រដ្ឋាភិបាលកម្ពុជាសម្រេចកែប្រែទំហំដីឧទ្យានជាតិសំខាន់ៗ ក្រោមហេតុផលធានាការគ្រប់គ្រងបរិស្ថាន
ទំហំផ្ទៃដីនៃឧទ្យានជាតិសំខាន់ៗជាច្រើនរួមមាន ឧទ្យានជាតិបទុមសាគរ ឧទ្យានជាតិកែប និងឧទ្យានជាតិវើនសៃ-សៀមប៉ាង ត្រូវបានរដ្ឋាភិបាលកម្ពុជាសម្រេចកែសម្រួលដំណាលគ្នា នៅក្រោមហេតុផលធានាការគ្រប់គ្រងបរិស្ថាន អភិរក្សជីវៈចម្រុះ ការប្រើប្រាស់ធនធានធម្មជាតិដោយនិរន្តរភាព និងការរស់នៅដោយចីរភាពស្របទៅតាមច្បាប់។ តាមរយៈវិទ្យុបារាំង សមាគមបណ្តាញយុវជនកម្ពុជាកត់សម្គាល់ឃើញថា រាល់ការកាត់ឆ្កៀលដីរដ្ឋសម្រាប់ការអភិវឌ្ឍកន្លងមក ភាគច្រើនរំលងប្រជាពលរដ្ឋ គ្មានការពិគ្រោះនិងដោះស្រាយពីផលប៉ះពាល់ត្រឹមត្រូវ។
ចុះផ្សាយនៅថ្ងៃ៖
ស្តាប់ - ០៣:៣០
អនុក្រឹត្យស្តីពីការកែប្រែឧទ្យានជាតិបទុមសាគរ អនុក្រឹត្យស្តីពីការកែប្រែឧទ្យានជាតិកែប និងអនុក្រឹត្យស្តីពីការកែប្រែឧទ្យានជាតិវើនសៃ-សៀមប៉ាង ត្រូវបានរដ្ឋាភិបាលកម្ពុជាសម្រេចដំណាលគ្នា ចុះថ្ងៃទី១៧ ខែកក្កដា ឆ្នាំ២០២៣ និងដែលទើបបង្ហាញជាសាធារណៈនៅថ្ងៃទី៨សីហានេះ។
យោងតាមអនុក្រឹត្យដាច់ដោយឡែក៣ផ្សេងគ្នា ឧទ្យានជាតិបទុមសាគរ ត្រូវបានកាត់បង្រួមពីផ្ទៃដីទំហំ ១៧១ ២៥០ ហិកតា (មានចែងក្នុងព្រះរាជក្រឹត្យចុះថ្ងៃទី១៧ ខែវិច្ឆិកា ឆ្នាំ១៩៩៣ ស្តីពីការបង្កើតតំបន់ធម្មជាតិ) មកនៅផ្ទៃដីទំហំ ១៤៣ ៨៩៥ ហិកតា។
ចំណែកឯ ឧទ្យានជាតិវើនសៃ-សៀមប៉ាង ក៏ត្រូវបានកាត់បង្រួមពីផ្ទៃដីទំហំ ៥៧ ៤៦៩ ប្រាំម៉ឺនប្រាំពីរពាន់បួយរយហុកសិបប្រាំបួន ហិកតា មកផ្ទៃដីទំហំ ២៨០ ៣៥៩ ហិកតា ស្ថិតនៅក្នុងភូមិសាស្ត្រខេត្តរតនគិរីនិងខេត្តស្ទឹងត្រែង។ គួរជម្រាបជូនថា ផ្ទៃដីឧទ្យានជាតិវើនសៃ-សៀមប៉ាង ត្រូវបានរដ្ឋាភិបាល អះអាងថា បានមកពីការបូកបញ្ចូលផ្ទៃដីទំហំ ៥៧ ៤៦៩ ហិកតា (ដូចមានចែងនៅក្នុងអនុក្រឹត្យចុះថ្ងៃទី២ ខែឧសភា ឆ្នាំ ២០១៦ ស្តីពីការបង្កើតតំបន់ឧទ្យានជាតិវើនសៃ-សៀមប៉ាង) និងផ្នែកខ្លះនៃរបៀងអភិរក្សអភិរក្សជីវៈចម្រុះឦសាន ដែលមានផ្ទៃដីទំហំ ២២២ ៨៩០ ហិកតា (ដូចមានចែងក្នុងអនុក្រឹត្យចុះថ្ងៃទី១៧ ខែមករា ឆ្នាំ២០១៧)។
ខុសពីឧទ្យានជាតិទាំងពីរខាងលើ ឧទ្យានជាតិកែបវិញ ត្រូវបានពង្រីកពីផ្ទៃដីទំហំ ១ ១៥២ ហិកតា (ដែលមានចែងនៅក្នុងអនុក្រឹត្យចុះថ្ងៃទី២៥ ខែតុលា ឆ្នាំ២០១០ ស្តីពីការកំណត់តំបន់ឧទ្យានជាតិកែប) មកផ្ទៃដីទំហំ ១ ២៣០ មួយពាន់ពីរយសាមសិប ហិកតា។
បើតាមអនុក្រឹត្យថ្មីចុះថ្ងៃទី១៧ ខែកក្កដា ឆ្នាំ២០២៣ រដ្ឋាភិបាលបញ្ជាក់ពីហេតុផលដូចគ្នាថា ការកែប្រែឧទ្យានជាតិទាំង៣នេះ គឺក្នុងគោលបំណង ធានាការគ្រប់គ្រងបរិស្ថាន ការអភិរក្សជីវៈចម្រុះ ការប្រើប្រាស់ធនធានធម្មជាតិដោយនិរន្តរភាព និងការរស់នៅដោយចីរភាពស្របតាមច្បាប់។
លោក ហេង គឹមហុង ប្រធានផ្នែកកម្មវិធីស្រាវជ្រាវ និងតស៊ូមតិនៃសមាគមបណ្តាញយុវជនកម្ពុជា កត់សម្គាល់ឃើញថា រាល់ការកាត់ឆ្កៀលដីរដ្ឋសម្រាប់ការអភិវឌ្ឍកន្លងមក ភាគច្រើនរំលងប្រជាពលរដ្ឋ គ្មានការពិគ្រោះនិងដោះស្រាយពីផលប៉ះពាល់ត្រឹមត្រូវ។
ទន្ទឹមនឹងការកាត់ឆ្កៀលតំបន់ខ្លះនៃឧទ្យានជាតិបទុមសាគរ សកម្មជនបរិស្ថាន លោក ហេង គឹម ហុង មានក្តីបារម្ភណាស់ ព្រោះលោកយល់ថា ឧទ្យានជាតិបទុមសាគរ គឺផ្នែកសំខាន់នៃការផ្សារភ្ជាប់ចុងម្ខាងនៃភ្នំក្រវ៉ាញទៅកាន់សមុទ្រ ដែលពោរពេញដោយគម្របព្រៃឈើចម្រុះ ដែលមានសក្តានុពលសម្រាប់ជីវៈចម្រុះធម្មជាតិ។ បើតាមលោក ហេង គឹមហុង មានផ្ទៃដីប្រមាណ៨០ភាគរយនៃឧទ្យានជាតិបទុមសាគរនេះ ត្រូវបានកាត់ជាបន្តបន្ទាប់ទៅឱ្យក្រុមហ៊ុនឯកជនដើម្បីកាន់កាប់ ដោយជ្រកក្រោមស្លាកអភិវឌ្ឍក្នុងរូបភាពផ្សេងៗគ្នា ដូចជាការសាងសង់ព្រលានយន្តហោះ សិប្បកម្មស្ករអំពៅ..។ល។
គួរជម្រាបជូនថា ជារឿយៗ រដ្ឋាភិបាលកម្ពុជា តែងចេញអនុក្រឹត្យកាត់ដីសាធារណៈដែលស្ថិតនៅក្នុងតំបន់អភិរក្ស ឬ ឧទ្យានជាតិ ទៅឱ្យក្រុមហ៊ុនរបស់ឧកញ៉ាក្នុងស្រុក និងក្រុមហ៊ុនឯកជនផ្សេងៗទៀត ក្រោមហេតុផលវិនិយោគ និងអភិវឌ្ឍ។ ការកាត់ឆ្កៀលដីសាធារណៈរបស់រដ្ឋ ពិសេសដីឧទ្យានជាតិ និងដីក្នុងតំបន់អភិរក្ស អ្នកវិភាគខ្លះចាត់ទុកថា ជារូបភាពពុករលួយរបស់រដ្ឋាភិបាល ក្នុងការកេងចំណេញផលប្រយោជន៍ពីការវិនិយោគទាំងនោះ ខណៈពួកគេកត់សម្គាល់ថា ភាគច្រើនបុគ្គលដែលទទួលបានដីទាំងនោះមកវិនិយោគ គឺជាមនុស្សដែលស្និទ្ធិនឹងរដ្ឋាភិបាល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ