ្នាំចុងក្រោយនេះ។ លោកបណ្ឌិតដែលជាអ្នករស់នៅក្នុងខេត្តបាត់ដំបងដែរ បានដឹងថាធ្លាប់មានមន្ត្រីចុះមកពិនិត្យបញ្ហាទឹកកខ្វក់នេះ ប៉ុន្តែមិនដែលឃើញដោះស្រាយចេញសោះ។
ជុំវិញបញ្ហានេះ លោកបណ្ឌិត មាស នី សំណូមពរឱ្យមានការសិក្សាពីគុណភាពទឹកដងស្ទឹងសង្កែនេះ ក៏ដូចជាប្រភពបង្ហូរទឹកកខ្វក់ ឱ្យច្បាស់និងត្រឹមត្រូវ និងត្រូវប្រកាសជាសាធារណៈឱ្យប្រជាពលរដ្ឋបានដឹង មិនមែននៅសំងំស្ងាត់ៗ រហូតដល់ពេលប្រកាសបិទទឹកប្រើប្រាស់របស់ប្រជាជននោះទេ។
គួរដឹងថា ក្រុមហ៊ុនចិន ឈ្មោះ Phoenix Industrial ដែលស្ថិតនៅក្រោមការគ្រប់គ្រងរបស់ ក្រុមហ៊ុន ER KANG BIOSTARCH អឺរ កាង បៃអូស្តាច ជាក្រុមហ៊ុនផលិតសារធាតុសូដ្យូម ស៊ីត្រាត ឌីអ៊ីដ្រាត (Sodium citrate dehydrate) និងនាំចេញទៅកាន់សហរដ្ឋអាមេរិក។ សារធាតុ សូដ្យូម ស៊ីត្រាត ឌីអ៊ីដ្រាត គឺជាអំបិលនៃអាស៊ីដ ដែលប្រើសម្រាប់ការព្យាបាលសម្រាប់គ្រួសក្នុងតម្រងនោម និងរក្សាអាហារឱ្យទុកបានយូរ។ ផលប៉ះពាល់នៃសារធាតុនេះ នឹងបង្កឱ្យមានការ ក្អួតចង្អោរ រាក ឈឺពោះ និងខ្សោះជាតិទឹក ពិសេសប៉ះពាល់ខ្លាំងលើអ្នកមានជំងឺខ្សោយតម្រងនោម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ