ប្រជុំសភាដំបូង៖ អ្នកឃ្លាំមើលរំពឹងពីការដោះស្រាយបញ្ហាជាតិធំៗ និងការលូតលាស់ទៅមុខ
ព្រះមហាក្សត្រកម្ពុជាព្រះបាទសម្តេចព្រះនរោត្តម សីហមុនី បានមានបន្ទូលថាព្រះអង្គមានជំនឿយ៉ាងមុតមាំថារាជរដ្ឋាភិបាលអាណត្តិថ្មី ដែលនឹងទទួលបានការទុកចិត្តពីរដ្ឋសភា នឹងបំពេញភារកិច្ចតាមគោលនយោបាយបន្តជំរុញកំណើនសេដ្ឋកិច្ច ការលើកកម្ពស់កម្រិតជីវភាពប្រជាពលរដ្ឋ ពង្រឹងប្រព័ន្ធការពារសង្គម និងបញ្ហាមួយចំនួនទៀត។ ព្រះរាជបន្ទូលរបស់ព្រះមហាក្សត្រដូច្នេះ បានធ្វើឡើងនៅក្នុងកិច្ចប្រជុំសភាដំបូងនៃនីតិកាលទី៧ នាព្រឹកថ្ងៃចន្ទ ទី២១ ខែសីហានេះ។ ជាមួយគ្នានេះ អ្នកឃ្លាំមើលនយោបាយ និងសង្គមក៏បានដាក់ការរំពឹងដែរថារដ្ឋាភិបាល ដែលទទួលបានការផ្តល់សេចក្តីទុកចិត្តពីសភាពេលនេះ នឹងមានការលូតលាស់ទៅមុខ។
ចុះផ្សាយនៅថ្ងៃ៖
ស្តាប់ - ០២:២៦
នៅក្នុងការបើកកិច្ចប្រជុំរដ្ឋសភាដំបូងនៃនីតិកាលទី៧ នៅថ្ងៃនេះ ព្រះមហាក្សត្រកម្ពុជាព្រះបាទសម្តេចព្រះនរោត្តម សីហមុនី បានថ្លែងព្រះរាជសុន្ទរកថាថា តំណាងរាស្ត្រនៅក្នុងរដ្ឋសភាជាតំណាងប្រជាពលរដ្ឋទាំងមូល ធ្វើយ៉ាងណាខិតខំប្រឹងប្រែងបន្ថែមទៀតជួយប្រជាពលរដ្ឋរស់នៅបានស្មើភាពគ្នាក្នុងជំនឿសាសនា ការសិក្សារៀនសូត្រ មានការងារធ្វើសមរម្យទៅតាមសមត្ថភាព និងកម្រិតវិជ្ជារបស់ខ្លួន។
ព្រះមហាក្សត្រមានជំនឿយ៉ាងមុតមាំថា រាជរដ្ឋាភិបាលកម្ពុជាអាណត្តិថ្មី ដែលនឹងទទួលការទុកចិត្តពី រដ្ឋសភា នឹងបំពេញភារកិច្ចតាមគោលនយោបាយ បន្តជំរុញកំណើនសេដ្ឋកិច្ច លើកកម្ពស់កម្រិតជីវភាពប្រជាពលរដ្ឋ បន្តអភិវឌ្ឍ និងពង្រឹងប្រព័ន្ធការពារសង្គម ដែលមានវិសាលភាពគ្របដណ្តប់ប្រជាពលរដ្ឋគ្រប់រូប ទាំងការអភិរក្ស និងអភិវឌ្ឍវប្បធម៌ដោយចីរភាព ដើម្បីធានាអត្ថិភាពដ៏រឹងមាំនៃអត្តសញ្ញាណជាតិ ជំរុញការអភិវឌ្ឍន៍សេដ្ឋកិច្ចសង្គម ស្របគ្នានឹងការលើកកម្ពស់សីលធម៌ សម្រាប់ភាពសុខដុមនៃសង្គមជាតិ។
ព្រះមហាក្សត្រក៏បានមានបន្ទូលបញ្ជាក់ដែរថា ដើម្បីសម្រេចភារកិច្ចដ៏ឧត្តុង្គឧត្តមនេះ ប្រជាជាតិកម្ពុជាត្រូវមានឯកភាព និងសាមគ្គីភាពជាតិខ្ពស់ ដោយឈរលើស្មារតីបង្រួបបង្រួមជាតិ និងប្រកាន់ខ្ជាប់នូវព្រហ្មវិហារធម៌ទាំង៤ គឺមេត្តា ករុណា មុទិតា និងឧបេក្ខា។
ជុំវិញបញ្ហានេះដែរ លោកបណ្ឌិត យង់ ពៅ អគ្គលេខាធិការនៃរាជបណ្ឌិតសភាកម្ពុជាបានសរសេរនៅលើហ្វេសប៊ុករបស់លោកនៅថ្ងៃនេះដែរ ដោយលោកមើលឃើញថារដ្ឋាភិបាលនីតិកាលទី៧ ចាប់ផ្តើមចេញដំណើរដោយមានខ្នងបង្អែករឹងមាំ រឹងមាំទាំងទិដ្ឋភាពច្បាប់ ទិដ្ឋភាពនយោបាយ និងទិដ្ឋភាពសង្គម ដែលជ្រកក្រោមម្លប់សន្តិភាព។ ផ្អែកលើទិដ្ឋភាពរឹងមាំទាំងនេះ ប្រសិនបើដឹកនាំមិនលូតលាស់ នោះគឺជាកំហុសធ្ងន់។ ក៏ប៉ុន្តែលោកសង្ឃឹមថា រដ្ឋាភិបាលថ្មីនឹងធ្វើដំណើរដោយស្វាហាប់ ហើយទទួលបានផ្លែផ្កាល្អបន្ថែមទៀត។
លោក មុត ចន្ថា ជំនួយការផ្ទាល់លោក កឹម សុខា ប្រធានអតីតគណបក្សសង្គ្រោះជាតិ បានសរសេរនៅលើហ្វេសប៊ុកលោកថា លោករង់ចាំមើលថាតើរដ្ឋាភិបាលថ្មី នឹងដោះស្រាយបញ្ហាធំៗរបស់ជាតិយ៉ាងណា។ បញ្ហាធំៗ ដែលលោក មុត ចន្ថា លើកឡើងនោះគឺ យន្តការនៃការអនុវត្តច្បាប់តាមឋានានុក្រម ដើម្បីដោះស្រាយបញ្ហា ការស្តាប់បង្គាប់តែនាយករដ្ឋមន្ត្រី ការអស់ជំនឿលើស្ថាប័នរដ្ឋ ការតែងតាំងទីប្រឹក្សា និងគណៈរដ្ឋមន្ត្រីច្រើនហួសប្រមាណ និងដំណោះស្រាយបញ្ហានយោបាយមួយចំនួនទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ