អ្នកជំនាញរិះគន់ការសរសេរអក្សរខុសអក្ខរាវិរុទ្ធលើស្លាកប៉ាណូពិធីបុណ្យអុំទូក
អ្នកជំនាញផ្នែកទស្សនវិជ្ជា រិះគន់ការសរសេរអក្សរខុសអក្ខរាវិរុទ្ធនៅលើស្លាកប៉ាណូអបអរពិធីបុណ្យអុំទូក និងចាត់ទុកថានេះជាការធ្វេសប្រហែស និងមិនផ្តល់តម្លៃដល់អក្សរសាស្ត្រខ្មែរ។ ស្លាកប៉ាណូដែលសរសេរអក្សរខុសអក្ខរាវិរុទ្ធនេះ ត្រូវបានគេសង្កេតឃើញថា កើតមាននៅជិតក្រុមហ៊ុនកាស៊ីណូហ្គាវើលដ៍ ខណៈករណីនេះកើតឡើងជាញឹកញាប់រាល់ពេលមានពិធីបុណ្យជាតិធំៗមិនថាការរៀបចំរបស់ស្ថាប័នរដ្ឋ ឬក្រុមហ៊ុនឯកជន។
ចុះផ្សាយនៅថ្ងៃ៖
ស្តាប់ - ០១:៤២
លោកបណ្ឌិត ឈត ប៊ុនថង ប្រធាននាយកដ្ឋាននៃវិទ្យាស្ថានទំនាក់ទំនងអន្តរជាតិនៃកម្ពុជា និងអ្នកជំនាញទស្សនវិជ្ជាផងវាយតម្លៃថា អ្នករៀបចំស្លាកប៉ាណូ ឬអ្នកទទួលខុសត្រូវលើការសរសេរពាក្យពេចន៍ មិនបានយកចិត្តទុកដាក់ឱ្យម៉ត់ចត់ និងមិនសូវយល់ច្បាស់ពីអក្សរសាស្ត្រខ្មែរទើបបង្កឱ្យមានកំហុសបែបនេះកើតឡើង។
លោកបណ្ឌិតបន្តថា រាល់ការសរសេរអ្វីមួយដើម្បីដាក់តាំងក្នុងពិធីបុណ្យជាតិគួរតែមានអ្នកត្រួតពិនិត្យផ្ទៀងផ្ទាត់អក្ខរាវិរុទ្ធបន្ថែមដើម្បីជៀសវាងការបង្កើតកំហុសដោយអចេតនា ខណៈលោកបណ្ឌិតក៏ស្នើឱ្យមានការយកចិត្តទុកដាក់កាន់តែខ្លាំងចំពោះការសរសេរ និងប្រើប្រាស់អក្សរសាស្ត្រខ្មែរ ត្បិតថាវាអាចបង្កការភាន់ច្រឡំដល់សាធារណជន ពិសេសក្មេងៗ។
ក្នុងនោះលោកបណ្ឌិត ឈត ប៊ុនថង សង្កេតឃើញ បណ្តាស្ថាប័នអន្តរក្រសួងពាក់ព័ន្ធដែលមានតួនាទីត្រួតពិនិត្យលើស្លាកប៉ាណូហាក់នៅមិនទាន់ចេះធ្វើការជាមួយគ្នា ទើបបង្កឱ្យមានជាកំហុសញឹកញាប់បែបនេះ។
ការសរសេរអក្សរខុសអក្ខរាវិរុទ្ធនៅលើស្លាកប៉ាណូពិធីបុណ្យអុំទូក គឺមានចំនួន១ទីតាំងដែលស្ថិតនៅជិតក្រុមហ៊ុនកាស៊ីណូណាហ្គាវើលដ៍ក្បែរស្ពានកោះពេជ្រដោយពាក្យសាទរភ្លេចព្យញ្ជនៈ«រ» ។ ពាក់ព័ន្ធនឹងការសរសេរអក្សរខុសនេះ អ្នកលេងបណ្តាញសង្គមជាច្រើនក៏បានរិះគន់ផងដែរ ដោយមតិខ្លះខ្វែងគំនិតគ្នាជុំវិញការសរសេរពាក្យថា ពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ