ក្រសួងសុខាភិបាល៖ ស្ត្រីម្នាក់នៅខេត្តកំពតមានជំងឺផ្តាសាយបក្សី
លទ្ធផលពិសោធន៍ពីវិទ្យាស្ថានជាតិសុខភាពសាធារណៈ និងវិទ្យាស្ថានប៉ាស្ទ័រកម្ពុជានៅក្នុងថ្ងៃទី២៣វិច្ឆិកាម្សិលមិញនេះបង្ហាញថា មានអ្នកជំងឺផ្តាសាយបក្សីចំនួន០១ករណីទៀតហើយ ដែលកើតលើស្ត្រីអាយុ២១ឆ្នាំ នៅក្នុងខេត្តកំពត។ ក្រសួងសុខាភិបាលឱ្យដឹងថា អ្នកជំងឺបច្ចុប្បន្នកំពុងស្ថិតនៅក្នុងបន្ទប់សង្គ្រោះបន្ទាន់ ក្រោមបញ្ជូនមកមន្ទីរពេទ្យមិត្តភាពខ្មែរសូវៀត ដោយមានអាការៈគ្រុនក្តៅ ពិបាកដកដង្ហើមនិងក្អក។
ចុះផ្សាយនៅថ្ងៃ៖
ស្តាប់ - ០២:៥៦
លទ្ធផលពិសោធន៍ពីវិទ្យាស្ថានជាតិសុខភាពសាធារណៈនិងវិទ្យាស្ថានប៉ាស្ទ័រកម្ពុជានៅថ្ងៃទី២៣វិច្ឆិកាម្សិលមិញនេះបង្ហាញថា ស្ត្រីម្នាក់ អាយុ២១ឆ្នាំ ដែលមានទីលំនៅនៅក្នុងភូមិត្រពាំងឬស្សី ឃុំដំណាក់សុំក្រំ ស្រុកដងទង់ ខេត្តកំពត មានវិជ្ជមានជំងឺផ្តាសាយបក្សី ប្រភេទហាស៥ អ៊ិន១ (H1N1)។
តាមការសាកសួររបស់ក្រសួងសុខាភិបាលកម្ពុជា ប្រហែលមួយសប្តាហ៍មុននេះ មានមាន់ងាប់ច្រើនជាបន្តបន្ទាប់នៅផ្ទះនិងក្នុងភូមិកើតហេតុ។ និងដោយបន្តថា អ្នកជំងឺបានចាប់ផ្តើមឈឺនៅថ្ងៃទី១៩វិច្ឆិកា បន្ទាប់មកមានរោគផ្លូវដង្ហើមរួមមានគ្រុនក្តៅ ពិបាកដកដង្ហើម និងក្អក ទើបបញ្ជូនមកសង្គ្រោះបន្ទាន់ នៅមន្ទីរពេទ្យមិត្តភាពខ្មែរសូវៀតនៅថ្ងៃទី២៣វិច្ឆិកាម្សិលមិញនេះ។ ក្រសួងសុខាភិបាលឱ្យដឹងថា អ្នកជំងឺបច្ចុប្បន្នកំពុងស្ថិតនៅក្នុងបន្ទប់សង្គ្រោះបន្ទាន់។
តាមក្រសួងសុខាភិបាល នៅយប់មិញនេះក្រុមឆ្លើយតបបន្ទាន់របស់ក្រសួងសុខាភិបាលជាតិនិងថ្នាក់ក្រោមជាតិ បាននិងកំពុងសហការជាមួយក្រុមការងារក្រសួងកសិកម្មនិងក្រសួងបរិស្ថាន អង្កេតស្រាវជ្រាវការកើតឡើងនូវជំងឺផ្តាសាយបក្សីប្រភេទនេះ និងធ្វើការឆ្លើយតបទៅតាមវិធីសាស្ត្រ និងពិធីសារបច្ចេកទេស ក្នុងការស្វែងរកប្រភពចម្លង ទាំងលើសត្វនិងមនុស្ស និងបន្តស្វែងរកករណីសង្ស័យ និងអ្នកប៉ះពាល់ដើម្បីទប់ស្កាត់ការឆ្លងបន្តទៅអ្នកដទៃទៀតក្នុងសហគមន៍។ ទន្ទឹមគ្នានេះដែរ ក៏មានការចែកជូនឱសថតាម៊ីហ្លូ ( Tamiflu) ដល់អ្នកប៉ះពាល់ ជិតស្និត និងធ្វើយុទ្ធនាការអប់រំសុខភាពប្រជាពលរដ្ឋនៅក្នុងភូមិកើតហេតុខាងលើនេះ។
សូមជម្រាបជូនផងដែរថា ជំងឺផ្តាសាយបក្សី H5N1នេះ គឺជាជំងឺផ្តាសាយមួយ ដែលចម្លងរវាងសត្វបក្សីឈឺនិងសត្វបក្សីផ្សេងទៀត ប៉ុន្តែជួនកាលវាអាចចម្លងពីបក្សីទៅមនុស្ស តាមរយៈការប៉ះពាល់ជិតស្និទ្ធជាមួយបក្សីដែលឈឺឬស្លាប់។ តាមក្រសួងសុខាភិបាល ជំងឺផ្តាសាយបក្សីលើមនុស្ស គឺជាជំងឺធ្ងន់ធ្ងរ ដែលតម្រូវឱ្យធ្វើការព្យាបាលនៅមន្ទីរពេទ្យទាន់ពេលវេលា។ ទោះបីជាមិនងាយឆ្លងពីមនុស្សទៅមនុស្ស ប៉ុន្តែវាអាចបំប្លែងខ្លួនអាចឆ្លងដូចនឹងជំងឺផ្តាសាយតាមរដូវកាលផងដែរ។
គួររំព្ញកថា ជំងឺផ្តាសាយបក្សី ប្រភេទ H5N1នេះ បានសម្លាប់មនុស្ស៣នាក់ ក្នុងឆ្នាំ២០២៣នេះ។ ករណីទី១ កាលពីខែកុម្ភៈ មានស្លាប់ក្មេងស្រីម្នាក់អាយុ១១ឆ្នាំ ក្នុងស្រុកស៊ីធរកណ្តាល ខេត្តព្រៃវែង។ និង២ករណីទៀតក្នុងខែតុលា ដោយម្នាក់ជាបុរសអាយុ៥០ឆ្នាំ នៅស្រុករមាសហែក ខេត្តស្វាយរៀង និងម្នាក់ទៀត ជាក្មេងស្រីអាយុ២ឆ្នាំនៅស្រុកកំចាយមារ ខេត្តព្រៃវែង តាមរយៈការបំផ្លាញផ្លូវដង្ហើម។ តាមតួលេខពីក្រសួងសុខាភិបាល ចាប់តាំងពីឆ្នាំ២០០៥មក កម្ពុជាបានរកឃើញអ្នកឆ្លងជំងឺផ្តាសាយបក្សីប្រមាណ៦០ករណី ដែលក្នុងនោះ៤០នាក់បានស្លាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ