ឯករាជ្យ៧០ឆ្នាំ៖កម្ពុជាគោរពវិញ្ញាណក្ខន្ធនៅវិមានឯករាជ្យ និងមិទ្ទិញនៅមុខវាំង
ប្រទេសកម្ពុជាបានប្រារព្ធខួបឯករាជ្យ៧០ឆ្នាំរបស់ខ្លួននៅថ្ងៃទី០៩ ខែវិច្ឆិកា ធំដុំជាងព្រឹត្តិការណ៍ដូចគ្នានេះជារៀងរាល់ឆ្នាំ ដោយមានការគោរពវិញ្ញាណក្ខន្ធយុទ្ធជននៅវិមានឯករាជ្យ និងរៀបចំមិទ្ទិញមហាជននៅមុខព្រះបរមរាជវាំង ដែលមានអ្នកមុខអ្នកការ មហាជនចូលរួមប្រមាណ១ម៉ឺននាក់។ ពិធីនេះបានប្រព្រឹត្តទៅក្រោមព្រះរាជធិបតីភាពព្រះមហាក្សត្រកម្ពុជាព្រះបាទសម្តេចព្រះ នរោត្តម សីហមុនី។
ចុះផ្សាយនៅថ្ងៃ៖
ស្តាប់ - ០២:៤១
ដូចសព្វមួយដងដែរការគោរពវិញ្ញាណក្ខន្ធនៅវិមានឯករាជ្យត្រូវបានរៀបចំឡើងយ៉ាងអធិកអធម ដោយព្រះមហាក្សត្រ នរោត្តម សីហមុនី យាងអុចទៀនជ័យ ក្រោមបដិសណ្ឋារកិច្ចរបស់ថ្នាក់ដឹកនាំជាន់ខ្ពស់ស៊ីវិល កងកម្លាំងប្រដាប់អាវុធ មន្ត្រីរាជការ និងមហាជនផងដែរ។ បន្ទាប់ពីពិធីគោរពវិញ្ញាណក្ខន្ធ និងអុចទៀនជ័យនៅវិមានឯករាជ្យ ព្រះមហាក្សត្រ និងមន្ត្រីធំតូច រួមទាំងមហាជនបានបន្តកម្មវិធីនៅខាងមុខព្រះមរមរាជវាំង ដើម្បីធ្វើមិទ្ទិញមហាជន ដោយមានការស្រែកជ័យឃោស របាំជូនពរ និងមានការថ្លែងព្រះរាជសុន្ទរកថារបស់ព្រះមហាក្សត្រ និងនាយករដ្ឋមន្ត្រី មុនប៉ោងប៉ោងចំរុះពណ៌ជាច្រើនត្រូវបានបង្ហោះ។
យោងតាមព្រះរាជសុន្ទរកថារបស់ព្រះមហាក្សត្រ ដែលមានសំណេរ៤ទំព័រ ព្រះបាទ នរោត្តម សីហមុនី បានមានព្រះរាជបន្ទូលលើកឡើងពីប្រវត្តិ និងគុណបំណាច់របស់អតីតព្រះមហាក្សត្រ ព្រះបាទ នរោត្តម សីហនុ ដែលព្រះអង្គបានដឹកនាំការតស៊ូទាមទារបានឯករាជ្យបរិបូណ៌ពីប្រទេសបារាំងនៅថ្ងៃទី០៩ ខែវិច្ឆិកា ឆ្នាំ១៩៥៣ បន្ទាប់ពីកម្ពុជាបានស្ថិតក្រោមនឹមអាណានិគមអស់រយៈពេលជិតមួយសតវត្សរ៍។
ដោយបង្ហាញពីការចងចាំដល់គុណបំណាច់របស់អតីតព្រះមហាក្សត្រ យុទ្ធជន និងប្រជារាស្ត្រខ្មែរនៅសម័យអតីតកាល ព្រះមហាក្សត្រ សីហមុនី ក៏បានរំលេចនូវ ស្នាព្រះហស្ត និងសមិទ្ធផលដ៏ច្រើនសន្ធឹកសន្ធាប់របស់កម្ពុជាបន្ទាប់ពីទទួលបានឯករាជ្យពីបារាំង។ ក្នុងព្រះរាជសុន្ទរកថាព្រះអង្គ ព្រះមហាក្សត្រព្រះអង្គមិនភ្លេចទេ ពីការលើកសរសើរដល់ការប្រឹងប្រែងរបស់រដ្ឋាភិបាលខ្មែរចុងក្រោយដែលដឹកនាំដោយលោកអតីតនាយករដ្ឋមន្ត្រី ហ៊ុន សែន និងនាយករដ្ឋមន្ត្រីបច្ចុប្បន្នលោក ហ៊ុន ម៉ាណែត។
ជាមួយគ្នានេះ លោកនាយករដ្ឋមន្ត្រី ហ៊ុន ម៉ាណែត ក៏បានធ្វើការប្តេជ្ញាដែរថា នឹងដង្ហែរតាមស្នាព្រះហស្តប្រវត្តិសាស្ត្រ និងគំរូវីរភាពរបស់ព្រះមហាវីរក្សត្រ នរោត្តម សីហនុ និងរួមគ្នាជាធ្លុងមួយក្រោមព្រះរាជកិច្ចដឹកនាំរបស់ព្រះមហាក្សត្រ សីហមុនី និងថែរក្សាឲ្យបាននូវឯករាជ្យ អធិបតេយ្យ និងសន្តិភាព។
នៅថ្ងៃនេះដែរ សម្ព័ន្ធភាពឆ្ពោះទៅអនាគត ដែលរួមមានគណបក្សប្រឆាំង៤ បានចេញសារអបអរសាទរដែរ ក្នុងឱកាសខួបលើកទី៧០ ថ្ងៃបុណ្យឯករាជ្យជាតិ ០៩ វិច្ឆិកា ដោយសម្ព័ន្ធភាពបានបង្ហាញពីការរំលឹក និងដឹងគុណដល់អតីតព្រះមហាក្សត្រ នរោត្តម សីហនុ ចំពោះព្រះរាជបូជនីយកិច្ចដ៏ធំធេងរបស់ព្រះអង្គដែលមិនអាចកាត់ថ្លៃបាន។ ក៏ប៉ុន្តែគណបក្សសម្ព័ន្ធបានឆ្លៀតរំលេចថា ការទាមទារ និងការថែរក្សាការពារឯករាជ្យជាតិពិតប្រាកដទៅបាន គឺអាស្រ័យលើស្មារតីនៃការរួបរួម និងឯកភាពជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ