លោក ហ៊ុន ម៉ាណែត៖ កម្ពុជាខ្ចីលុយបរទេសមកបម្រើសេដ្ឋកិច្ចជាតិ មិនមែនយកមកទិញយន្តហោះ
នៅព្រឹកមិញនេះ លោកនាយករដ្ឋមន្ត្រី ហ៊ុន ម៉ាណែត បានអះអាងជាថ្មីថា កម្ពុជាមិនខ្ចីបុលបរទេសរហូតដល់វ័ណ្ឌកឡើយ នៅខណៈដែលមានការរិះគន់និងការព្រួយបារម្ភថា រដ្ឋាភិបាលកម្ពុជា ក្រោមការដឹកនាំរបស់លោក ហ៊ុន ម៉ាណែត មិនខុសពីឪពុក ជំពាក់លុយចិន នាំឱ្យកម្ពុជាបាត់បង់អធិបតេយ្យភាព។ តាមលោក ហ៊ុន ម៉ាណែត ការខ្ចីបុលបរទេសពិសេសប្រទេសចិន មិនមែនយកមកទិញរថយន្ត ទិញយន្តហោះជិះនោះទេ តែផ្ទុយទៅវិញគឺ ដើម្បីយកមកបម្រើ សេដ្ឋកិច្ចជាតិ។ គួរជម្រាបថា បំណុលដែលកម្ពុជាជំពាក់បរទេសបច្ចុប្បន្នមានប្រមាណជាង១០ពាន់លានដុល្លារ ឬ ស្មើនឹង៣៤% នៃផលិតផលក្នុងស្រុកសរុប។
ចុះផ្សាយនៅថ្ងៃ៖
នៅព្រឹកថ្ងៃទី២វិច្ឆិកានេះ លោកនាយករដ្ឋមន្ត្រី ហ៊ុន ម៉ាណែត បានអះអាងជាថ្មីថា កម្ពុជាមិនខ្ចីបុលបរទេសរហូតដល់វ័ណ្ឌកឡើយ ពោលការខ្ចីបុលបរទេសពិសេសចិន មិនមែនយកមកទិញរថយន្តទិញយន្តហោះជិះនោះទេ តែផ្ទុយទៅវិញ គឺដើម្បីយកមកបម្រើដល់ការអភិវឌ្ឍសេដ្ឋកិច្ចជាតិ។
តែយ៉ាងណា អ្នកវិភាគសង្គមនិងអ្នកជំនាញសេដ្ឋកិច្ច ស្នើឱ្យរដ្ឋាភិបាលកម្ពុជាប្រើប្រាស់កម្ចីឱ្យចំគោលដៅ និងជៀសវាងពីការប្រើប្រាស់ខុស ដែលនាំឱ្យមានការកើនឡើងអំពើពុករលួយ ពិសេសវិបត្តិសេដ្ឋកិច្ចជាតិ នៅខណៈដែលមានការរិះគន់ជាច្រើនពាក់ព័ន្ធនឹងប្រើប្រាស់កញ្ចប់ថវិកាជាតិ ក្នុងការតែងតាំងមន្ត្រីខ្យល់ មន្ត្រីគ្រាប់ល្ពៅ នៅតាមស្ថាប័នរដ្ឋមួយចំនួន។
យោងតាមសេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២៤ គិតត្រឹមត្រីមាសទី៣ ឆ្នាំ២០២៣ កម្ពុជាមានបំណុលសាធារណៈក្រៅប្រទេស ចំនួនប្រមាណ ១០ពាន់លានដុល្លារអាមេរិក (១០,៧៤១.៦៨លានដុល្លារអាមេរិក) ឬ ស្មើនឹង៣៤%នៃផលិតផលក្នុងស្រុកសរុប។ ដោយក្នុងនោះបំណុលជាមួយប្រទេសចិនច្រើនជាងគេ មានចំនួន ៣៨% ឬ ប្រមាណ ៤ពាន់លានដុល្លារអាមេរិក បំណុលមរតកចំនួន ៦% និងបំណុលជាមួយប្រទេសផ្សេងទៀតចំនួន ២១%។
ចំណែកបំណុលពហុភាគីជាមួយធនាគារអភិវឌ្ឍន៍អាស៊ីមានចំនួន ២១% ឬ ប្រមាណ ២២០០លានដុល្លារអាមេរិក ធនាគារពិភពលោក ១១% និងពហុភាគីផ្សេងទៀត ៣%។ បើតាមក្រសួងហិរញ្ញវត្ថុកម្ពុជា ស្ថានភាពបំណុលសាធារណៈបច្ចុប្បន្នរបស់កម្ពុជា នៅតែត្រូវបានវាយតម្លៃ ស្ថិតក្នុងភាពអាចគ្រប់គ្រងបាន ពោលគឺ នៅតែមាន «ចីរភាព» និង «ហានិភ័យកម្រិតទាប» ដដែល បើទោះបីជាសេដ្ឋកិច្ចកម្ពុជា ទទួលរងនូវផលប៉ះពាល់ពីការរីករាលដាលនៃវិបត្តិជំងឺកូវីដ-១៩ និងពីកត្តាខាងក្រៅផ្សេងទៀតក្តី។
ជាមួយគ្នានេះ តាមរបាយការណ៍ដដែល រដ្ឋាភិបាលកម្ពុជាគ្រោងខ្ចីប្រាក់ពីដៃគូអភិវឌ្ឍន៍ប្រមាណ ២ពាន់៣រយលានដុល្លារអាមេរិក ក្នុងឆ្នាំ២០២៤ ដើម្បីយកមកទ្រទ្រង់ចីរភាពនៃកំណើនសេដ្ឋកិច្ច និងឆ្លើយតបទៅនឹងតម្រូវការនៃការអភិវឌ្ឍជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ