CDC៖មនុស្សជិត១០០នាក់កើតជំងឺភ្នែកក្រហមកម្រិតស្រាលក្នុងខេត្តរតនគិរី
គិតមកដល់ថ្ងៃទី២៥កញ្ញាឆ្នាំ២០២៣នេះ មានមនុស្សសរុប៩៣នាក់ ត្រូវបានរកឃើញថា មានជំងឺភ្នែកក្រហម។ ព័ត៌មាននេះត្រូវបានបញ្ជាក់ដោយនាយកដ្ឋានប្រយុទ្ធនឹងជំងឺឆ្លង(CDC)នៃក្រសួងសុខាភិបាល តាមរយៈទំព័រហ្វេសប៊ុកផ្លូវការ នៅថ្ងៃច័ន្ទនេះ ដោយបញ្ជាក់ថា អ្នកជំងឺទាំងនោះ រស់នៅភូមិប៉ក់តូច ឃុំប៉ក់ញ៉ៃស្រុក អូរយ៉ាដាវ ខេត្តរតនគីរី ។
ចុះផ្សាយនៅថ្ងៃ៖
ស្តាប់ - ០២:២៤
បើតាមCDC ករណីនេះផ្ទុះឡើងដំបូងផ្ដើមចេញអ្នកភូមិ៨នាក់ ទៅចូលរួមបុណ្យសពបងប្អូននៅភូមិមួយលើទឹកដីប្រទេសវៀតណាម កាលពីថ្ងៃទី១៤ខែកញ្ញាឆ្នាំ២០២៣ ដែលមានព្រំប្រទល់ជាប់ភូមិប៉ក់តូចនៃខេត្តរតនគិរី។
បន្ទាប់ពីមានអាការៈសង្ស័យ នៅយប់ថ្ងៃទី២៣ ខែកញ្ញា ឆ្នាំ២០២៣ មន្ត្រីជំនាញនៃនាយកដ្ឋានប្រយុទ្ធនឹងជំងឺឆ្លង ព្រមទាំងក្រុមឆ្លើយតបបន្ទាន់មន្ទីរសុខាភិបាលខេត្ត មន្ទីរពេទ្យបង្អែកខេត្ត និងមណ្ឌលសុខភាព ក៏បានចុះទៅពិនិត្យស្រាវជ្រាវ ផ្តល់ការព្យាបាលថែទាំអ្នកជំងឺ និងផ្ដល់ការអប់រំភ្លាមៗ។
យ៉ាងណាមិញ នាយកដ្ឋានប្រយុទ្ធនឹងជំងឺឆ្លង(CDC) បានគូសបញ្ជាក់ថា ករណីភាគច្រើននៃជំងឺភ្នែកក្រហមនេះ គឺមានស្រាលប៉ុណ្ណោះ ដែលជាធម្មតាការឆ្លងនឹងជាសះស្បើយក្នុងរយៈពេលពី៧ទៅ១៤ថ្ងៃ ដោយមិនតម្រូវឲ្យមានការព្យាបាលនិងមិនមានផលវិបាករយៈពេលវែងឡើយ។ ទោះជាយ៉ាងណា ក្នុងករណីខ្លះ ការរលាកភ្នែកដោយវីរុសត្រូវការរយៈពេល២ទៅ៣សប្តាហ៍ឬច្រើនជាងនេះដើម្បីជាសះស្បើយ។ ចំណែក វិធីព្យាបាលរួមមាន ការប្រើថ្នាំបន្តក់ភ្នែក ឬថ្នាំក្រែមដាក់ភ្នែក ដែលជួយបន្ថយរយៈពេលនៃការឆ្លង កាត់បន្ថយផលវិបាក និងកាត់បន្ថយការរីករាលដាលដល់អ្នកដទៃ។
ទន្ទឹមនឹងនេះ CDC បានអំពាវនាវឲ្យពលរដ្ឋ ទៅពិគ្រោះជំងឺជាមួយគ្រូពេទ្យជំនាញ និងរាយការណ៍ជាបន្ទាន់ទៅកាន់អាជ្ញាធរមូលដ្ឋាន បើឃើញកើតមានច្រើនក្នុងកន្លែងធ្វើការ សាលារៀន ក្នុងសហគមន៍របស់ខ្លួន។
គួរជម្រាបជូនថា នៅថ្ងៃអាទិត្យទី២៤ខែកញ្ញាឆ្នាំ២០២៣ម្សិលមិញ ក្រសួងសុខាភិបាលក៏បានរកឃើញជាលើកដំបូង នូវប្រភេទជំងឺហ្ស៊ីកាដែលបានកើតទៅលើកុមារអាយុ៧ឆ្នាំម្នាក់នៅខេត្តកំពង់ធំ។ បើតាមសេចក្តីប្រកាសរបស់ក្រសួងសុខាភិបាលនៅថ្ងៃទី២៤កញ្ញា អ្នកជំងឺបានចូលសម្រាកនៅមន្ទីរពេទ្យកាលពីថ្ងៃទី១៨កញ្ញា ដោយមានអាការៈក្តៅខ្លួនខ្លាំង ក្អួត និងរាគ។ បន្ទាប់មក គ្រូពេទ្យធ្វើតេស្តរកមេរោគគ្រុនឈាម តែទទួលបានលទ្ធផលអវិជ្ជមាន រហូតដល់ក្រោយការវិភាគនៅមន្ទីរពេទ្យប៉ាស្ទ័រ កាលថ្ងៃទី២១កញ្ញា ក៏បានបង្ហាញថា អ្នកជំងឺមានវិជ្ជមានវីរុសហ្ស៊ីកានេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ