លោក ហ៊ុន សែន ប្រើហ្វេសប៊ុកវិញ តែថាមិនស្វាគមន៍អ្នកដែលស្នើឲ្យបិទហ្វេសប៊ុកលោក
នៅទីបំផុតទៅ លោក ហ៊ុន សែន បានត្រឡប់មកប្រើហ្វេសប៊ុកឡើងវិញហើយ ដោយអះអាងថា ក្រុមហ៊ុនហ្វេសប៊ុកបានទាត់ចោលអនុសាសន៍របស់មនុស្សខ្លះ ដែលអតីតនាយករដ្ឋមន្ត្រីរូបនេះហៅថាជា«មនុស្សខូច»។ បើតាមលោក ហ៊ុន សែន គឺក្រុមហ៊ុនហ្វេសប៊ុកបានផ្តល់យុត្តិធម៌ដល់រូបលោក ទើបក្រសួងប្រៃសណីយ៍ បានចេញសេចក្តីប្រកាសទទួលយកតំណាងក្រុមហ៊ុននេះឲ្យចូលមកធ្វើការនៅកម្ពុជាវិញ។ ប៉ុន្តែ លោក ហ៊ុន សែន នៅតែគូសបញ្ជាក់ថា កម្ពុជាមិនស្វាគមន៍ក្រុមមនុស្សខូចដែលផ្តល់អនុសាសន៍មិនត្រឹមត្រូវ ពោលជាក្រុមដែលស្នើឲ្យបិទហ្វេសប៊ុករបស់លោកនោះឡើយ។
ចុះផ្សាយនៅថ្ងៃ៖
ស្តាប់ - ០២:១៥
សូមរំឭកថា សមាជិកក្រុមប្រឹក្សាភិបាលត្រូតពិនិត្យរបស់ក្រុមហ៊ុនMeta ចំនួន២២នាក់ នៅតែមិនអាចចូលកម្ពុជាបានឡើយ។ មនុស្ស២នាក់ក្នុងចំណោមនោះគឺមានអតីតនាយករដ្ឋមន្ត្រីប្រទេសដាណឺម៉ាក់ និងម្នាក់ទៀតគឺជាម្ចាស់ពានរង្វាន់ណូបែលសន្តិភាព រួមទាំងអ្នកសារព័ត៌មាន២នាក់ផងដែរ។
ក្រុមប្រឹក្សាភិបាលត្រួតពិនិត្យនៃក្រុមMeta ដែលជាក្រុមហ៊ុនមេគ្រប់គ្រងបណ្តាញសង្គមហ្វេសប៊ុកដែលពេញនិយមនៅកម្ពុជាបាន លើកជាសំណើរទៅកាន់អ្នកសម្រេចចិត្តហ្វេសប៊ុកឲ្យផ្អាកជាបន្ទាន់នូវទំព័រហ្វេសប៊ុក និងអ៊ីនស្តាក្រាមផ្លូវការរបស់លោក ហ៊ុន សែន ក្នុងរយៈពេល៦ខែ។ ការស្នើនេះ ក្រោយពេលដែលគេទទួលបានការរាយការណ៍ថា លោក ហ៊ុន សែន បានប្រើប្រាស់ភាសាគំរាមកំហែង និងបំភិតបំភ័យអ្នកដទៃ ពិសេសទៅលើអ្នកប្រឆាំង។
ទោះជាយ៉ាងណា ទំព័រហ្វេសប៊ុកលោក ហ៊ុន សែន មិនត្រូវបានបិទយូរឡើយ។ គេហទំព័រដែលមានអ្នកចុចតាមដានជាង១៤លាននាក់នោះ បានផ្តើមបើកដំណើរការឡើងវិញនៅរយៈពេលមិនដល់មួយខែផង បន្ទាប់ពីលោកហ៊ុន សែន ប្រកាសបិទឈប់ប្រើកាលពីចុងខែមិថុនា។ ការដំណើរការឡើងវិញតាំងពីពេលនោះមក គឺស្ថិតនៅក្រោមការគ្រប់គ្រងកម្មសិទ្ធិរបស់លោក ដួង តារា ជំនួយការផ្ទាល់លោក ហ៊ុន សែន ដែលជាម្ចាស់បង្កើតទំព័រហ្វេសប៊ុកនេះ។
ប៉ុន្តែចាប់ពីថ្ងៃទី៣កញ្ញានេះតទៅ លោក ហ៊ុន សែន គូសបញ្ជាក់ថា ការសម្រេចប្រើឬមិនប្រើFacebook គឺជាសិទ្ធផ្តាច់មុខរបស់លោក។
បើតាមអតីតនាយករដ្ឋមន្ត្រីរូបនេះ ក្រុមហ៊ុនFacebook អាចរកបានប្រាក់ចំណេញលើស២០០លានដុល្លារក្នុងមួយឆ្នាំនៅកម្ពុជា ហើយរដ្ឋាភិបាលក៏ទទួលបានការបង់ពន្ធ១០ភាគរយដែលមានទឹកប្រាក់លើស២០លានដុល្លារក្នុងមួយឆ្នាំពីក្រុមហ៊ុនយក្សមួយនេះដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ