ពលរដ្ឋខ្មែរនៅក្រៅប្រទេសធ្វើបាតុកម្មព្រមៗគ្នាមិនទទួលស្គាល់រដ្ឋាភិបាលថ្មី
បាតុកម្មដែលរៀបចំដោយពលរដ្ឋខ្មែរ និងអ្នកនយោបាយប្រឆាំងរស់នៅក្រៅប្រទេសបានផ្ទុះឡើងព្រមៗគ្នានៅថ្ងៃអាទិត្យនេះ គឺជាអ្វីដែលត្រូវបានអ្នករៀបចំប្រកាសថា ក្នុងបំណងឲ្យប្រទេសលោកសេរីមិនទទួលស្គាល់ដាច់ខាតចំពោះរដ្ឋាភិបាលថ្មីនៅកម្ពុជាដែលជាការផ្ទេរអំណាចពីឪពុកទៅកូន។ បាតុកម្មនេះកើតឡើងនៅសហរដ្ឋអាមេរិក កូរ៉េខាងត្បូង និងជប៉ុន ពោលមុនមួយថ្ងៃដែលត្រូវកោះប្រជុំតំណាងរាស្ត្រជាប់ឆ្នោតលើកដំបូង ដើម្បីបោះឆ្នោតគាំទ្រសមាសភាពថ្នាក់ដឹកនាំរដ្ឋសភា និងរដ្ឋាភិបាលកម្ពុជា។
ចុះផ្សាយនៅថ្ងៃ៖
ស្តាប់ - ០២:១៤
តាមការប្រកាសរបស់លោក សម រង្ស៊ី បាតុកម្មធំមួយត្រូវធ្វើឡើងនៅថ្ងៃអាទិត្យនេះនៅទីក្រុងឡូវ៉ែល រដ្ឋមាស៉្សាឈូសេត សហរដ្ឋអមេរិក។ ជាបាតុកម្មដែលមានការចូលរួមផ្ទាល់ពីសំណាក់អ្នកនយោបាយប្រឆាំងដែលកំពុងនិរទេសខ្លួន។
នៅកូរ៉េខាងត្បូងវិញ អ្នករៀបចំបាតុកម្ម អះអាងថា មានបាតុករជាង ៥០០នាក់ចូលរួមបាតុកម្មនៅថ្ងៃអាទិត្យនេះ នៅទីលានជុងកាក់ ក្នុងទីក្រុងសេអ៊ូល។ នៅប្រទេសជប៉ុនក៏មានបាតុកម្មដែលមានមនុស្សខ្ទង់២០០នាក់ចូលរួមធ្វើឡើងក្នុងបរិវេណសួន អូអិណុ ក្នុងទីក្រុងតូក្យូ ដែលជាចូលរួមផ្ទាល់ពីអតីតសមាជិកគណបក្សភ្លើងទៀនមួយចំនួន ដែលទៅចុះចូលជាមួយគណបក្សប្រជាជនកម្ពុជា ហើយទើបរត់ចេញវិញទៅជ្រកកោននៅប្រទេសជប៉ុន។
បើតាមអ្នករៀបចំបាតុកម្ម គឺអះអាងថា ពួកគេមកជួបជុំគ្នាសំដែងមតិដោយស្ម័គ្រចិត្ត ក្នុងបំណងអំពាវនាវឲ្យប្រទេសលោកសេរីមិនឲ្យទទួលស្គាល់ដាច់ខាតចំពោះរដ្ឋាភិបាលថ្មីនៅកម្ពុជាដែលជាការផ្ទេរអំណាចពីឪពុកទៅកូន។
បន្ទាប់ពីជួបជុំក្រុមបាតុករត្រូវដើរថ្មើជើងដង្ហែញត្តិដាក់ទៅក្រសួងការបរទេសនៃប្រទេសសាមី និងស្ថានទូតរបស់ប្រទេសជាម្ចាស់ហត្ថលេខីនៃកិច្ចព្រមព្រៀងសន្តិភាពទីក្រុងប៉ារីស ចំនួន ១៩ប្រទេសដើម្បីស្នើសុំជួយអន្តរាគមន៍ជំរុញឱ្យកម្ពុជាបើកលំហសិទ្ធិសេរីភាព និងបើកលំហលទ្ធិប្រជាធិបតេយ្យឡើងវិញ។
ក៏ប៉ុន្តែដូចបាតុកម្មរាល់ដងដែរ លោក សុខ ឥសាន អ្នកនាំពាក្យគណបក្សប្រជាជនកម្ពុជា អះអាងថា បាតុកម្មរបស់អ្នកប្រឆាំងនៅក្រៅប្រទេសមិនមានឥទ្ធិពលមកលើការសម្រេចចិត្តរបស់កម្ពុជាឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ