បក្សភ្លើងទៀនលើកយោបល់ឲ្យគណបក្សឆន្ទៈខ្មែរជាតំណាងក្នុងការបោះឆ្នោតព្រឹទ្ធសភា ២០២៤
គណបក្សភ្លើងទៀនបានជ្រើសរើសយកគណបក្សឆន្ទៈខ្មែរ ដើម្បីឈរឈ្មោះជាបេក្ខភាពនៅក្នុងការបោះឆ្នោតអសកលនៅឆ្នាំ២០២៤ ខាងមុខ ដែលគេដឹងថាជាការបោះឆ្នោតជ្រើសតាំងសមាជិកព្រឹទ្ធសភា។ ការលើកជាយោបល់ដូច្នេះ គឺធ្វើឡើងបន្ទាប់ពីគណៈអចិន្ត្រៃយ៍គណបក្សភ្លើងទៀន បានជួបប្រជុំគ្នាកាលពីថ្ងៃទី៣១ ខែតុលា ឆ្នាំ២០២៣ ក៏ប៉ុន្តែការសម្រេចនេះ នៅបន្តបើកចំហនៅឡើយសម្រាប់គណបក្សសម្ព័ន្ធភាពផ្សេងទៀត ខណៈគណៈកម្មការនាយកមិនទាន់មានការយល់ព្រមជាផ្លូវការ។
ចុះផ្សាយនៅថ្ងៃ៖
ស្តាប់ - ០២:១៨
គណបក្សភ្លើងទៀនតាមរយៈកិច្ចប្រជុំគណៈអចិន្ត្រៃយ៍របស់ខ្លួន បានលើកជាយោបល់ដោយជ្រើសរើសយកគណបក្ស«ឆន្ទៈខ្មែរ» ដែលជាគណបក្សនៅក្នុងសម្ព័ន្ធភាពឆ្ពោះទៅអនាគត ធ្វើជាបេក្ខភាពចូលរួមការបោះឆ្នោតអសកលនៅពេលខាងមុខ។ ក៏ប៉ុន្តែគណបក្សភ្លើងទៀន នៅតែបើកចំហដល់គណបក្សផ្សេងទៀតនៅក្នុងសម្ព័ន្ធភាព ឬគណបក្សដែលនឹងចូលរួមក្នុងសម្ព័ន្ធភាពនៅថ្ងៃខាងមុខ ដើម្បីឈរឈ្មោះជាបេក្ខភាពនៃការបោះឆ្នោតឆ្នាំ២០២៤។
ទោះយ៉ាងណា កិច្ចប្រជុំគណៈកម្មការនាយកគណបក្សភ្លើងទៀននៅថ្ងៃដដែល មិនមានកូរ៉ុមគ្រប់គ្រាន់ដើម្បីសម្រេចជាផ្លូវការនូវអ្វីដែលគណៈកម្មការអចិន្ត្រៃយ៍បានលើកឡើងទេ គឺបានត្រឹមការចែករំលែកយោបល់គ្នាប៉ុណ្ណោះ។ នេះបើតាមលោក គង់ មុនីកា អគ្គលេខាធិកាស្តីទីគណបក្សភ្លើងទៀន។
សូមបញ្ជាក់ថាគណបក្សភ្លើងទៀន កាលពីថ្ងៃទី២០ ខែតុលា កន្លងទៅ បានប្រកាសហើយថានឹងចូលរួមបោះឆ្នោតជ្រើសតាំងសមាជិកព្រឹទ្ធសភានីតិកាលទី៥ នៅថ្ងៃទី២៥ ខែកុម្ភៈ ឆ្នាំ២០២៤ និងការបោះឆ្នោតផ្សេងទៀតដើម្បីជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ អាណត្តិទី៤ ឆ្នាំ២០២៤ដែរ។
ការរៀបចំទុកជាមុនរបស់គណបក្សភ្លើងទៀន បានធ្វើឡើងបន្ទាប់ពីគណបក្សនេះ ត្រូវបានផាត់ចោលពីការបោះឆ្នោតជ្រើសតាំងតំណាងរាស្ត្រនីតិកាលទី៧ ក្រោមហេតុផលមិនមានឯកសារចុះបញ្ជីគណបក្សច្បាប់ដើម។ ដូច្នេះយន្តការនេះ ត្រូវគេមើលឃើញថាជាយុទ្ធសាស្ត្រត្រៀមលក្ខណៈទុកជាមុនរបស់គណបក្សប្រឆាំង បើទោះណាពួកគេត្រូវបានអនុញ្ញាតឲ្យចូលរួមបោះឆ្នោតជ្រើសរើសក្រុមប្រឹក្សាឃុំសង្កាត់អាណត្តិទី៥ កាលពីឆ្នាំ២០២២ក៏ដោយ។
សូមរំលឹកថាកាលពីការបោះឆ្នោតជ្រើសរើសក្រុមប្រឹក្សាឃុំសង្កាត់ឆ្នាំ២០២២ គណបក្សភ្លើងទៀនបានឈ្នះអាសនៈក្រុមប្រឹក្សាចំនួនជាង២ពាន់អាសនៈ ក្រៅពីនេះមានគណបក្សប្រជាធិបតេយ្យមូលដ្ឋានឈ្នះបានតិចតួច ដែលសមាជិកទាំងអស់នេះគឺជាអង្គបោះឆ្នោតជ្រើសតាំងសមាជិកព្រឹទ្ធសភាដ៏សំខាន់។
សូមបញ្ជាក់ដែរថាការបោះឆ្នោតជ្រើសតាំងព្រឹទ្ធសភាកម្ពុជាមានរយៈពេល៦ឆ្នាំម្តង ដោយនីតិកាលទី៤នៃព្រឹទ្ធសភាមានសមាជិកសរុប ៦២រូប ក្នុងនោះ ២រូបត្រូវបានចាត់តំាងដោយព្រះមហាក្សត្រ ហើយ២រូបទៀតត្រូវបានជ្រើសតាំងដោយរដ្ឋសភា ក្រៅពីនេះសុទ្ធសឹងជាសមាជិករបស់គណបក្សប្រជាជនកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ