បក្សប្រឆាំងតាមរយៈគណបក្សឆន្ទៈខ្មែរនឹងដាក់ពាក្យចូលរួមបោះឆ្នោតព្រឹទ្ធសភានៅដើមខែក្រោយ
គណបក្សភ្លើងទៀន តាមរយៈគណបក្សឆន្ទៈខ្មែរ នឹងចុះឈ្មោះគណបក្ស រួមនឹងដាក់បេក្ខភាពចូលរួមបោះឆ្នោតព្រឹទ្ធសភានីតិកាលទី៥ ក្នុងពេលឆាប់ៗនេះ។ ការត្រៀមលក្ខណៈរបស់គណបក្សភ្លើងទៀន តាមរយៈគណបក្សឆន្ទៈខ្មែរនេះ គឺមិនមានការប្រែប្រួលទេ ខណៈដែលគណបក្សប្រជាជនកម្ពុជា បានដាក់ពាក្យមុនគេកាលពីដើមសប្តាហ៍នេះ ក្នុងការចូលរួមប្រកួតប្រជែងការបោះឆ្នោតព្រឹទ្ធសភា ដោយលោក ហ៊ុន សែន អតីតនាយករដ្ឋមន្ត្រីឈរនៅលេខរៀងទី១ មណ្ឌលភូមិភាគ៣។
ចុះផ្សាយនៅថ្ងៃ៖
ស្តាប់ - ០២:២១
អ្នកនាំពាក្យគណបក្សភ្លើងទៀន លោក គីមសួរ ភីរិទ្ធ បានប្រាប់វិទ្យុបារាំងអន្តរជាតិ RFI ថាគណបក្សភ្លើងទៀនមិនបានផ្លាស់ប្តូរជំហរទេ គឺផ្តល់ការទុកចិត្តដល់គណបក្សសម្ព័ន្ធ ដោយជ្រើសរើសយកគណបក្សឆន្ទៈខ្មែរ ជាគណបក្សដែលត្រូវដាក់បញ្ជីឈរឈ្មោះចូលរួមបោះឆ្នោតជ្រើសតាំងសមាជិកព្រឹទ្ធសភានីតិកាលទី៥ ដែលនឹងប្រព្រឹត្តទៅនៅខែកុម្ភៈ ឆ្នាំ២០២៤ ខាងមុខ។
លោក គីមសួរ ភីរិទ្ធ បញ្ជាក់ថាគណបក្សកំពុងរៀបចំបញ្ជីឈ្មោះ ហើយប្រហែលជាប៉ុន្មានថ្ងៃខាងមុខនេះ ពោលគឺនៅដើមខែក្រោយគណបក្សឆន្ទៈខ្មែរ នឹងទៅចុះបញ្ជី និងដាក់បេក្ខភាពនៅគណៈកម្មាធិការជាតិរៀបចំការបោះឆ្នោត(គ.ជ.ប) ដើម្បីចូលរួមប្រកួតប្រជែង។
សូមបញ្ជាក់ថាគណបក្សភ្លើងទៀន គឺជាគណបក្សប្រឆាំងដែលមានសមាជិកក្រុមប្រឹក្សាឃុំ សង្កាត់ ជាង២ពាន់នាក់។ សមាជិកទាំងនេះ គឺជាអង្គបោះឆ្នោតដ៏សំខាន់របស់គណបក្សភ្លើងទៀន នៅក្នុងការបោះឆ្នោតជ្រើសតាំងសមាជិកសភាលើកនេះ។ ក៏ប៉ុន្តែគណបក្សភ្លើងទៀន កំពុងស្ថិតក្នុងស្ថានភាពមិនសូវល្អ ដោយទី១គណបក្សនេះមិនអាចចូលរួមបោះឆ្នោតបាន ហើយត្រូវប្រើដៃសម្ព័ន្ធមិត្តគណបក្សឆន្ទៈខ្មែរ និងម្យ៉ាងទៀតគណបក្សនេះ កំពុងមានការប្រទាញប្រទង់សមាជិកគ្នាជាមួយគណបក្សកម្លាំងជាតិ ដែលជាគណបក្សប្រឆាំងទើបបង្កើតថ្មី។
ជាមួយគ្នានេះ គណបក្សប្រជាជនកម្ពុជាដែលកាន់អំណាច កាលពីថ្ងៃទី២៧ ខែវិច្ឆិកា ឆ្នាំ២០២៣ ក៏បានដាក់ពាក្យស្នើសុំចុះបញ្ជីគណបក្សនយោបាយឈរឈ្មោះបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ ដោយដាក់គ្រប់ទាំង ៨ភូមិភាគ។ ជាការកត់សម្គាល់ លោក ហ៊ុន សែន ប្រធានក្រុមឧត្តមប្រឹក្សាផ្ទាល់ព្រះមហាក្សត្រ និងជាប្រធានគណបក្សប្រជាជន បានឈរនៅលេខរៀងទី១ មណ្ឌលភូមិភាគ៣ ខេត្តកណ្តាល។
ជាមួយគ្នានេះ ក៏មានមន្ត្រីជាន់ខ្ពស់រដ្ឋាភិបាលអាណត្តិមុនមួយចំនួនដែរ បានឈរឈ្មោះជាបេក្ខជនព្រឹទ្ធសភាតាមមណ្ឌលមួយចំនួនដូចជាលោក ប្រាក់ សុខុន អតីតរដ្ឋមន្ត្រីការបរទេស លោក ចែម វិទ្យា និងលោក អ៊ុច បូរិទ្ធ រដ្ឋលេខាធិការក្រសួងការបរទេស លោក នាង ផាត រដ្ឋលេខាធិការក្រសួងការពារជាតិជាដើម។
សូមរំលឹកថា ប្រធានគណបក្សកាន់អំណាចលោក ហ៊ុន សែន កាលពីខែកក្កដាកន្លងទៅបានប្រកាសថា លោកនឹងទៅកាន់តំណែងជាប្រធានព្រឹទ្ធសភាជំនួសលោក សាយ ឈុំ ដែលនឹងចូលនិវត្តន៍នៅក្នុងនីតិកាលទី៥នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ