កាសែតបរទេស៖ មានការឈូសព្រៃធ្វើផ្លូវថ្មីចេញពីដីសម្បទានក្រុមហ៊ុនThink Biotech នៅតំបន់ព្រៃឡង់
នៅតំបន់ព្រៃឡង់ មានជនមិនស្គាល់មុខបានឈូសឆាយព្រៃធ្វើផ្លូវថ្មីមួយខ្សែ ចេញពីតំបន់ដីសម្បទានដាំដើមឈើឡើងវិញរបស់ក្រុមហ៊ុន Think Biotech (Cambodia) រហូតដល់តំបន់ដែនជម្រកសត្វព្រៃឡង់។ ហើយផ្លូវមួយខ្សែនោះ កំពុងជួយសម្រួលដល់ការកាប់ឈើខុសច្បាប់ និងការជួញដូរឈើមានតម្លៃយ៉ាងអនាធិបតេយ្យ។ នេះបើតាមការស៊ើបអង្កេតរបស់កាសែតបរទេស ម៉ុងហ្គាបេ ចុះផ្សាយនៅថ្ងៃទី៥តុលានេះ ដោយចោទថា ជាស្នាដៃរបស់ក្រុមហ៊ុន Think Biotech (Cambodia)។ តែយ៉ាងណា នាយកក្រុមហ៊ុនរកស៊ីដាំដើមឈើធំជាងគេនៅកម្ពុជាមួយនេះ បានបដិសេធ មិនជាប់ទាក់ទងទៅនឹងរឿងនេះទេ។
ចុះផ្សាយនៅថ្ងៃ៖
ស្តាប់ - ០២:២០
នៅតំបន់ព្រៃឡង់ មានជនមិនស្គាល់មុខបានឈូសឆាយព្រៃធ្វើផ្លូវថ្មីមួយខ្សែ ទៅកាន់តំបន់បេះដូងនៃដែនជម្រកសត្វព្រៃព្រៃឡង់ចេញពីតំបន់ដីសម្បទានដាំដើមឈើឡើងវិញរបស់ក្រុមហ៊ុនរកស៊ីឈើ Think Biotech (Cambodia) ដែលមានប្រមាណ៣ម៉ឺន៤ពាន់ហិកតា លាតសន្ធឹងតាមព្រំដែននៃព្រៃការពារ ក្នុងខេត្តស្ទឹងត្រែងនិងក្រចេះ។ នេះបើតាមការស៊ើបអង្កេតរបស់កាសែតបរទេស ម៉ុងហ្គាបេ ចុះផ្សាយនៅថ្ងៃទី៥តុលានេះ ដោយមានភស្តុតាងជារូបភាពផ្កាយរណបនៅរវាងថ្ងៃទី៦-៩ ខែមេសា ឆ្នាំ២០២៣កន្លងទៅ។
នៅក្នុងអត្ថបទស៊ើបអង្កេតរបស់ម៉ុងហ្គាបេមានសរសេរទៀតថា រូបភាពផ្កាយរណបក៏បានបង្ហាញថា ផ្លូវថ្មីមួយខ្សែនោះ ត្រូវបានកាប់ឈូសឆាយព្រៃបន្តធ្វើជាផ្លូវ ពង្វាងចូលទៅក្នុងតំបន់ការពារព្រៃឡង់ បានប្រវែងប្រមាណ១០គីឡូម៉ែត្រ ត្រឹមថ្ងៃទី១២ខែមេសា ជាប់តំបន់សហគមន៍ជនជាតិដើមភាគតិចកាប់យកជ័រដើមឈើរាប់ជំនាន់។ ត្រឹមថ្ងៃទី២០ខែមេសា ជនមិនស្គាល់មុខបន្តឈូសឆាយបាន១គីឡូម៉ែត្របន្ថែមទៅទិសខាងលិចនៃព្រៃ និងឈានបានសម្រេចប្រវែង ១២គីឡូម៉ែត្រគិតត្រឹមថ្ងៃទី២៥ខែមេសា។
យោងតាមម៉ុងហ្គាបេ ផ្លូវដែលទើបលួចឈូសឆាយនោះកំពុងតែជួយសម្រួលដល់ការកាប់ឈើខុសច្បាប់ និងការជួញដូរឈើមានតម្លៃយ៉ាងអនាធិបតេយ្យ ដោយចោទថា ជាស្នាដៃរបស់ក្រុមហ៊ុន Think Biotech (Cambodia)។
នៅក្នុងបទសម្ភាសជាមួយកាសែតបរទេសមួយនេះកាលពីខែមិថុនាកន្លងទៅ នាយកក្រុមហ៊ុន Think Biotech លោក លី ឈូឆាង បានបដិសេធមិនមានជាប់ពាក់ព័ន្ធទៅនឹងការឈូសឆាយព្រៃធ្វើផ្លូវថ្មី ចេញពីដីសម្បទានក្រុមហ៊ុនលោក ក៏ដូចជាការការជួញដូរឈើខុសច្បាប់នោះដែរ។ ជាការបដិសេធដូចសព្វមួយដង ទៅនឹងការចោទថាក្រុមហ៊ុនរកស៊ីឈើមួយនេះ មានពាក់ព័ន្ធទៅនឹងការកាប់និងលក់ឈើខុសច្បាប់ រំលោភបំពានសហគមន៍ជនជាតិដើមភាគតិច នៅក្នុងតំបន់ព្រៃឡង់នេះ។
គួរជម្រាបជូនផងដែរថា ក្រុមហ៊ុន Think Biotech គឺជាក្រុមហ៊ុនរកស៊ីឈើធំជាងគេនៅកម្ពុជា ដែលទទួលបានសិទ្ធិប្រើប្រាស់ដីព្រៃរបស់រដ្ឋ សម្រាប់ដាំដើមឈើជាលក្ខណៈឧស្សាហកម្ម នៅក្នុងគម្រោងអភិវឌ្ឍជាច្រើន។ ក៏មានដែរនៅតំបន់ព្រៃឡង់នេះ ដែលទទួលបានសិទ្ធិធ្វើពីរដ្ឋាភិបាលកម្ពុជានៅក្នុងឆ្នាំ២០១២៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ